NATIONAL NEWS

Iginiit mismo ni Pangulong Ferdinand Marcos Jr., na masyado pang maaga para pag-usapan ang pagbibigay ng clemency o pardon kay Mary Jane Veloso, ang pilipinang nakulong sa indonesia dahil sa drug trafficking charges.

Sa isang ambush interview sa Pasay City, sinabi ni PBBM na patuloy na pinag-aaralan ng pamahalaan ang kaso ni Veloso.

Gayunman, sinabi ng Pangulo na ang desisyon ay nakasalalay pa rin sa judgement ng mga legal expert kung angkop ito para sa nasabing pinay.

Dagdag pa ng Presidente, walang inilatag na kondisyon ang indonesia upang mapauwi sa bansa si Veloso, kaya’t nasa kamay na ng pamahalaan ang desisyon.

Magkakasa ng mas malalim at patas na imbestigasyon ang mababang kapulungan ng kongreso sa susunod na taon.

Ito’y para alamin kung paano pinangangasiwaan ng philhealth ang kanilang pondo; mahanapan ng solusyon; at hindi ito maisisi sa sinuman.

Sa pagtatapos ng sesyon sa planaryo ng kamara,  sinabi ni House Speaker Martin Romualdez, na malinaw ang adhikain ng pamahalaan na masigurong ang bawat piso ay nagagamit para sa kapakinabangan ng mga miyembro ng PhilHealth.

Ipunto ni Romualdez, na kapag lumabas sa imbestigasyon na underutilized o sobra ang pondo ng state insurer, kanilang isusulong ang pagpapalawak sa benepisyo para sa mga pilipino hanggang sa makamit ang target na zero billing sa lahat ng ospital.

Ipasususpinde rin ng Kamara ang paniningil ng premium payments sa philhealth sa loob ng isang taon kung kakayanin ng kapasidad na maghatid ng serbisyo sa mga miyembro nito.

Bukod pa dito, target ding ibaba ang premium contributions na layong pagaanin ang pasanin ng mga Pilipino na nabibigatan bunsod ng epekto ng inflation.

Iginiit ng mga lider ng Kamara na karapat-dapat lang na maramdaman ng mamamayan na handa ang PhilHealth lalo na sa panahon ng emergency healthcare sa halip na i-hoard o ipitin ang kanilang resources.

Inirekomenda ni Senator Ronald “Bato” Dela Rosa, na paiksiin ang pagpapatupad ng gunban bago ang nalalapit na 2025 national elections.

Kasunod ito ng panawagan ng Senador na maamyendahan ang Republic Act no. 10591 o Comprehensive Firearms and Ammunition Regulation Act na layong isulong ang pagiging responsable ng mga gun owner.

Sa eksklusibong panayam ng DWIZ, sinabi ni Sen. Dela Rosa, na dapat ibaba sa 45 araw mula sa anim na buwan ang pinaiiral na gunban sa buong bansa bago mag eleksiyon at limang araw na gunban naman pagkatapos ng mismong araw ng eleksiyon.

Ayon sa Senador, maraming Pilipino ang naaapektuhan ng iligal na gawain tuwing nalalapit na ang halalan kabilang na ang pagdadala ng baril at mga matutulis o mapanganib na armas.

 Tumaas ang bentahan ng mga paputok ngayong taon kumpara noong 2023.

Ito ayon kay Philippine Fireworks Association President Jovenson Ong, ay kahit pa bumaba ng 40% ang kita sa kanilang fireworks industry mula Enero hanggang Nobyembre.

Paliwanag ni Ong, biglang tumaas ang kanilang kinita nitong unang linggo ng Disyembre.

Kaugnay nito, sinabi ng PFA President na sila ay umaasa na mas makakabawi sila sa bentahan ng paputok at pailaw ngayong holiday season.  – Sa panulat ni John Riz Calata

Ibinasura ng Sandiganbayan ang natitirang anim pang kaso nina dating pangulong Ferdinand Marcos Sr., kanyang asawang si dating first lady Imelda Marcos at dating business tycoon Eduardo Cojuangco Jr. kaugnay sa kontrobersyal na paggamit ng coconut levy funds.

Sa 42 pahinang resolusyon, ibinasura ng second division ng anti-graft court ang mga kaso dahil sa kawalan ng ebidensya at mga testigo para imbestigahan ang kaso na inihain halos apat na dekada na ang nakararaan.

Dahil sa naturang desisyon, abswelto na ang mga Marcos sa isinampang kaso ng Presidential Commission on Good Government, na ipinresenta ng Office of the Solicitor General, para maibalik ang sinasbaing ill-gotten wealth ng mga ito.

