NATIONAL NEWS

Inihain na ni Akbayan Party-List Rep. Perci Cendaña  sa Kamara ang panukalang mas magpapaigting sa pagpapatupad ng anti-drunk driving law.

Ipinanukala ni Cong. Cendaña ang anti-impaired driving act of 2024 o ang “iwas amats, iwas aksidente” Bill para matiyak ang kaligtasan ng mga motorista matapos uminom ng alak.

Sa ilalim ng nasabing panukala, mas hihigpitan ang pagsasagawa ng mga breathalyzer tests.

Sinabi ng mambabatas na mula 2015 hanggang 2019, 5,213 sa 18,735 nasawi sa aksidente sa kalsada ay alcohol-related. –  Sa panulat ni John Riz Calata

Iimbestigahan na ng Kamara ang mataas na singil sa kuryente sa bansa.

Ayon kay Albay 2^nd District Representative Joey Salceda, hihimayin ng Murang Kuryente Super Committee ang nasabing isyu sa pagbubukas ng sesyon matapos ang Christmas break.

Sinabi rin ni Cong. Salceda na mismong si House Speaker Ferdinand Martin Romualdez ang nagpatawag ng imbestigasyon upang malaman ang dahilan kung bakit mataas ang singil sa kuryente sa bansa.

Mababatid na napag-alaman ng Energy Regulatory Commission noong 2016 hanggang 2020 ay gumastos ng 206 billion pesos na unauthorized funds ang  energy sector na ginamit para sa public relations, advertising, at iba pa. –  Sa panulat ni John Riz Calata

Kumpiyansa si dating bayan muna representative Teddy Casiño na sasang-ayunan ng 1/3 ng mga Kongresista ang impeachment laban kay Vice President Sara Duterte.

Ayon kay Casiño, sa DWIZ, kumpiyansa siya na madaling makukuha ang bilang na ito mula sa mga mambabatas.

Dagdag pa ng dating kongresista na mas madali ang impeachment process kaysa sa pagsasabatas ng isang panukala.  Sa panulat ni John Riz Calata

Tila dinepensahan ni Surigao Del Norte Rep. Robert Ace Barbers ang desisyon ng Quad Committee ng Kamara na ikulong si Colonel Hector Grijaldo.

Ayon kay Cong. Barbers, overall Chairperson ng Komite, kung totoo na umabuso ang Quad Committee sa pag-cite in contempt kay Grijaldo ay maaari itong kuwestyunin sa korte.

Aniya ang dahilang ng ang pagkulong ni Grijaldo, ay ang pagtanggi nito  na humarap sa imbestigasyon kaugnay sa isyu.

Iginiit pa ng Mambabatas na apat na beses ng inimbitahan ng komite ang opisyal subalit hindi ito sumipot sa pagdinig kaugnay ng extrajudicial killings sa pagpapatupad ng war on drugs campaign ng administrasyong Duterte.

Bukod sa paninira sa mga miyembro ng Quad Committee, sinabi ni Barbers na maaari ring dahilan ng hindi pagdalo ni Grijaldo sa pagdinig ay ang nabulgar kaugnay sa pagpatay kay dating pgen. Wesley Barayuga, ang Board Secretary ng PCSO.

Si Grijaldo ang Hepe ng Mandaluyong Police ng patayin si Barayuga. Pagkatapos paslangin ay ipinasok ang pangalan ni Barayuga sa narco list ng Duterte administration. –  Sa panulat ni Jeraline Doinog

Tatalakayin pa ng Senate Blue Ribbon Committee kung sinu-sino ang mga ipatatawag na resource persons para sa ikalawa nitong pagdinig kaugnay sa drug war campaign ni dating pangulong Rodrigo Duterte.

Ayon kay Senate Minority Leader Aquilino ‘Koko’ Pimentel III, bukod sa mga dating hepe ng PNP, PDEA at pamilya ng mga biktima ng EJK, iimbitahan din nila ang non-government organizations upang matukoy ang tunay na bilang ng mga namatay sa kontroberyal na kampanya kontra iligal na droga ng nakaraang administrasyon. 

Matapos naman ang rekomendasyon ng House Quad Committee na sampahan na ng kasong crimes against humanity ang dating pangulo at iba pang mga kasalukuyan at dating opisyal, iginiit ni Senador Pimentel na babase lamang din ang rekomendasyon ng Senado sa kanilang makakalap na ebidensya. - Sa panulat ni Laica Cuevas

Nanindigan si Senadora Imee Marcos na dapat nang iakyat sa korte ang kaso laban kay dating pang. Rodrigo Duterte at kaniyang mga kaalyado.

