NATIONAL NEWS

Sumirit ang bilang ng kaso ng tigdas-hangin sa buong bansa sa unang limang buwan ng taon.

Ito ay ayon sa Department of Health, kung saan umabot sa mahigit dalawang libong kaso o katumbas ng walong porsyentong pagtaas kumpara sa kaparehong panahon noong nakaraang taon.

Naitala ang pinakamaraming kaso ang National Capital Region na may mahigit animnaraang kaso; na sinundan ng Calabarzon, halos tatlongdaang kaso; Mimaropa, Central Luzon, at Zamboanga Peninsula, na may kapwa mahigit isangdaang kaso.

Gayunman, batay sa datos ng DOH, bahagyang bumaba ang fatality rate sa tigdas-hangin sa 0.42% mula sa 0.46 noong nakaraang 2024.

—sa panulat ni John Riz Calata

Nagbabala ang Metropolitan Manila Development Authority sa mga sasakyang magbabalak na magtakip at nakatakip ang kanilang plate number upang makaiwas sa ipinatutupad na no contact apprehension policy o NCAP.

Ito ay matapos ma-monitor ng CCTV ng MMDA na may ilang motorista ang naglalagay ng takip sa mga plaka gamit ang electrical tape upang makaiwas sa violation.

Binigyang-diin ni MMDA Traffic Enforcement Director Atty. Victor Nuñez na labag ito sa traffic code at maaaring magmulta ng limang libong piso ang sinumang susuway rito.

—sa panulat ni John Riz Calata

Inilatag na ng Senado ang magiging kaganapan sa susunod na linggo kaugnay sa pag-convene ng Senado bilang impeachment court.

Ayon kay Senate Secretary Renato Bantug, magbubukas na sa Lunes ang regular session ng Senado at pagsapit ng alas-kwatro ng hapon ay ire-recognize ni Senate President Francis ‘Chiz’ Escudero na nasa VIP gallery, ang panel of prosecutor ng Kamara de Representantes.

Ipauubaya anya sa panel of prosecutor kung sinu-sino ang babasa ng mga kaso na nakapalooB sa isinumite nilang articles of impeachment.

Pagkatapos basahin ng mga kaso, maaari nang lumabas sa plenary session ang panel of prosecutor at iaanunyong ni Senate President Escudero na kinabukasan ay magko-convene na sila bilang impeachment court.

Para kay Secretary Bantug, mas magandang isuot na ng mga senador ang robe sa pag-convene ng impeachment court at sa gagawing oat.

—sa panulat ni John Riz Calata

Iginiit ni Pangulong Ferdinand Marcos Jr. na hindi dapat naglalatag ng kondisyon kung pag-uusapan ang ‘reconciliation’.

Tugon ito ni Pangulong Marcos sa gitna ng pahayag mula sa ilang kampo ng mga Duterte na bukas lamang sila sa pakikipagbati sa administrasyon kung maibibigay ang kanilang inilatag na kondisyon.

Ayon sa Presidente, walang patutunguhan kung may hihinging kondisyon ang isang panig para umayon sa kabilang panig na bukas naman para sa pagkakasundo.

Hindi aniya dapat ganoon ang ibigay na pagtrato kapag ang pinag-uusapan ay reconciliation.

Ang dapat sanang gawin sa reconciliation ay maupo ang magkabilang partido, pag-uusapan kung ano ang naging suliranin at kung paano tatanggalin ang problema.—sa panulat ni John Riz Calata

Kuntento si Pangulong Ferdinand Marcos Jr. sa ginagawang hakbang at programa ng pambansang pulisya para mapababa ang bilang ng krimen sa bansa.

Sinabi ni Pangulong Marcos na batay sa datos ng PNP, bumaba ang antas ng kriminalidad sa bansa ng 23% sa nakalipas na anim na buwan.

Ayon sa Pangulo, mula sa 15,000 noong Enero hanggang Mayo noong nakaraang taon ay bumaba ito sa mahigit 11,000 sa kaparehong panahon ngayong taon.

Kabilang sa mga krimeng may naitalang pagbaba ay ang murder, homicide, physical injury, robbery, theft, rape, at carnapping.

Kaya habilin niya sa magiging bagong hepe ng PNP na ipagpatuloy ang mga kasalukuyang ginagawa kaugnay ng pagtugon sa mga krimen sa bansa.

Dagdag pa ni Pangulong Marcos, kailangan pa rin gawing visible o damihan ang mga nagpapatrolyang pulis sa kalsada upang maramdaman ng mga mamamayan na ligtas ang mga ito.

—sa panulat ni John Riz Calata

Naghain ng resolusyon si Agri Party-list Rep. Wilbert Lee upang hilingin na suspindihin muna ang implementasyon ng odd-even number coding scheme sa EDSA na nakatakdang ipatupad ng Metropolitan Manila Development Authority sa Hunyo 16.

Batay sa House Resolution 2294 na inihain ni Cong. Lee, dapat dumaan sa masusing socio-economic evaluation ang odd-even scheme gayundin ang pagpaplano ng alternatibong ruta at broad-based consultation para sa holistic at sustainable transport solutions.

Bagama’t napapanahon aniya ang layunin na mabawasan ang volume ng sasakyan sa EDSA, iginiit ng mambabatas na magiging pabigat lamang sa mga commuter, private car owners at micro, small, and medium enterprises o MSMEs ang implementasyon.

Aniya, walang maayos na public transport at konkretong alternatibong ruta sa ilalim ng naturang polisiya.

Iginigiit ng kongresista na dapat magsiguro ang MMDA ng efficient, ligtas at accessible na public transport system bago magpatupad ng odd-even scheme na lilimita sa mobility options.

Ikinatuwa ni Pamplona Negros Oriental Mayor Janice Degamo ang muling pagkaka-aresto ni dating Congressman Arnolfo Teves Jr. sa bahay nito sa Dili, Timor Leste.

Sinabi ni Mayor Degamo na ang pagkakaaresto kay Teves ay isang paalala na walang sinuman ang nakatataas sa batas.

Dagdag pa ng alkalde, ipinapakita rin ng pangyayaring ito ang kahalagahan ng international cooperation sa paglaban sa krimen.

Sa kasalukuyan, hinihintay pa ng kampo ni Degamo ang pagsisimula ng legal process upang mapanagot si Teves at ang kanyang mga kasamahan na iniuugnay sa sinasabing “Teves terrorist group.”

—sa panulat ni John Riz Calata

Siniguro ni Armed Forces of the Philippines Chief of Staff Gen. Romeo Brawner Jr. na walang magaganap na kudeta sa ilalim ng kanyang pamumuno.

Ayon kay Gen. Brawner, mananatiling tapat ang militar sa Konstitusyon at chain of command.

Iginigiit din ng AFP chief na propesyonal ang Sandatahang Lakas at patuloy nilang itataguyod ang reforma, pananagutan at disiplina sa loob ng kanilang organisasyon.

Kasabay nito, nagbabala si Gen. Brawner sa mga nagpapakalat ng maling impormasyon at gumagawa ng gulo at sumisira sa milit.

Hinimok din ng pinuno ng AFP na maging maingat sa pagsagap sa mga sensitibong balita, partikular na kung kaugnay ito sa pambansang seguridad at siguraduhin din aniya kung totoo ang mga akusasyon.

—sa panulat ni John Riz Calata