NATIONAL NEWS

Sinegundahan ni Senate Committe on Finance Chairperson Grace Poe ang pahayag ni Senate President Francis Escudero na kapangyarihan ng Pangulo na suriin ang 2025 national budget  bill at magpasya kung ito ay aapruban o i ve-veto.

Ito ay matapos ang desisyon ng Malacañang na ipagpaliban ang nakatakdang paglagda ni Pangulong Ferdinand Marcos Jr. sa budget, bukas, Disyembre a-20.

Ayon sa Senador, kailangang suportahan ang checks and balances sa budgetary process, na isa ring tanda ng demokrasya ng bansa.

Tiwala naman si Senador Poe na makakatanggap si Pangulong Marcos ng mga tamang payo ukol sa budget mula sa kanyang mga mahuhusay na economic managers. – Sa panulat ni Laica Cuevas

Binigyang-diin ni Senate President Francis Escudero na karapatan ng Malacañang na repasuhin at pag-aralan ang nilalaman ng ipinasang 2025 national budget ng kongreso bago ito lagdaan ni Pangulong Ferdinand Marcos Jr.

Ayon kay SP Escudero, karapatan ng Pangulo na magsagawa ng line item vetoes sa budget at bahagi ito ng legislative process at ng sistema ng checks and balances na nakasaad sa konstitusyon.

Kailangan talaga aniya ng sapat na panahon para marepaso ang panukalang budget dahil sa kumplikado at maraming detalye na nakapaloob dito.

Tiwala naman ang Lider ng Senado na malalagdaan ng pangulo ang 2025 General Appropriations Bill bago matapos ang taon kaya hindi magiging reenacted ang budget sa pagpasok ng 2025. –  Sa panulat ni Laica Cuevas

Nanawagan si Mary Jane Veloso kay Pangulong Ferdinand Marcos Jr. ng clemency partikular na ang absolute pardon o tuluyang kalayaan.

Ito’y matapos makabalik sa Pilipinas si Veloso kasunod ng pagkakakulong ng labing apat na taon sa Indonesia.

Ayon kay Veloso, masaya siyang nakauwi na siya sa bansa ngunit ang tanging hiling lamang niya kay Pangulong Marcos ay burahin ang kanyang criminal liablity sa kasalanang hindi naman niya ginawa.

Kaugnay nito, sumailalim na sa medical procedure ang OFW matapos dumating sa Correctional Institution for Women sa Mandaluyong at mananatili roon sa loob ng 60 araw.

Matatandaang inaresto si Veloso sa yogyakarta noong 2010 matapos mahulihan ng 2.6 kilo ng heroin at nahatulan ng parusang kamatayan. –  Sa panulat ni Laica Cuevas

Nakatakda nang magbenta ang Department of Agriculture ng mas malusog at mas murang bigas na tinatawag na “Sulit” at  “Nutri” Rice sa 2025.

Ito ayon kay Agriculture Secretary Francisco Tiu Laurel Jr. ay mabibili sa Kadiwa ng Pangulo Stores upang mabenepisyuhan ang mas maraming Pilipino.

Ang “Sulit” Rice, ay ibebenta sa 35 hanggang 36 pesos kada kilo, habang ang “Nutri” Rice ay mabibili sa t36 hanggang 37 pesos kada kilo.

Sisimulan ng DA ang pagbebenta ng  “Sulit Rice” sa Enero; habang ang “Nutri Rice” ay ibebenta sa kalagitnaan ng 2025. –  Sa panulat ni John Riz Calata

Ipagpapatuloy sa Pilipinas ang naging hatol ng indonesian government sa Overseas Filipino Worker na si Mary Jane Veloso.

Ito mismo kinumpirma ng Department of Justice matapos na mapauwi sa Pilipinas si Veloso mula sa Indonesia.

Ayon kay Justice Undersecretary Raul Vasquez, masusi pang pinag-aaralan ng pamahalaan ang pagbibigay ng executive clemency sa nasabing OFW.

Gayunman, nasa kamay na anya mismo ni Pangulong Ferdinand Marcos Jr. kung ipagkakaloob kay Veloso ang clemency o tuluyang pagpapalaya.

