NATIONAL NEWS

Inanunsyo ng Department of Public Works and Highways na sa susunod na taon na ipatutupad ang rehabilitasyon ng Edsa at ang odd-even traffic scheme.

Ayon kay Public Works and Highways Secretary Manuel Bonoan, hindi muna sisimulan ang proyekto ngayong taon dahil sa banta ng tag-ulan at paparating na Christmas rush.

Aniya, target itong simulan sa mga hindi masyadong mataong bahagi ng Edsa sa unang bahagi ng 2026.

Tinitingnan din ng ahensya ang mas mabilis at abot-kayang teknolohiya para ayusin ang 23.8-kilometrong kalsada, kabilang ang posibilidad na magpatong na lang ng bagong layer kaysa hukayin ang buong daan.

Kaugnay nito, nauna na ring sinabi ng Department of Transportation, na magdaragdag sila ng mga bus sa Edsa Busway at pinag-aaralan din ang mas maagang operasyon ng MRT-3, upang maibsan ang inaasahang mabigat na daloy ng trapiko.

Sisimulan na ng Metropolitan Manila Development Authority ang paggamit ng A-I powered traffic system gamit ang adaptive signaling at video detectors upang mapabuti ang daloy ng trapiko sa Metro Manila.

Ayon mismo kay MMDA Chairperson Don Artes, layon ng proyekto na mabawasan ang aksidente at mapabilis ang daloy ng trapiko.

Batay sa pag-aaral ng MMDA Traffic Engineering Center, mas mainam na gamitin ang video-based system kumpara sa lumang sensors dahil hindi ito madaling masira ng ulan, roadwork, o iba pang sagabal.

Dagdag pa ng opisyal, sa pamamagitan ng makabagong teknolohiya ay maaari nang matukoy ang iba pang impormasyon tungkol sa mga sasakyan tulad ng bilis, direksyon at maging mga numero ng plaka ng motorista.

Umakyat na sa halos 17 trillion pesos ang kabuuang utang ng Pilipinas noong Mayo.

Mas mataas ito kumpara sa 166.2 billion pesos na naitalang utang noong Abril.

Ayon sa Bureau of the Treasury, kabilang sa itinuturong dahilan ng pagtaas ng utang ay ang  net issuances ng bagong domestic securities o utang na hiniram sa lokal na merkado.

Bahagya namang nabawasan ang epekto nito sa kabuuang utang dahil sa paglakas ng halaga ng piso kontra dolyar.

Sa kabuuang utang, 11.78 trillion pesos ay mula sa domestic borrowings habang 5.14 trillion pesos naman ay mula sa external obligations o utang sa ibang bansa.

Dapat pagbawalan ang mga menor de edad sa paggamit ng social media platforms, tulad ng Facebook at TikTok.

Isa ito sa mga panukalang batas na inihaing ni Senator Panfilo Lacson na layong utusan ang mga social media platforms na i-take-down ang accounts na matutukoy na menor de edad o wala pang 18 taong gulang ang gumagamit.

Aatasan din ang social media platforms na magkaroon ng paraan para matiyak ang edad at identity ng gagamit ng account gaya ng I.D. verification at facial recognition; regular na audit ng user account data at paglikha ng age-restrictions sa platforms.

Kailangan din ng mga ito ng third party age verification providers.

Ipinunto ng mambabatas ang resulta ng isang pag-aaral na nagsasabing ang labis na paggamit ng mga bata ng social media ay maaaring magdulot ng problema sa mental health gaya ng pagkabalisa, depresyon at social isolation.

Suportado ni Senador Juan Miguel Zubiri na tumayo bilang Senate President sa 20th Congress si Senador Tito Sotto.

Ito’y dahil mas gusto ng senador ang estilo ng pamumuno ni Senator Sotto, partikular ang pagsasagawa ng mga caucus meeting para mapagusapan ang mga isyu sa bansa kumpara sa kasalukuyang liderato ni SP Escudero na hinahayaan lamang pagtalunan ang lahat ng bagay sa plenaryo kaya nagmumukhang magulo ang Senado.

Pinalagan naman ito ng kasalukuyang Senate President, na sinabing mas gusto niya lamang na maging transparent at naisasapubliko ang pag-uusap ng mga isyu sa loob ng Senado.

 Pag-aaralan ng Malakanyang ang mungkahi ni Interior and Local Government Secretary Jonvic Remulla na bigyan siya ng Pangulo ng kapangyarihang magpasya sa suspensyon ng klase tuwing may masamang panahon o kalamidad.

Ayon kay Palace Press Officer Usec. Claire Castro, wala pang opisyal na pahayag si Pangulong Ferdinand Marcos Jr. hinggil sa hiling ng kalihim, ngunit bukas aniya ang Palasyo na talakayin ito, lalo na kung makatutulong sa mas maraming Pilipino.

Habang wala pang bagong sistema, nananatili ang kasalukuyang polisiya kung saan nasa mga lokal na pamahalaan at mga pinuno ng mga concerned agencies ang desisyon sa suspensyon ng klase.

Hinikayat din ng Palasyo ang mga LGU na agad maglabas ng abiso upang maiwasan ang abala sa mga estudyante at magulang.

Nilinaw ng Malakanyang na hindi tutol si Pangulong Ferdinand Marcos Jr. sa pagpapatupad ng K to 12 Program.

Ayon kay Palace Press Officer at Presidential Communication Office Usec. Atty. Claire Castro, suportado naman ng Pangulo ang K to 12 Program ngunit hindi ito agad naging epektibo dahil hindi rin naihandang mga ahensya para rito.

Ngayon, sa pangunguna ni Education Secretary Sonny Angara, aayusin at paguhusayin na aniya ang mga kurikulum sa naturang programa.

Nabatid na nabawasan na ang mga aralin sa Senior High School at tutok na lamang sa ilang pangunahing subjects tulad ng effective communication, general mathematics, general science, life and career skills, at history.

Itinanggi ng Office of the Vice President ang ilang report na nagsasabing may plano si Vice President Sara Duterte na muling buhayin ang Presidential Commission on Good Government.

Gayundin ang pagpuntirya sa mga kayamanan ni President Ferdinand Marcos Jr. sakaling ang VP ang manalo bilang Pangulo sa 2028 Presidential Elections.

Nabatid na binuo ni dating Pangulong Corazon Aquino ang PCGG upang marekober ang mga nakaw na yaman ng pamilyang Marcos sa Pilipinas.

—sa panulat ni Mark Terrence Molave