NATIONAL NEWS

Dinepensahan ni Pangulong Ferdinand Marcos Jr., ang desisyon ng Bicameral Conference Committee na tanggalan ng subsidiya ang Philippine Health Insurance Corporation sa panukalang 2025 national budget.

Sa isang ambush interview sa Malacañang, sinabi mismo ni Pangulong Marcos na mayroon itong 500 bilyong pisong reserbang pondo na sapat para sa pagpapatupad ng kanilang serbisyo.

Iginiit pa ni PBBM na ang serbisyo na kailangang pondohan ng philhealth sa loob ng isang taon ay hindi  lalagpas sa 100 bilyong piso.

Dagdag pa ng Presidente, ang subsidiya ng pamahalaan sa PhilHealth ay nati-tengga lamang sa bank account nito at hindi magagamit sa dapat nitong paggamitan.

Binigyang diin pa ni PBBM na hindi pondo ang problema ng ahensya kundi ang sistema. –  Sa panulat ni Gilbert Perdez (Patrol 13)

Nakatakdang ipamahagi ng Department of Education  ang P20,000 Service Recognition Incentive para sa mga teaching at non-teaching personnel simula sa Biyernes, Disyembre a-25.

Alinsunod ito sa utos ni Pangulong Ferdinand Marcos Jr. nagkaisa sina Education Secretary Sonny Angara at Budget and Management Secretary Amenah Pangandaman upang maisakatuparan ang 20,000 pesos SRI para sa taong 2024.

Matapos na maglabas ng administrative order no. 27 mula sa Office of the President, sinimulan na ng DEPED ang pagproseso ng mga kinakailangang dokumento para sa pagbibigay ng SRI 2024.

Laking pasasalamat naman ni education Secretary Sonny Angara kay Pangulong Marcos Jr. at Budget Secretary Pangandaman para sa pagtiyak na maibigay ang buong SRI sa mga guro at non-teaching personnel bilang pagkilala sa kanilang walang sawang dedikasyon sa basic education.

Posibleng palayain ngayong kapaskohan ang mahagit siyam na libong Person Deprived of Liberty sa ilalim ng bagong implementing rules and regulation ng revised penal code.

Ito’y matapos pirmahan ng Department of Justice at Department of the Interior and Local Government, ang naturang Implementing Rules and Regulations (IRR) na magbubusisi sa profile ng mga bilanggo na inaasahang magagawaran ng parole o maagang paglaya.

Sakop ng bagong IRR ang pag-papa-igsi sa sentensya ng mga pdl sa ilalim ng good conduct time allowance.

Ayon kay BUCOR Dir. Gen. Gregorio Catapang Jr., ang revised IRR ang magbibigay ng pagasa sa mga bilanggo dahil sa kabutihan na kanilang ipinakita sa loob ng piitan.

Una nang inihayag ni Justice Undersecretary Raul Vasquez, na walong libong pdls ang palalayain mula sa Bureau of Corrections habang isang libo naman ay magmumula sa Bureau of Jail Management and Penology.

Sa kasalukuyan, pumalo na 350% ang nabawas sa jail congestion sa buong bansa mula nang maupo sa puwesto si Pangulong Ferdinand Marcos Jr. dahil sa mga programang ipinatupad ng pamahalaan. –  Sa panulat ni Kat Gonzales mula sa ulat ni Geli Mendez (Patrol 30)

Nailipat na sa Jakarta, Indonesia si Mary Jane Veloso para masimulan na ang pag proseso nang pagpapabalik nito sa bansa.

Ipinabatid ito ni Celia Veloso, ina ni Mary Jane matapos dalhin sa isang pasilidad sa Jakarta ang Pinay mula sa Yogjakarta na siya rin aniyang dahilan kaya’t nakansela ang biyahe nilang pamilya pa Indonesia para saana bisitahin ang anak.

Sinabi ni ginang Veloso na hihintayin na lamang nila dito sa Pilipinas ang kanyang anak.

Natutuwa at excited aniya ang buong pamilya sa pag uwi ni Mary Jane na halos 14 na taong nakulong sa Indonesia.

Lilipad sana pa Indonesia kahapon ang pamilya Veloso, kanilang abogado at ilang opisyal ng gobyerno para bisitahin ang Pinay bago ang kanyang pag-uwi ng Pilipinas.

Bukas si 2024 Miss Universe Asia Chelsea Manalo sa pagpasok sa showbiz.

Ayon kay Chelsea, maraming bumukas na pintuan sa kanya matapos tanghalin bilang kauna-unahang Miss Universe Asia kung saan kabilang na rito ang showbiz; hosting; modeling sa ibang bansa; theater; singer at iba pa.

Gayunman, gusto anya niyang ipagpatuloy ang pakikipagtrabaho sa Miss Universe Philippines Organization dahil ang adbokasiya nito ay malapit sa kanyang puso. –  Sa panulat ni Alyssa Quevedo

Inaasahan na sa susunod na tatlong buwan mabubuo ang La Niña.

Gayunman, batay sa latest forecast ng United Nations Weather Agency, inaasahang magiging mahina at panandalian lamang ang pagpasok ng La Niña.

Ayon kay World Meteorological Organization (WMO) Secretary General Celeste Saulo, 55% ang posibilidad na mabuo ang La Niña conditions ngayong buwan ng Disyembre hanggang Pebrero 2025.

Paliwanag ng Kalihim, ang nabuong El Niño ngayong taong ay  may pinakamainit na temperatura, ngunit hindi naman sapat ang pagpasok ng tag-lamig upang mabalanse ang epekto ng heat-trapping greenhouse gases. –  Sa panulat ni Jeraline Doinog

Umaasa si Education Secretary Sonny Angara na tutugunan ni Pangulong Ferdinand Marcos Jr. ang pagkaltas ng 12 bilyong piso na budget ng Department of Education (DEPED) para sa taong 2025.

Iginiit ni Secretary Angara ang kahalagahan sa pag-prayoridad sa pagpopondo para sa edukasyon.

Nalulungkot anya siya na hindi naulit sa 2025 budget ang pagtaas ng kongreso sa budget ng DEPED nuong mga nakaraang taon.

Dagdag pa ng kalihim na si Pangulong Marcos mismo ang nagsabi sa kanila na aayusin nito ang nasabing budget. –  Sa panulat ni Alyssa Quevedo

Tiniyak ni Social Welfare Secretary Rex Gatchalian sa publiko na hindi mapapasakamay nang sinumang pulitiko ang pagpapatupad ng Ayuda para sa Kapos ang Kita Program o ang AKAP na may 26 billion pesos na pondo sa ilalim ng 2025 national budget.

Ayon sa Kalihim, hindi kailangan ng mga posibleng benepisyaryo ng programa ang anumang request mula sa opisyal ng pamahalaan.

Tanging DSWD lamang aniya ang magpapatupad sa programa at bawat mapipiling benepisyaryo ay daraan sa assessment ng social workers ng kagawaran.

Ginawa ni Secretary Gatchalian ang paglilinaw matapos maibalik ang nasabing pondo sa Bicameral Conference Committee sa kabila ng magkaibang opinyon dito ng kamara at senado. – Sa panulat ni Laica Cuevas