Tumutukoy ang anim na kaso sa sinasabing paglikha ng mga kumpanya mula sa coco levy funds; pagbuo at operasyon ng bugsuk project at paggawad ng 998 million pesos bilang danyos sa mga mamumuhunan sa agrikultura; mga maling pagbili at settlement ng mga account ng oil mills; maling disbursement at dissipation ng coco levy funds; pagbili sa isang beverage company, at pagbibigay ng pautang at kontrata.   – Sa panulat ni Laica Cuevas

Nagkilos-protesta sina dating finance undersecretary Cielo Magno, iba’t ibang labor at medical groups at health advocates sa Mendiola, Maynila bilang pagtutol sa zero-subsidy ng PhilHealth sa ilalim ng 2025 national budget.

Ayon kay dating usec. Magno, bagama’t welcome sa kanila ang pahayag ni Executive Secretary Lucas Bersamin na iaantala muna ang pagpirma sa budget para pag-aralan ito, hindi na aniya dapat pang pag-isipan ang pagbibigay ng pondo sa PhilHealth kung talagang may pakialam ang gobyerno sa kapakanan ng mga Pilipino.

Iginiit ng dating opisyal na dapat lamang ay matiyak na para sa publiko ang pondo at hindi para sa mga pulitiko.

Matatandaang inulan ng pambabatikos ang kawalan ng subsidiya ng PhilHealth, pagtapyas sa pondo ng department of education, at pagpopondo naman sa Ayuda para sa Kapos ang Kita Program o AKAP ng Department of Social Welfare and Development na ngayo’y inihahalintulad sa ‘pork barrel’ scam. –  Sa panulat ni Laica Cuevas

Tinutulan ng Philhealth Board of Directors ang ilang collateral na nagkakahalaga ng 37.5 million pesos para sa ika-30 anibersaryo ng ahensya sa susunod na taon.

Ayon sa Department of Health, ginawa ang desisyon upang matipid ang pondo ng pamahalaan at matiyak ang tamang alokasyon para sa benepisyo ng mga miyembro ng PhilHealth.

Kabilang sa mga popondohan sa nasabing halaga ang payong, tote bags, anniversary at marketing shirts, jackets at button pins.

Sinabi ng DOH na nakarating sa PhilHealth Board of Directors ang proposal nitong lunes lamang at kaagad itong vineto.

Una nang itinanggi ng ahensya na gumastos ito ng 138 million pesos para sa kanilang Christmas party, dahil budget anila ito para sa buong taon at paggunita sa kanilang 30th anniversary sa 2025. –  Sa panulat ni Laica Cuevas

Nagbabala ang Commission on Elections sa mga kandidato para sa 2025 midterm elections na huwag gamitin sa pulitika ang ayuda mula sa pamahalaan.

Ayon kay COMELEC Chairman George Erwin Garcia, anumang pamamahagi ng suporta o tulong ay dapat pangasiwaan ng mga opisyal at kawani ng kinauukulang ahensya ng gobyerno nang walang bahid nang sinumang pulitiko.

Hindi rin aniya pinapayagan ang paglalagay ng campaign tarpaulins sa tanggapan ng implementing agencies sa loob ng 45-day election period.

Ipinagbabawal din ang distribusyon ng tulong sa ilalim ng Programang Assistance to Individuals in Crisis Situations ng DSWD, 10 araw bago ang eleksyon, maliban na lamang sa mga piling pagkakataon gaya ng pagbibigay ng pagkain, pamasahe, medical, educational, at burial assistances at iba pang kaparehong suporta.

Iginiit ng COMELEC na sinumang mapatutunayang lumabag sa direktibang ito ay maaring makulong o tuluyang ma-disqualify para sa 2025 midterm elections.

Dumipensa ang ilang kongresista ang Ayuda para sa Kapos ang Kita Program o AKAP ng DSWD o Department of Social Welfare and Development laban sa batikos ng mga kritisismo.

Ayon sa young guns ng kamara, hindi “pork barrel” ng mga mambabatas ang AKAP ng DSWD.

Iginiit ni House Assistant Majority Leader Jay Khonghun, na hindi dapat ituring na pork barrel ang akap na sinasabing maaaring magamit para sa 2025 midterm elections.

Sa naging pahayag naman ni House Deputy Speaker David Suarez, hindi dapat bigyang-malisya ang akap, na nakakatulong sa mga sektor na nasa “near poor” o “low income” ng mga manggagawa.

Sinabi naman ni House Committee on Appropriations Vice Chairman Jill Bongalon, na dumadaan sa “validation” ng dswd ang mga beneficiary ng AKAP.

Sa panukalang 2025 national budget, 26 billion pesos ang alokasyon para sa AKAP, kung saan 21 billion pesos ay para sa Kamara, at 5 billion pesos naman ay para sa Senado.  – Sa panulat ni Alyssa Quevedo