NATIONAL NEWS

Nanawagan si Senate Minority Leader Aquilino “Koko” Pimentel III sa Department of Trade and Industry (DTI) na tiyaking tama ang presyo ng mga Noche Buena goods.

Binigyang-diin ni Sen. Pimentel na hindi dapat pagsamantalahan ng mga may-ari ng negosyo ang panahon ng Pasko para magtaas ng presyo sa iba’t ibang bilihin, kabilang ang keso, macaroni, spaghetti sauce, fruit cocktail, all-purpose cream, ham, at iba pang produktong Noche Buena.

Hinimok pa ni Pimentel ang DTI na pahusayin ang kanilang monitoring efforts laban sa mga kumpanyang sangkot sa manipulasyon ng presyo.

Ayon sa senador, hindi dapat makatakas sa pananagutan ang mga negosyong nag-iimbak ng mga stock o nagsasagawa ng pagtaas ng presyo—lalo na tuwing Pasko.

Gagamitin ng Department of Justice ang report ng quad Committee ng Kamara, para pagtibayin ang mga ebidensya at kaso laban sa mga dawit sa extrajudicial killings sa war on drugs campaign ni dating pangulong Rodrigo Duterte.

Ayon kay Justice Undersecretary Jesse Andres, bago pa man matapos ang Quad Comm Report ay bumuo na sila ng task force sa National Prosecution Service, upang tutukan ang imbestigasyon sa ejks at marami na silang nakalap na ebidensya.

Kaugnay nito, malaking tulong aniya ang imbestigasyon ng kamara lalo na ang pagpapatawag sa mahahalagang resource persons kung saan maraming naisiwalat at mga pag-amin na maaaring maging “self-incriminating.”

Nakikipagtulungan na rin aniya ang NBI at PNP upang mapalakas pa ang ebidensya.

Maaalalang inirekomenda na ng Quad Comm ang pagsasampa ng kasong Crimes Against Humanity laban kay dating pangulong Duterte at iba pang personalidad kaugnay ng EJKs at sinasabing reward system sa war on drugs. – Mula sa ulat ni gilbert Perdez (Patrol 13)

Pinaboran ng Pilipinas ang resolusyon ng united Nations General Assembly na nagbabawal sa parusang kamatayan sa buong mundo.

Kabilang ang Pilipinas sa 130 mga bansa na pumabor sa global moratorium sa death penalty; kung saan 32 ang kumontra, habang 22 iba pa ang nag-abstain.

Inihayag sa resolusyon ang matinding alalahanin patungkol sa pagpapataw ng parusang kamatayan at muling pinagtibay ang karapatan ng lahat ng mga bansa na bumuo ng sariling batas.

Nanawagan din ito sa lahat ng mga bansa na magtatag ng moratorium sa mga pagbitay, anuman ang kanilang mga sistemang pampulitika, pang-ekonomiya at kultura.

Ang Pilipinas ang unang bansa sa asya na nagpawalang-bisa ng parusang kamatayan sa ilalim ng 1987 constitution. - Sa panulat ni Laica Cuevas 

Naniniwala si Senator Imee Marcos na duda ang kapatid niyang si Pangulong Ferdinand Marcos Jr. sa laman ng niratipikahang budget ng Bicameral Conference Committee para sa susunod na taon.

Ito, anya, ang posibleng dahilan sa pagpapaliban ni pbbm na lagdaan ang panukalang pambansang budget, kung saan nawala ang mga prayoridad ng administrasyon.

Tahasan ding tinawag ni Super Ate na ‘very very bad’ at labag sa konstitusyon ang proposed 2025 national budget.

Muli ring umapela si Senador Marcos na ibalik ito sa bicam upang mabusising maigi at maalis ang mga areglo, imbes na idaan lamang sa veto power ng Pangulo.

Aminado rin ang mambabatas na kinakabahan siya sa tila mali-maling ipinapayo sa kanyang kapatid, kaya’t panawagan niya sa mga taga-palasyo na huwag ipahamak ang Presidente.

Alam naman aniya ni Executive Secretary Lucas Bersamin na nakasaad sa article 14, section 5 ng 1987 constitution na sa edukasyon dapat nakalaan ang pinakamataas na budget. –  Sa panulat ni john Riz Calata 

Kumpiyansa ang Samahang Industriya ng Agrikultura o grupong SINAG na makakabawi ang lokal na produksyon ng palay at mais sa susunod na taon.

Tinungkuran ni SINAG President Rosendo So ang pahayag ng Department of Agriculture na nahirapan ang lokal na produksyon ng palay dahil sa nagdaang El Niño at kalamidad na nagpadapa sa maraming sakahan sa bawat lalawigan.