Ito’y matapos irekumenda ng House Quad Committee na kasuhan ng crimes against humanity ang dating pangulo, sina Senador Bato Dela Rosa’t Bong Go, at mga dating opisyal ng PNP dahil sa umano’y extrajudicial killings ng nakalipas na administrasyon.

Sa kapihan sa Senado, idiniin ng ate ni Pang. Bongbong Marcos na hindi maaaring humatol at magsintensya ang kongreso sa isang tao, gaano man karami ang isagawa nilang pagdinig.

Hinikayat niya ang mga kapwa-mambabatas sa kamara na bitbitin ang mga hawak nilang ebidensya sa korte sa lalong madaling panahon upang makakapaglabas na ng desisyon sa kaso.

Ipinaliwanag naman ng Senadora na hindi siya sumisipot sa pag-iimbestiga ng Senado sa Duterte war on drugs dahil sa hindi nito klarong layunin.

Una nang sinabi ni Pang. Marcos na kailangan pang suriin ng Department of Justice ang rekumendasyon ng quad comm upang kasuhan si Digong at kaniyang mga kaalyado.

Bagama’t nandigan namang hindi hihingi ng dispensa sa war on drugs, sinabi ng dating presidente na aakuin niya ang buong responsibilidad.

Iginiit ng August 21 Movement na hindi kailangang burahin sa pera ang mukha ng mga bayani kundi iminungkahing isama na lamang ang imahe ng mga hayop sa disenyo.

Ayon sa grupo, nagsisilbing “mini history” Ng pilipinas ang mga tao sa pera at pagtindig laban sa pananakop ng mga dayuhan.

Pwede naman aniyang ilagay ang mukha ng mga bayani sa isang bahagi ng pera habang ang mga imahe ng hayop ay sa kabila nito.

Binigyang-diin ng grupo na bagama’t inihayag ng Bangko Sentral ng Pilipinas na mananatili sa sirkulasyon ang paper banknotes, hindi naman malinaw kung mag-i-imprenta pa rin ang mga ito ng kasalukuyang disenyo ng pera.

Sinabi ng August 21 Movement na bagama’t nauunawan nila ang layunin ng BSP na dapat ay pag-aralan ang pagbabago sa pera sa pananaw ng “Historical distortion at revisionism” o ang pagpapalit o pagbabago sa kasaysayan. –  Sa panulat ni Laica Cuevas

Muling kinwestyon ni Senate Minority Leader Aquilino ‘Koko’ Pimentel III, ang bagong polymer banknotes na inilabas ng Bangko Sentral ng Pilipinas.

Ayon sa senador, nangangahulugan lamang ito ng bagong kontrata na nagkakahalaga ng bilyung-bilyong piso, at pagiging dependent sa polymer ng australia sa halip na paggamit ng abaca ng Pilipinas.

Igniit din ng Mambabatas na nang ilabas ang 1,000 polymer bank notes noong 2022, sinabing pag-aaralan lamang ito, ngunit hanggang ngayon ay hindi pa natutukoy ang resulta ng nasabing pag-aaral. 

Kaugnay nito, nais ng Senador na magkasa ng pagdinig ang Senate Committee on Banks dahil  bagama’t hindi aniya humihingi ng budget ang BSP sa ilalim ng General Appropriations Act, dapat nitong ipaliwanag ang mga pagpapalit ng  pera sa polymer version. - Sa panulat ni Laica Cuevas

Makabibili na ang mas maraming Pilipino ng 40 pesos kada kilo ng well-milled rice matapos magdagdag ang Department of Agriculture ng Kadiwa ng Pangulo Rice  sa apat  pang pampublikong palengke sa Metro Manila sa ilalim ng rice-for-all program.

Ayon sa D.A., nagsimula nang magbenta ng murang bigas sa apat na palengke, sa Dagat-Dagatan, Caloocan; Phase 9 Bagong Silang Market, Caloocan; Cloverleaf Market, Balintawak, Quezon City; at New Marulas Public Market sa Valenzuela City.

Binigyang-diin ni Agriculture Secretary Francisco Tiu Laurel Jr., na mahalaga ang nasabing hakbangin alinsunod na rin sa pangako ng pamahalaan na gawing abot-kaya ang bigas sa pamilyang Pilipino.

Bukas ang mga nasabing Kadiwa Store mula alas-kwatro ng umaga  hanggang ala-sais ng gabi sa buong holiday season maliban lamang sa December 24-25 at 30 at sa January 1, 2025.   Sa panulat ni Alyssa Quevedo