NATIONAL NEWS

Hinamon ni Vice President Sara Duterte ang mga mambabatas na  imbestigahan din ang  confidential at intelligence fund ng Office of the President noong 2023.

Ito ang sinabi ni VP Sara kasunod ng ulat ng  commission on audit na nanguna sa paggasta ang tanggapan ni Pangulong Ferdnand Marcos Jr.

Ayon pa sa Bise Presidente, kung pakay talaga ng kamara sa pagbusisi sa pondo ng kanyang tanggapan na makabuo ng batas hinggil sa confidential funds dapat ay imbestigahan lahat maging ang tanggapan ng Pangulo.

Matatandaang inihayag ng COA na  top spender ang OP pagdating sa confidential and intelligence funds noong nakaraang taon na tinatayang nasa halos 5 billion pesos. –  Sa panulat ni Jeraline Doinog

Kinukonsidera ni Senate Blue Ribbon Committee Chairperson Pia Cayetano na kwestiyunin ang Korte Suprema kaugnay sa hindi pagbibigay ng subsidy funds sa PhilHealth para sa 2025.

Binigyang-diin ni Senador Cayetano sa DWIZ na isa itong paglabag sa sin tax law.

Aminado din ang mambabatas na hindi nama-manage nang maayos ang pondo ng PhilHealth. –  Sa panulat ni John Riz Calata

Dumepensa ang Philhealth sa social media post ni Dr. Tony Leachon, na nagsasabing gumamit ng 138 million pesos ang kanilang ahensiya para sa Christmas party.

Paglilinaw ng Philhealth, ang nasabing halaga ay gagamitin sa kanilang anibersaryo sa susunod na taon.

Binigyang diin pa ng ahensiya na, misinformed si Dr. Leachon kaugnay sa nasabing budget at sinabing tumatalima sila sa kautusan ng malacañang na iwasan magagarbong christmas party.

Mababatid na nauna nang hinikayat ni Pangulong Ferdinand Marcos Jr. ang mga ahensya ng gobyerno na iwasan ang mga bonggang christmas party ngayong taon.

Hindi na matutuloy ang pagbisita ng pamilya ni Mary Jane Veloso sa Indonesia.

Ito ayon sa Department of Foreign Affairs Office of the Undersecretary for Migration Affairs, ay dahil nakatakda na ngayong araw ang pagbiyahe ni Mary Jane papuntang Jakarta para sa pagsisimula ng proseso ng kanyang pag-uwi sa Pilipinas.

Dagdag pa ng DFA, alinsunod ito sa utos ng ng Indonesian Ministry for Law, Human Rights, Immigration and Corrections.

Sinabi naman ng pamilya Veloso, bagama’t nanghihinayang sila dahil hindi matutuloy ang kanilang pagbisita mula December 16 hanggang December 18, ay masayanaman sila dahil nalalapit na ang pag-uwi ni Mary Jane.

Sa kasalukuyan, wala pang eksaktong petsa kung kailan makakabalik ng Pilipinas si Mary Jane.

Sanib-pwersa na ang Presidential Anti-Organized Crime Commission at Department of Social Welfare and Development para tugunan ang pangangailangan ng mahigit dalawampung anak ng mga dating empleyado ng Philippine Offshore Gaming Operator o POGO.

Ayon kay PAOCC Executive Director Gilbert Cruz, sa ngayon ay mayroong 24 na POGO babies ang kanilang sinusuportahan kabilang ang pagsagot sa hospitalization ng mga ito kung kinakailangan.

Nasa kustodiya ng ahensya ang nasa 400 foreign nationals na dating empleyado ng mga POGO at hanggang nitong buwan lamang ay naipa-deport nila ang 250 iba pa.

Matatandaang ipinag-utos ni Pangulong Ferdinand Marcos Jr. ang total POGO ban hanggang sa pagtatapos ng taon sa kanyang ikatlong state of the nation address noong Hulyo.

Umaasa pa rin ang Makabayan Bloc na matatalakay pa ang mga inihaing impeachment complaint laban kay Vice President Sara Duterte.

