NATIONAL NEWS

Nakapagtala ng mahigit 1,000 kaso ng tuberculosis na-diagnose   sa Tondo, Maynila.

Ito’y matapos maglunsad ng tuberculosis project sa Tondo ang Doctors Without Borders, sa pakikipagtulungan ng Manila Health Department (MHD), upang tugunan ang mga hamon sa screening at paggamot ng TB pagkatapos ng COVID-19 pandemic.

Ayon sa grupo, nakapag-screen sila ng 29,291 katao at na-diagnose ang 1,280 na pasyente na may TB sa nasabing lugar.

Nagsimula namang magbigay ng mga gamot sa TB ang DWB para sa 141 na mga pasyente sa Tondo noong Agosto.

Batay sa 2024 Global TB Report ng World Health Organization, mayroong 739,000 katao sa bansa ang nagkasakit ng TB.

 Paalala sa mga magle-leche flan o anumang paghimagas na may halong itlog ngayong holiday season.

Dahil ayon sa Philippine Egg Board Association, asahan na ang pagtaas ng presyo ng itlog habang papalapit ang pasko at bagong taon.

Sa datos ng Department of Agriculture, nasa 6 pesos hanggang 8.25 pesos ang presyo ng extra small na itlog habang nasa siyam hanggang sampung piso ang jumbo o ang pinakamalaki.

Naglalaro naman ang kada tray ng itlog sa 210 hanggang 285 pesos depende sa sukat habang bahagya namang mas mahal ang presyo ng brown eggs.  – Sa panulat ni Laica Cuevas

Pinasimple na ng Department of Social Welfare and Development ang mga panuntunan nito para sa mga target beneficiaries sa ilalim ng Ayuda sa kapos ang Kita Program (AKAP) kabilang na ang low income at minimum wage earners.

Ayon kay DSWD Spokesperson at Assistant Secretary Irene Dumlao, nakasaad ang pinasimpleng guidelines ng akap sa memorandum circular no. 30 series of 2024 na nilagdaan ni DSWD Secretary Rex Gatchalian.

Sa ilalim nito ay ginawang mas inklusibo ang pagpapatupad ng programa upang masakop ang mga pilipinong bahagi ng formal at informal economy.

Dito ay pinadali ang documentary requirements para sa mas sistematikong proseso ng pagrepaso at pag-verify sa pagiging kwalipikado ng mga benepisyaryo ng programa.

Kabilang sa mga ibinibigay na tulong sa ilalim ng akap ang medical, funeral, food at cash assistance na direktang ibinibigay sa pamamagitan ng Crisis Intervention Units o sections sa Central at Field Offices ng DSWD at sa pamamagitan ng Social Welfare and Development at Satellite Offices nito sa buong bansa. – Sa panulat ni Laica Cuevas 

Gagastos ng mahigit 32 million pesos ang pamahalaan dahil sa pagkaantala ng halos kalahati ng mga flood control projects ng Metropolitan Manila Development Authority.

Batay sa 2023 report ng Commission on Audit, 22 proyekto na may pondong mahigit 510 million pesos ang hindi nakumpleto sa ilalim ng kontrata, dahilan para maantala ito ng 310 araw.

Babayaran ng gobyerno ang nasabing halaga, saklaw ng limang taon mula 2018 hanggang 2023, bilang commitment fees sa creditor banks.

Ang commitment fee ay isang non-refundable charge na ipinapataw ng mga nagpapautang sa mga nanghihiram na may hindi na-withdraw na balanse ng utang.

Kaugnay nito, 29 na proyekto rin na nagkakahalaga ng mahigit 371 million pesos ang hindi naipatupad dahil sa kanselasyon at kabiguang magsagawa ng maagang bidding para sa proyekto.  – Sa panulat ni Laica Cuevas

Ipinapaubaya na ni Senador Cristopher ‘Bong’ Go sa korte ang pagpapasya sakaling may ihaing kaso laban sa kanya.

Ito ay  matapos  ang rekomendasyon  ng House Quad Committee na kasuhan siya, si dating pangulong Rodrigo Duterte, Senador Ronald ‘Bato’ Dela Rosa at iba pang mga dating opisyal ng paglabag sa crimes against humanity.

Ayon kay Senador Go, noon pa sinasabi ni dating pangulo Duterte  na dalhin na lamang sa korte ang mga kaso sa halip na magsagawa ng serye ng  imbestigasyon ang QuadComm.

