NATIONAL NEWS

Sinuspinde ng LTO Land Transportation Office ang lisensya ng driver ng sports car na nakikita sa viral video na gumagamit ng celfon habang nagmamaneho sa isang highway.

Ayon pa kay LTO Chief Assistant Secretary Vigor Mendoza the Second, isinailalim na rin sa alarma ang nasabing sports car na isang Porsche.

Sinabi ni Asec Mendoza na gumagawa ng social media content ang driver ng sports car nang makunan ang nasabing video na paglabag aniya sa road safety rules.

Ipinabatid naman ni LTO Intelligence and Investigation Division Chief Renante Melitante na kabilang sa paglabag ng driver ay reckless driving, paglabag sa Anti Distracted Driving Act at improper person to operate a motor vehicle.

Ipinatawag na ng LTO para magpaliwanag sa insidente ang may-ari ng sasakyan at ang driver na ang lisensya ay maaaring bawiin bilang maximum penalty para sa ikatlong violation.

Nangunguna ang Pilipinas sa paggamit ng artificial intelligence (A.I.) sa proseso ng recruitment sa buong Timog-Silangang Asya.

Ayon sa isang job portal website na JobStreet, aabot sa 39% ng mga kumpanyang Pilipino ang gumagamit ng A.I tools para sa pagkuha ng mga empleyado.

73% naman ng mga kumpanya sa ibang bansa ang hindi pa rin gumagamit ng A.I. dahil sa pangamba ng kakulangan nito ng limitadong kaalaman, at posibleng dagdag gastusin. Kadalasang ginagamit ito ng mga employer sa paggawa ng job advertisements, pagsusuri ng kwalipikasyon, at pagbuo ng mga tanong para sa interview.

Dagdag pa ng job portal website, na patuloy ang paglawak ng impluwensya ng A.I. sa recruitment, kung saan aabot sa 66% ng mga negosyo sa Timog-Silangang Asya ang isinasaalang-alang ang A.I. knowledge ng mga aplikante, at 29% sa mga ito ang itinuturing pangunahing kwalipikasyon sa pagkuha ng mga empleyado.

Ang Fatty Liver ay isang sakit kung saan nagpupuno ng taba ang atay ng tao.

Nakukuha ang nasabing sakit sa labis na pagkain at pag-inom ng alak.

Ayon sa mga eksperto, kakaunti lamang ang sintomas ng Fatty Liver disease kabilang na rito ang mabilis na pagkapagod at pananakit sa kanang bahagi ng itaas ng tiyan.

Bagama’t wala pang partikular na gamot o therapy sa pagkakaroon ng Fatty Liver, maari itong mabawasan sa pamamagitan ng pag-iwas sa pag-inom ng alak, pagbawas ng timbang, at pag-aayos sa diyeta.

Posible pang ma-recover ang buto ng mga nawawalang sabungero na sinasabing itinapon sa Taal Lake. Ito ay ayon sa Department of Science and Technology.

Paliwanag ni Science Secretary Renato Solidum, nakadepende sa ang dekomposisyon ng mga labi ng mga nawalang sabungero sa lokasyon kung saan itinapon ang mga ito.

Aniya, kung walang oxygen sa pinagtatapunan ng mga labi, ay hindi madedecompose ang mga ito.

Samantala, sinabi ng DOST na handa silang magpahiram ng gamit sa mga technical divers para ma-recover ang mga labi ng nawawalang indibidwal.

Ipinag-utos ng Department of Education ang paggamit ng Ingles at Filipino bilang mga pangunahing wikang panturo para sa mga mag-aaral mula kindergarten hanggang Grade 3.

Ayon kay Education Secretary Sonny Angara alinsunod ito sa DepEd Order No. 20 na nag-uutos na Pilipino at Ingles ang gagamitin sa K-to-3 program pati na rin ang Filipino Sign Language para sa mga estudyanteng hirap makarinig.

Gayunman, magsisilbi pa ring auxiliary instruction tools ang mga regional language, alinsunod sa R.A. 12027 o ang Act discontinuing the use of Mother Tongue as medium of instruction from kindergarten to Grade 3.

Kumpyansa si Senate President Pro-Tempore Jinggoy Estrada na mapapasakamay pa rin ni Senate President Francis ‘Chiz’ Escudero ang liderato ng Senado sa 20th Congress.

Sa panayam ng D.W.I.Z., sinabi ni Senador Estrada na kung ngayon gagawin ang botohan ng bagong Senate President, tiyak na magwawagi si S.P. Escudero.

Aminado rin ang mambabatas na ibinibigay niya ang kanyang suporta sa kasalukuyang lider ng Senado.

Umalingawngaw ang suporta ng National Union of Journalists of the Philippines sa Malacañang Press Corps na tumutol sa hiling ng Presidential Communications Office na paalisin si NET 25 reporter Eden Santos sa Malacañang dahil sa umano’y paglabag nito sa protocol.

Sa isang pahayag, binigyang-diin ng NUJP na mahalagang pagtuunan ng pansin ng PCO kung bakit napipilitang gumamit ng “ambush” interviews ang mga reporter para makapaglabas ng balita tungkol sa Pangulong Ferdinand Marcos Jr.

Iginigiit ng grupo na maaaring may kakulangan sa impormasyong ibinibigay sa mga briefings, kaya’t natutulak ang mga mamamahayag na humanap ng paraan para makausap ang Pangulo. Dagdag pa ng NUJP, dapat ituring ng Palasyo ang insidenteng ito bilang pagkakataon upang suriin kung bakit umaasa sa ganitong paraan ang mga journalist.

 Naninindigan si Senador Jinggoy Estrada na dapat nang ibasura ang K-12 program. Ayon sa senador, mas gugustuhin ng taong bayan matanggal yung Senior High School dahil pasanin sa ating mga kababayang mahihirap.

Samantala, kamakailan lang sinabi ng Malacañang na hindi tutol si Pangulong Ferdinand Marcos Jr. sa K-12 program.

Dagdag pa nito na sinabi lamang ni Pang. Marcos Jr. na hindi lamang naging epektibo agad ang K-12 dahil hindi naihanda ang mga ahensiya para dito.—sa panulat ni Jem Arguel

Mas pinalakas pa ng International Criminal Court ang kaso laban kay dating Pangulong Rodrigo Duterte matapos itong magsumite ng mga karadagan pang ebidensya.

Kinumpirma mismo ni ICC Deputy Prosecutor Mame Mandiaye Niang ang pagpasa ng ika-labing isang batch ng ebidensya na naglalaman ng mahigit isanlibong items sa ilalim ng iba’t ibang katergorya.

Kabilang dito ang The Davao Death Squad murder, barangay clearance operations, high-value targets, modes of liability, contextual elements at iba pa.

Kasalukuyang nasa kustodiya ng ICC si Duterte dahil sa kasong crimes against humanity dulot ng kanyang pagpapatupad ng war on drug campaign noong kaniyang administrasyon. - sa panulat ni John Riz Calata