NATIONAL NEWS

Ikinalungkot ni Senate Committee on Sustainable Development Goals, Innovation and Futures Thinking Chairperson Nancy Binay ang hidwaan sa pagitan nina Pangulong Ferdinand Marcos Jr. at Vice President Sara Duterte.

Sinabi ni Senador Binay sa DWIZ, sa loob ng mahabang panahon, ngayon lamang ulit naganap na naging magkaaway ang magkakamping Presidente at Bise Presidente noong halalan.

Hangad naman naman ng mababatas na tumigil na ang kaguluhan sa pulitika.

Samantala, Ayon kay Senador Binay, hindi siya nagulat sa ipinakitang asal ni VP Sara.

Hindi nagbibigay ng listahan ng mga tanong ang National Bureau of Investigation.

Ito ang tugon mismo ni NBI Director Jaime Santiago sa hirit ni Vice President Sara Duterte sa gitna ng ikinakasang imbestigasyon hinggil sa pahayag nito na pagpatay laban kay Pangulong Ferdinand Marcos Jr.

Ayon kay Director Santiago, hindi nila ibibigay ang hinihingi ni Duterte na advanced questions.

Kabilang sa lamang sa aalamin ng NBI ay tungkol sa taong sinabi niyang kinontrata niya para patayin ang pangulo kung magtagumpay ang isang plano laban sa kanya, gayundin ang banta sa sinasabi sa kanyang buhay.

Nakatakdang humarap si Duterte sa NBI noong Nobyembre 29 upang bigyang linaw ang kanyang pahayag na nagbigay na siya ng utos na ipapatay sina Pangulong Marcos, First Lady Liza Araneta Marcos, at Speaker Ferdinand Martin Romualdez kung siya mismo ang mapatay.

Umatras ang mahigit walong libong operator at driver ng public utility vehicles na nag-apply ng consolidation sa ilalim ng PUV modernization program.

Ito’y matapos ang 45 araw na extension na ibinigay ng Land Transportation Franchising and Regulatory Board para sa konsolidasyon ng mga operator at driver.

Sinabi ng transport group na Manibela, na 6,000 miyembro nito at 2,000 miyembro ng Piston ang umatras sa consolidation scheme.

Paliwanag ng grupo, nakaka-biyahe ang mga driver ng lima hanggang anim na beses sa isang linggo noon pero sa ngayon ay dalawang beses na lamang dahil gusto ng mga kooperatiba ay modern lamang ang patatakbuhin.

Dahil dito, makikipag-ugnayan ang dalawang transport group sa Department of Transportation para payagan silang makapagparehistro at makapag-renew ng prangkisa kahit hindi pa sila consolidated.

Naniniwala si Senate President Pro-Tempore Jinggoy Estrada na maaaring makaapekto sa ekonomiya ng bansa ang kaliwa’t kanang isyu sa pulitika.

Inihalimbawa ni Sen. Estrada, sa DWIZ, ang naganap na impeachment kay dating pangulong Joseph Estrada kung saan aniya bumaba ang ekonomiya ng bansa.

Dahil dito, hindi aniya advisable ang pagpapatalsik sa pwesto kay VP Sara. –  Sa panulat ni John Riz Calata

Pinahintulutan nang makalaya ng House Committee on Good Government and Public Accountability si Office of the Vice President Chief of Staff Atty. Zuleika Lopez.

Ito ay alinsunod sa inilabas na release order ng nasabing komite kung saan papayagan nang makalaya si Atty. Lopez matapos nitong isailalim sa medical examination.

Si Atty. Lopez ay kasalukuyang naka-admit sa Veterans Memorial Medical Center dahil sa nararamdaman nitong acute stress disorder.