Idinagdag pa ng DOJ, na life imprisonment ang isisilbi kay veloso sa nasabing piitan dahil ang tanging nawala lamang sa kanya ay yung ipinataw na death penalty sa Indonesia.

Ito rin anya ang napagkasunduan sa pagitan ng indonesia at Pilipinas.

Kaugnay nito, ordinaryong Persons Deprived Liberty ang ituturing sa nasabing ofw sa loob ng kulungan. –  Sa panulat ni Kat Gonzales

Inamin ng Department of Agriculture na posibleng pumalo sa record high na 4.7 million metric tons ang volume ng rice import sa bansa sa pagtatapos ng taon.

Sa tala ng Bureau of Plant Industry, hanggang noong Disyembre a-dose, nasa 4.48 million metric tons na ang kabuuang dami ng bigas na dumating sa bansa.

Kaugnay nito, iginiit ni ni DA Spokesperson Assistant Secretary Arnel De Mesa, na tama lang ang nasabing supply dahil ito ang naging tugon ng pamahalaan sa epekto ng magkakasunod na kalamidad na nakaapekto sa rice sector at lokal na produksyon sa bansa.

Makatutulong any ang rice import para mapanatiling sapat ang suplay ng bigas sa bansa hanggang sa susunod na anihan. –  Sa panulat ni  Kat Gonzales

Pinahohold ng Commission on Audit ang sahod ng ilang mga opisyal ng Department of Education na nabigong i-liquidate ang cash advances na nagkakahalaga ng 6.96 billion pesos.

Kabilang sa mga major deficiencies na nakita ng komisyon ang pagbibigay ng cash advances nang walang tamang pahintulot; paglilipat ng pondo sa pagitan ng mga accountable officers at pagbabayad ng mga gastusin tulad ng service recognition incentives  sa pamamagitan ng cash advances sa halip na direktang pagbabayad.

Batay sa datos ng COA, ang mga rehiyon na may pinakamataas na unliquidated balances ay ang DEPED-Central Visayas na nagkakahalaga ng 1.31 billion pesos at sinundan ito ng DEPED-Eastern Visayas na mayroong 1.01 billion pesos na unliquidated balance.

Dahil dito, naglatag ang COA ng ilang kondisyon upang masolusyonan ang nasabing usapan.

Kabilang sa mga iminungkahing kondisyon ng COA ang pagpapatigil ng pagbibigay ng bagong cash advances sa mga opisyal na may natitirang balanse; paglabas ng demand letters sa mga aktibong empleyado at i-hold ang mga sahod ng mga delinquent accountable officers hanggang sa mabayaran ang kanilang mga obligasyon.

Nabatid na ang ilang sangkot na opisyal ay mga accountable officers na nagretiro na, nagbitiw na, nag-awol at lumipat na ng trabaho.

Dapat na magsilbing wake up call para sa lahat ang matagumpay na pagpapauwi sa bansa kay Mary Jane Veloso para pagtuunan din ng pansin ang iba pang OFW na mayroong kahalintulad na sitwasyon ni Veloso.

Ito ayon kay Senate President Chiz Escudero makaraang igiit na umaasa siya na ang repatriation ni Veloso ay una lamang sa napakaraming pinoy abroad na nahaharap sa kaparehong sitwasyon.

Ipinapakita anya ng nangyari kay Veloso ang  pagkalinga ng pangulo at ng kanyang administrasyon  sa mga OFW na nasa ibat ibang bansa.

Kasunod nito, nanawagan ang Senate President sa Deptartment of Foreign Affairs na magsagawa ng imbentaryo at accounting ng mga nakakulong na Pilipino sa ibang bansa, upang alamin anong klase ng kaso ang kinakaharap ng mga ito at ano ang maaring gawin para sila ay matulungan na makalaya.

Samantala, iminungkahi ni SP Escudero na pag-aralan at isulong ang tratado hinggil sa prisoner swap para dito na lang isilbi sa bansa ang sentensya ng mga OFW na nahatulan sa kanilang kaso abroad. –  Sa panulat ni Kat Gonzales