NATIONAL NEWS

Nakapasa ang nasa kabuuang bilang na 3,962 examinees sa 2024 Bar examinations.

Ayon sa Korte Suprema, ito ay 37.84% mula sa kabuuang bilang ng kumuha ng nasabing pagsusulit.

Dagdag pa nito, mas mataas ang nakapasa ngayong taon kumpara noong 2023 na mayroong 3,812 na nakapasa.

Nanguna naman sa bar exams ang University of the Philippines College of Law student na si Kyle Christian Tutor na may rating na 85.77%.

Matatandaang naganap ang bar examinations noong September 8, September 11, at September 15. - sa panulat ni Alyssa Quevedo

Aabot sa tatlong milyong pasahero ang inaasahan ng Parañaque Integrated Terminal Exchange o PITX na dadagsa sa kanilang terminal ngayong holiday season simula December 20 hanggang January 6 sa susunod na taon.

Ayon kay PITX Corporate Affairs Officer Kolyn Calbasa, mas mataas ang bilang na ito kumpara noong nakaraang taon na mayroong 2.6 million lamang.

Kasama aniya sa kanilang paghahanda ang pagsasailalim sa mga driver at sasakyan sa pagsusuri upang matiyak ang kaligtasan ng mga pasahero. - sa panulat ni Alyssa Quevedo

Iginiit ni DSWD Secretary Rex Gatchalian na tanging ang kagawaran lamang ang magpapatupad ng AKAP o ang Ayuda para sa Kapos ang Kita Program.

Ginawa ni Secretary Gatchalian ang pahayag matapos ibalik ng kongreso ang budget para sa programa at sinundan ng mga pambabatikos mula sa publiko na nagsasabing ang Tingog Party-list ang nasa likod ng pamamahagi ng pondo ng AKAP.

Binigyang-diin ng kagawaran na ang buong P26-B na pondo ay pangangasiwaan ng DSWD at hindi nang kung sinumang pulitiko.

Lahat din anila ng benepisyaryo ay dumaraan sa assessment at iniisa-isa ng social workers ng DSWD bago makatanggap ng ayuda kaya’t wala itong impluwensya mula sa mga opisyal ng pamahalaan. - sa panulat ni Laica Cuevas

Palalawigin pa ng Department of Agriculture ang Kadiwa ng Pangulo kiosks sa ilalim ng Rice-for-All Program sa mas maraming lungsod at bayan sa buong bansa.

Ayon kay Agriculture Secretary Francisco Tiu-Laurel Jr., ito ay bilang pagkamit sa mithiin ni Pangulong Ferdinand Marcos Jr. na mas murang bigas para sa mga Pilipino.

Nag-o-operate ang KNP kiosks sa mga train station tuwing Martes hanggang Sabado, mula alas-tres ng hapon hanggang alas-otso ng gabi o hanggang maubos ang supply.

Habang bukas naman ang Kadiwa ng Pangulo sa mga pampublikong pamilihan mula alas-otso ng umaga hanggang alas-singko ng hapon.

Unang inilunsad ang Rice-for-All Program noong Agosto sa mga piling Kadiwa stores at pinalawig sa Metro Manila nitong unang bahagi ng buwan lamang dahil nananatiling mahal ang presyo ng bigas sa kabila ng pag-aangkat at mas pinababa nitong taripa. - sa panulat ni Laica Cuevas

Tiniyak ng Philippine Health Insurance Corporation na mayroon itong sapat na pondo para sa operasyon at benepisyo ng mga miyembro nito para sa susunod na taon.

Gayunpaman, sinabi ni PhilHealth Spokesperson, Dr. Israel Francis Pargas, na susulat sila kay Pangulong Ferdinand Marcos Jr. para hilingin na pag-aralan ang posibleng epekto ng pagbabawas sa kanilang subsidiya.

Sigurado aniya na maaapektuhan sa 2026 ang administrative expenses ng ahensya dahil naka-depende ito sa social premium contribution.

Una nang dinepensahan ng mga mambabatas ang pagtapyas sa pondo ng PhilHealth dahil hindi naman anila nito ginagamit ang P600-B na reserve funds. - sa panulat ni Laica Cuevas

Malabong makaranas ng water crisis ang mga customer ng Maynilad at Manila Water sa susunod na taon.

Ito ang tiniyak ng Metropolitan Waterworks and Sewerage System-Regulatory Office matapos aprubahan ang ikatlong bugso ng dagdag singil ng dalawang concessionaire simula Enero a – uno.

Ipinaliwanag ni MWSS-RO Chief Regulator Patrick Ty na bunsod ito ng bilyun-bilyong pisong kapital na ginastos ng mga konsesyonaryo upang masiguro ang maaasahan at mas maayos na serbisyo sa kanilang franchise areas.

Ayon kay Ty, gumastos na ang manila water ng 32.6 billion pesos at maynilad ng 47.5 billion pesos para sa taong 2023 hanggang 2024 bilang bahagi ng kanilang Capital Expenditure (CAPEX).

Ito, anya, ay para sa service continuity, service accessibility, water security, environmental sustainability projects, water sources programs, operations support programs, sewerage, programs at iba pang proyekto.

Hindi umano maaaring gamitin ni Vice President Sara Duterte ang kanyang mandato upang pigilan ang impeachment process laban sa kanya.

Ito, ayon sa Commission on Elections, ay kahit pa umani ng tatlumpu’t dalawang milyong boto ang pangalawang pangulo noong 2022 elections.

Ipinaliwanag ni COMELEC Chairman George Garcia na kahit pangulo ay maaaring ma-subject sa tinatawag na impeachment.

Hindi naman anya nangangahulugan ang impeachment na mapapatalsik sa posisyon ang isang opisyal dahil kailangan pang sumailalim ito sa paglilitis ng senado.

Pero kung mapapatunayang guilty, ipinunto ni Garcia na maaaring matanggal sa pwesto ang Bise Presidente at harapin ang iba pang criminal complaints.

Makailang ulit nang tinanggihan ni Duterte ang panawagang magbitiw sa pwesto sa gitna ng imbestigasyon sa sinasabing iregularidad sa paggamit sa daan-daang milyong pisong confidential funds noong 2022 at 2023.

Ikinalungkot ni Education Secretary Sonny Angara sa pagbawas sa budget ng DEPED sa susunod na taon.

Ayon kay Secretary Angara, taliwas ito sa kadalasang ginagawa ng kongreso na ibinibigay sa kanilang departamento ang pinakamalaking pondo.

Ang binawasan anya sa kanilang proposed budget ay ang computerization program ng departmento kung saan popondohan sana ang libu-libong computer at gadgets sa mga pampublikong paaralan.

Nabatid na mula sa 748.65 billion pesos budget na inaprubahan ng kamara, bumaba ang pondo ng DEPED sa 737 billion pesos.

Itinanggi ng Department of Social Welfare and Development ang mga alegasyong isang uri ng pork barrel ang 26 billion pesos na Ayuda para sa Kapos ang Kita Program o AKAP funds.

Ipinaliwanag ni DSWD Secretary Rex Gatchalian na hindi naman mapupunta sa mga mambabatas ang akap funds kundi mismong sa kagawaran.

Layunin ng akap, na isang financial assistance program, na tulungan ang mga minimum-wage earner na apektado ng inflation at hindi saklaw ng iba pang programa ng  DSWD.

Una nang ibinunyag ni Senator Imee Marcos na insertion ang akap fund na hindi isinama sa proposed spending plan ng kanyang kapatid na si Pangulong Bongbong Marcos.