Nabatid na noong Nobyembre 20 ay inaprubahan ng komite na makulong ang OVP official matapos nitong sumulat sa Commission on Audit na huwag makipagtulungan sa Kamara kaugnay ng imbestigasyon ng confidential fund na ginastos ng Bise Presidente. – Sa panulat ni John Riz Calata

Muling iginiit ng mga kongresista na wala sa kanilang plano ang paghahain ng impeachment complaint laban kay Vice President Sara Duterte sa kabila ng malakas na panawagan na gawin ito.

Ayon kina Senior Deputy Speaker Aurelio Gonzales Jr., Deputy Speaker David Suarez, at House Majority Leader Manuel Jose Dalipe, mas nakatuon ang kamara sa imbestigasyon hinggil sa sinasabing maling paggastos sa pondo ng Office of the Vice President at Department of Education noong pinamumunuan pa ito ni VP Sara.

Dagdag pa ng tatlong mambabatas, dapat malaman ng mga pilipino ang kasagutan kaugnay sa nasabing isyu.

Layunin din anilang matugunan ang kanilang responsibilidad bilang mambabatas nang walang bahid ng pulitika at hindi magdulot ng pagkakawatak-watak. – Sa panulat ni John Riz Calata

Tikom ang bibig ni Senador Imee Marcos hinggil sa nagpapatuloy na political tension sa pagitan ng kanyang kapatid na si Pangulong Ferdinand Marcos Jr. at kaibigan na si Vice President Sara Duterte.

Sa panayam ng DWIZ, iginiit ng senador na mas makabubuting hindi na lamang siyang magsalita upang hindi na makadagdag pa nasabing gulo.

Isa anya ito sa mga dahilan kung bakit siya nagdesisyon na hindi makapag-alyansa kung kanino man sa kanyang muling pagtakbo sa 2025.

Humiling din ng dasal sa publiko ang senador para sa ikaayos ng dalawang matataas na lider ng bansa. –  Sa panulat ni Kat Gonzales

 Nagpaabot ng mensahe si Vice President Sara Duterte sa mga tumutulong sa Office of the Vice President.

 Ito’y sa gitna ng aniya’y krisis sa kanyang tanggapan.

 Kaugnay nito, nagpasalamat si VP Sara sa mga abogado, doktor at iba pang propesyonal na tumutulong sa OVP.

 Sinabi rin ng Bise Presidente na sa kabila ng mga hamon, mananatili silang matatag para serbisyuhan ang mga Pilipino.

Sisilbihan din ng subpoena ng National Bureau of Investigation ang mga dumalo sa zoom press conference ni Vice President Sara Duterte.

Ito ang kinumpirma ni NBI Director Jaime Santiago, kung saan hindi aniya bababa sa 10 ang kanilang iimbitahan sa gagawing imbestigasyon.

Karamihan dito ay kawani ng media, partikular ang mga nakita na nagtanong o may naging partisipasyon sa zoom conference.

Samantala, pinagbigyan naman ng NBI ang hiling ng pangalawang pangulo na i-reschedule ang kanyang pagharap sa ahensya, na itinakda sa Disyembre 11.

Kinumpirma mismo ni Pangulong Ferdinand Marcos jr., na sa kanya galing ang kumalat na text messages kung saan inihihirit niya sa kongreso na huwag nang maghain ng impeachment complaint laban kay Vice President Sara Duterte.

Sa isang ambush interview sa Quezon, sinabi ni PBBM na dapat ay isang pribadong komunikasyon lamang iyon ngunit wala na aniya siyang magagawa dahil kumalat na ito, at ito rin ang kanyang opinyon sa nasabing usapin.

Binigyang-diin pa ng Pangulo, na distraction lamang ito at walang maitutulong na mabuti sa buhay ng mga Pilipino.

Giit pa ng presidente, masyadong mabusisi ang impeachment at uubusin lamang nito ang oras ng kamara at senado.

Samantala, ‘never say never’ naman ang naging sagot ng Pangulo sa tanong ng media kung magkakabati pa sila ni VP Sara o hindi na. – Sa ulat ni Gilbert Perdez (Patrol 13)