NATIONAL NEWS

Paiigtingin ng pamahalaan ang monitoring at auditing sa mga pharmaceutical companies at botika upang masigurong nasusunod ang VAT exemption sa karagdagang siyam na gamot.

Sinabi ni BIR Commissioner Romeo Lumagui Jr. na sakop ng exemption ang mga gamot para sa cancer, diabetes, hypertension, kidney disease, at tuberculosis habang may hiwalay ding circular ang ahensya na nag-aatas na i-exempt ang karagdagang tatlong gamot para sa mental illness.

Paliwanag ng BIR official na ang VAT exemption ay alinsunod sa itinatakda ng Create Act at Train Law na nagbibigay ng VAT exemption para sa piling health products.

Dahil sa exemption, inaasahang bababa ang presyo ng mga nasabing gamot ng hanggang 12 porsyento.

Katuwang naman ng BIR sa pagbabantay ang FDA at ang Department of Trade and Industry. - sa panulat ni Jenn Patrolla

Kinumpirma mismo ni Justice Secretary Jesus Crispin Remulla na nasa ilalim na ng proteksyon ng Philippine National Police ang whistleblower sa kaso ng mga nawawalang sabungero na si Julie Dondon Patidongan o alyas “Totoy”.

Ayon sa kalihim, mismong si PNP Chief general Nicolas Torre III ang nakatutok sa pagbabantay kay alyas Totoy.

Nakasuporta na rin aniya sa whistleblower ang witness protection program ng pamahalaan.

Si alyas Totoy ang isa sa mga suspek sa missing sabungeros na tumatayong testigo sa krimen. - sa panulat ni Jenn Patrolla

Target ng Department of Education na makapagpatayo ng labinlimang libong silid-aralan sa ilalim ng public-private partnership scheme hanggang 2026.

Ayon kay Education Undersecretary Malcolm Garma, ang PPP ay hindi donasyon kundi paraan upang mauna ang pondo ng pribadong sektor sa pagpapatayo ng mga silid-aralan, habang babayaran ito ng gobyerno sa loob ng sampung taon.

Sa kabuuang 165-thousand kakulangan ng silid-aralan sa bansa, inaasahang masosolusyunan ang pagpapatayo ng 15-thousand classrooms sa pamamagitan ng PPP sa loob ng isa o dalawang taon.

Aminado ang DepEd na may mga paaralang gumagamit ng double at triple shifting dahil sa kakulangan sa classrooms.

Ayon kay Secretary Sonny Angara, ang pagdami ng populasyon ang pangunahing dahilan ng classroom shortage.

Bahagyang bumaba ang bilang ng mga naitatalang insidente ng carnapping sa unang anim na buwan ng taon sa bansa.

 Ayon sa Philippine National Police-Highway Patrol Group, bumaba ng 8.5-percent hanggang 9.6-percent ang mga insidente ng carnapping, lalo na sa mga four-wheel vehicles.

Sa datos ng H-P-G mula January 1 hanggang June 30, nasa isandaa’t apatnapu ang kaso ng carnapping ng mga four-wheel vechicle; mas mababa kumpara sa isandaa’t animnapu’t dalawang insidenteng naitala sa kaparehong panahon noong 2024.

Samantala, mayroong naitalang siyamnaraa’t animnapu’t apat na insidente ng motorcycle carnapping ngayong taon, mas mababa rin kumpara sa isanlibo’t dalawang kasong naitala noong nakaraang taon.

Pagbibigay diin naman ng opisyal na ang pagbaba ng kaso ay resulta ng direktiba ni P-N-P Chief Nicolas Torre the Third, na palakasin ang presensya ng H-P-G sa mga kalsada, upang mapigilan ang insidente ng carnapping sa buong bansa.

Inanunsyo ng Department of Public Works and Highways na sa susunod na taon na ipatutupad ang rehabilitasyon ng Edsa at ang odd-even traffic scheme.

Ayon kay Public Works and Highways Secretary Manuel Bonoan, hindi muna sisimulan ang proyekto ngayong taon dahil sa banta ng tag-ulan at paparating na Christmas rush.

Aniya, target itong simulan sa mga hindi masyadong mataong bahagi ng Edsa sa unang bahagi ng 2026.

Tinitingnan din ng ahensya ang mas mabilis at abot-kayang teknolohiya para ayusin ang 23.8-kilometrong kalsada, kabilang ang posibilidad na magpatong na lang ng bagong layer kaysa hukayin ang buong daan.

Kaugnay nito, nauna na ring sinabi ng Department of Transportation, na magdaragdag sila ng mga bus sa Edsa Busway at pinag-aaralan din ang mas maagang operasyon ng MRT-3, upang maibsan ang inaasahang mabigat na daloy ng trapiko.

Sisimulan na ng Metropolitan Manila Development Authority ang paggamit ng A-I powered traffic system gamit ang adaptive signaling at video detectors upang mapabuti ang daloy ng trapiko sa Metro Manila.

Ayon mismo kay MMDA Chairperson Don Artes, layon ng proyekto na mabawasan ang aksidente at mapabilis ang daloy ng trapiko.

Batay sa pag-aaral ng MMDA Traffic Engineering Center, mas mainam na gamitin ang video-based system kumpara sa lumang sensors dahil hindi ito madaling masira ng ulan, roadwork, o iba pang sagabal.

Dagdag pa ng opisyal, sa pamamagitan ng makabagong teknolohiya ay maaari nang matukoy ang iba pang impormasyon tungkol sa mga sasakyan tulad ng bilis, direksyon at maging mga numero ng plaka ng motorista.

Umakyat na sa halos 17 trillion pesos ang kabuuang utang ng Pilipinas noong Mayo.

Mas mataas ito kumpara sa 166.2 billion pesos na naitalang utang noong Abril.

Ayon sa Bureau of the Treasury, kabilang sa itinuturong dahilan ng pagtaas ng utang ay ang  net issuances ng bagong domestic securities o utang na hiniram sa lokal na merkado.

Bahagya namang nabawasan ang epekto nito sa kabuuang utang dahil sa paglakas ng halaga ng piso kontra dolyar.

Sa kabuuang utang, 11.78 trillion pesos ay mula sa domestic borrowings habang 5.14 trillion pesos naman ay mula sa external obligations o utang sa ibang bansa.

Dapat pagbawalan ang mga menor de edad sa paggamit ng social media platforms, tulad ng Facebook at TikTok.

Isa ito sa mga panukalang batas na inihaing ni Senator Panfilo Lacson na layong utusan ang mga social media platforms na i-take-down ang accounts na matutukoy na menor de edad o wala pang 18 taong gulang ang gumagamit.

Aatasan din ang social media platforms na magkaroon ng paraan para matiyak ang edad at identity ng gagamit ng account gaya ng I.D. verification at facial recognition; regular na audit ng user account data at paglikha ng age-restrictions sa platforms.

Kailangan din ng mga ito ng third party age verification providers.

Ipinunto ng mambabatas ang resulta ng isang pag-aaral na nagsasabing ang labis na paggamit ng mga bata ng social media ay maaaring magdulot ng problema sa mental health gaya ng pagkabalisa, depresyon at social isolation.