Kwestyunable pa aniya ang sinabi ng  QuadComm na huwag idamay ang mga walang kinalaman gayong ang rekomendasyon nito ay ’tila dala ng mga sabi-sabi at walang katibayan.  – Sa panulat ni Laica Cuevas mula sa ulat ni Cely Ortega-Bueno (Patrol 19)

Maihahalintulad sa pandemya ang kawalan ng alokasyon para sa kalusugan ng sambayanan sa ilalim ng 2025 national budget.

Ito ang iginiit ni Senator Imee Marcos, kasabay ng pahayag na mas maraming buhay ang nalalagay sa peligro, maraming nababagabag at nagkakasakit na nauuwi sa tiyak na kamatayan.

Tanong ngayon ni Senador Marcos sa mga kapwa-mambabatas kung wala nga bang nangyaring himala sa niratipikahang proposed national budget ng Bicameral Conference Committee.

Ito’y matapos alisin ng kongreso ang 74-billion peso subsidy ng Philippine Health Insurance Corporation (PhilHealth) para sa susunod na taon.

Idiniin ng Senador na kung kabuktutan ng mga namamahala sa PhilHealth ang problema’t dahilan ng pag-aalis ng budget nito, mali aniyang solusyon na parusahan ang mga naghihikahos na pasyente at i-zero ang mga nabubulok nang ospital.

Nang dahil aniya sa bilyones na alokasyon sa Medical Assistance for Indigent Program (MA-IP), ang mahihirap na pasyente ang nagdurusa at kinakailangan pang pumila at mistulang mamanikluhod sa ilang opisyal ng pamahalaan.

Aminado si Pangulong Ferdinand Marcos Jr. na mayroon silang mga nakitang isiningit sa budget request ng ilang departamento para sa susunod na taon.

Ayon kay Pangulong Marcos, ito ang dahilan kung bakit pinag-aaralan nilang mabuti ang 2025 General Approprications Act.

Ipinunto pa ni PBBM na walang tamang documentation ang ilang budget proposals at hindi maliwanag kung san mapupunta ang pera.

Binigyan-diin ng Presidente na kailangang busisiin itong mabuti dahil anya may parte sa nasabing pondo ang manggagaling sa utang kaya’t dapat mapunta ito sa tama at  masigurong makakabawi sa ginastos para mabayaran ang utang. –  Sa panulat ni Kat Gonzales

Mariing kinondena ng partido ni dating pangulong Rodrigo Duterte ang rekomendasyon ng House Quad Committee na kasuhan ang dating presidente dahil sa madugong kampanya nito kontra iligal na droga.

Ayon sa  partido ng Demokratiko Pilipino – Lakas ng Bayan (PDP Laban), malinaw na pamumulitika ang ginagawa ng QuadComm at wala itong ligal na basehan.

Ginipit din anila ang mga ipinatawag na resource person sa pagdinig ng Kamara, at pinagbantaang iko-contempt kung hindi sundin ang script ng QuadComm.

Binigyang-diin pa ng PDP-Laban na hindi dumaan sa ‘due process ang pagdinig at ‘bias’ laban sa dating pangulo tulad na lamang nang pagdidiin kay Vice President Sara Duterte kaugnay sa kwestyunableng pondo ng kanyang tanggapan. –  Sa panulat ni Laica Cuevas

Iginiit ni Pangulong Ferdinand Marcos Jr. na dapat masusing pag-aralan ang rekomendasyon ng House Quad Committee na sampahan ng kasong Crimes Against Humanity si dating pangulong Rodrigo Duterte.

Ayon kay Pangulong Marcos, Department of Justice ang mag-a-assess ng rekomendasyon, na nakabatay sa resulta ng pagdinig ng mga mambabatas.

Mula rito ay DOJ aniya ang inaasahang magsusuri kung anong mga kaso ang maaaring isampa at magtutuloy sa case build-up sa pamamagitan ng pangangalap ng sapat na ebidensya.

Idinagdag pa ng Pangulo na DOJ din ang magsisiguro kung naaayon sa tamang proseso at batayan ang direksyon ng rekomendasyon ng komite ng kamara.

Bukod kay dating pangulong Duterte, kasama rin sa mga pinasasampahan ng kaso sina Senador Ronald “Bato” Dela Rosa; Senador Christopher  “Bong” Go; dating PNP chiefs Oscar Albayalde; at Debold Sinas; dating police colonels Royina Garma at Edilberto Leonardo; at dating assistant secretary ng special assistant to the president Irmina “Muking” Espino. –  Sa panulat ni Laica Cuevas