Ito ay kahit pa mayroon na lamang tatlong araw ang kongreso bago mag-adjourn para sa holiday season.

Ayon kay ACT Teachers Partylist Representative France Castro, naghihintay pa ang ibang mambabatas ng development at instruction mula sa kanilang party leaders, dahil inaasahan pa ang paghahain ng ikatlong complaint bago mag-adjourn ang sesyon.

Una nang kinumpirma ni House Secretary Reginald Velasco na hindi pa naipapadala ang kasalukuyang dalawang impeachment complaint sa Office of the Speaker dahil inaasahan pa ang paghahain ng reklamo ng ibang sektor.

Sa kabila naman ng pagkagipit sa oras, tiwala si Congresswoman Castro na kung susubukan ng mga kongresista, madali na lamang ang pagtalakay sa impeachment laban kay VP Sara. – Sa panualt ni Laica Cuevas

Iginiit ni Senate Committee on Public Order and Dangerous Drugs Chairman Ronald Dela Rosa na panggigipit lamang sa mga Duterte ang imbestigasyon ng Quad Committee ng Kamara.

Kasunod ito ng pahayag ni House Quadcomm Vice Chairman at Antipolo Representative Romeo Acop na si dating pangulong Rodrigo Duterte ang nasa likod ng mga sindikato kabilang na ang iligal na droga.

Binigyang-diin ni Senador Dela Rosa na hindi ‘in aid of legislation’ ang imbestigasyon kundi ‘in aid of persecution.’

Ipinunto rin ng Senador na sumakay na si Congressman Acop sa oposisyon kaya’t hindi lamang siya dismayado kundi galit sa kongresista.

Nanindigan si Vice President Sara Duterte na hindi niya kailangang ipaliwanag kung paano ginasta ang confidential funds ng Office of the Vice President at Department of Education.

Ayon kay VP Sara, sasagot lamang siya sa mga katanungan ng Commission on Audit at iginiit na hindi mandato ng kamara na tanungin kung paano niya ginamit ang nasabing pondo.

Tumanggi rin ang Pangalawang Pangulo na ipaliwanag ang mahigit 400 mga pangalan na nakita sa acknowledgment receipts ng kanyang confidential funds, na nabatid ay wala sa National Registry ng Philippine Statistics Authority.

Ipinunto ng Bise-Presidente na kung magsasalita siya ukol sa nasabing pondo, masasangkalan dito ang intelligence operations na aniya ay isang paglabag sa batas.

Mayorya ng mga Pilipino ang bumuti ang buhay kumpara noong kasagsagan ng COVID-19 pandemic.

Sa resulta ng survey na ginawa ng market research company na IPSOS, 49% ng mga Pilipino ang nagsabing bumuti ang kanilang financial situation kumpara noong unang bahagi ng 2020.

Sa nabanggit na bilang, 17% ang nagsabi na “much better off,” ang kanilang pamumuhay habang 32% naman ang nagsabi na “little better off.”

Kaugnay nito, 17% rin ng mga Pilipino ang nagsabing naging “a little worse off” ang kabilang pamumuhay matapos ang pandemya, 7% ang nagsabing “much worse off” at 25% ang nagsabi na hindi bumuti ngunit hindi rin naman lumala ang kanilang katayuan.

Sinabi ng IPSOS na lumagpas sa global average ang optimistic outlook ng pilipinas na itinakda sa 37%.

Tatlong weather systems ang kasalukuyang nakakaapekto sa iba’t ibang bahagi ng bansa.

Ayon sa PAGASA, mayroong posibilidad na magkaroon ng bagyo bago sumapit ang pasko.

Batay sa forecast ng weather bureau, maaaring mabuo ang tropical cyclone-like vortex mula December 20 hanggang December 26.

Mino-monitor din ng pagasa ang isang vortex mula sa hilaga-silangang bahagi ng Philippine Area of Responsibility na may tsansang maging isang cyclone pagdating ng December 19.