Naniniwala ang sinag na mas magiging maganda ang sitwasyon ng mga magsasaka sa pagpasok ng taong 2025 na makakatulong para makabalik sa 20 million metric tons ang kabuuang produksyon sa bansa.

Umaasa rin ang grupo na mababawasan pa ang pag-iimport ng Pilipinas kasabay ng hirit na dagdag suporta para sa mga magsasaka.

Patuloy rin ang panawagan ng sinag sa kongreso na isabatas na ang panukalang magpapalakas sa sektor ng agrikultura kabilang na ang livestock, poultry, dairy at corn tariff sa susunod na taon.

Mas naging positibo ang pananaw ng mga Pilipino partikular ng mga konsyumer para sa susunod na taon.

Batay sa ikinasang survey ng Bangko Sentral ng Pilipinas, nagpakita ng mababang negatibong confidence index na negative 11.1% ang mga Pilipino mula sa negative 15.6% noong ikatlong bahagi ng nakaraang taon.

Ayon sa BSP, nakuha ang positibong pananaw bunsod ng mas mataas at karagdagang kita; pagdami ng bilang ng mga pilipinong may trabaho; at pagkakaroon ng permanenteng hanapbuhay tungo sa mas maayos na pamumuhay.

Bukod pa dito, naging maayos rin ang kundisyon ng ekonomiya at ang kalagayang pinansyal at kita ng bawat pamilya sa kabila ng mga hamon sa bansa kabilang na ang inflation rate; employment rate; at peso-dollar rate.

Prayoridad ng pamahalaan ang pagbibigay ng trabaho sa libu-libong Pilipinong nawalan ng trabaho kasabay ng tuluyang pagbabawal sa operasyon ng mga philippine Offshore Gaming Operators.

Ayon kay Interior and Local Government Secretary Juanito Victor ‘Jonvic’ Remulla, maliban sa mga naunang job fair na isinagawa na ng pamahalaan para sa mga naturang mangagawa, may ilan pang nakahanay na trabaho ang maaari nilang aplayan.

Matatandaang ilang Pilipino ang POGO worker ang nakapasok sa trabaho sa mga unang job fair, na ikinasa kasunod na utos ni Pangulong Ferdinand Bongbong Marcos Jr. ang tuluyang pagpapasara sa mga POGO sa bansa.

Handa ang Kamara na makipagtulungan sa Malakanyang sa review process o pagrepaso sa pambansang budget para matiyak na mapagsisilbihan ang interes ng taumbayan.

Ito ang sinabi ni Ako-Bicol Partylist Rep. Elizaldy Co, ang Chairman ng House Committee on Appropriations matapos maudlot ang signing ng budget bill.

Ayon kay Cong. Co, ang desisyon ni Pangulong Ferdinand Marcos Jr., na iurong ang nakatakda sanang paglagda sa 2025 general appropriations bill ay patunay ng kanyang dedikasyon sa transparency at accountability.

Sinabi ng mambabatas, na ang pagbusisi sa P6.352-trillion na panukalang budget sa susunod na taon ay para masiguro na ang pondo ng taumbayan ay nailalaan at nagagastos ng tama.

Patunay din anya ito na malakas ang demokrasya sa bansa at epektibong naipatutupad ang checks and balances sa gobyerno.

Una nang sinabi ni Pangulong Marcos, na kailangan nya ng kaunting panahon para maisaayos ang panukalang pondo bago matapos ang taon.

Binigyang diin ng Department of Justice ang kahalagahan ng kasunduan ng Pilipinas sa Indonesia matapos palayain si Mary Jane Veloso na nakulong ng halos 15 taon.

Sa eksklusibong panayam ng DWIZ, sinabi ni Justice Usec. Raul Vasquez, na hindi dapat maabuso ng bansa ang pagbibigay ng clemency sa mga Oversease Filipino Workers na una nang ipinanawagan ni Veloso kay Pangulong Ferdinand Marcos Jr.

Aniya, maraming nakatutok sa isyu ni Veloso at posibleng maabuso ng mga kababayan nating Pilipino ang pagbibigay ng clemency na dapat ay masusing pag-aralan.

Sinabi ng opisyal na naging simple lang ang kasunduan ng Pilipinas sa Indonesia kung saan, kanilang ibinigay ang kustodiya ni Veloso kapalit ng pagsunod sa mga regulasyon at proseso ng bansa.

Nababahala ang DOJ Official sa posibilidad na mayroong security threat kay Veloso dahil malaking halaga ng iligal na droga ang nakumpiska sakaniya na posibleng kagagawan ng mga sindikato.

Aniya, marami tayong mga kababayan na nakapiit din sa bilangguan kaya dapat na masusing pag-aralan ang pagbibigay ng clemency.