NATIONAL NEWS

Itinanggi ng Office of the Vice President ang ilang report na nagsasabing may plano si Vice President Sara Duterte na muling buhayin ang Presidential Commission on Good Government.

Gayundin ang pagpuntirya sa mga kayamanan ni President Ferdinand Marcos Jr. sakaling ang VP ang manalo bilang Pangulo sa 2028 Presidential Elections.

Nabatid na binuo ni dating Pangulong Corazon Aquino ang PCGG upang marekober ang mga nakaw na yaman ng pamilyang Marcos sa Pilipinas.

—sa panulat ni Mark Terrence Molave

Nagsampa na ng kasong cyberlibel si Senator Risa Hontiveros sa National Bureau of Investigation, laban sa mga nagpakalat ng video ni Michael Maurilio o alias ‘Rene’.

Sa kumalat na video ni Maurilio sa social media, sinabi nito na binayaran siya ng isang milyong piso ni Sen. Hontiveros para tumestigo laban kina Kingdom of Jesus Christ Pastor Apollo Quiboloy, dating Pangulong Rodrigo Duterte, at Vice President Sara Duterte.

Ayon sa mambabatas, layon ng inihain nilang reklamo na makilala ang nasa likod ng nasabing video at imbestigahan ang mga vloggers na nagpakalat sa sinasabing maling akusasyon.

Kabilang dito sina Krizette Chu, Jay Sonza, Sass Rogando Sasot, Trixie Cruz-Angeles, Banat By, at iba pang content creators.

Nilinaw ni Sen. Hontiveros na ang kanyang inihain na kaso ay cyber libel at hindi perjury o traditional libel.

Kasabay nito, sinabi ng senador na bagamat tumatanggap siya ng mga kritisismo ay hindi niya pahihintulutan ang pagkalat ng kasinungalingan.

Pinanindigan ni PNP Chief PGen Nicolas Torre III ang kanyang istilo ng micromanagement sa hanay ng kapulisan.

Aniya, kinakailangan ang ganitong paraan dahil may ilang commander na hindi na marunong magbigay ng malinaw na utos sa kanilang mga tauhan.

Ikinuwento rin ni PNP Chief Torre, na sa pagbisita niya sa Bicol, pinuna niya ang isang provincial director na hindi marunong gumamit ng radyo na kabilang sa tatlong opisyal sa Region 5 na maaaring masibak sa pwesto dahil sa hindi maayos na pagtatrabaho.

Bilang tugon, inatasan ni Torre ang lahat ng ground commanders na laging magdala ng radyo upang mas madali silang mamonitor at magabayan ang kanilang mga tauhan.

Ipinag-utos ni Pangulong Ferdinand Marcos Jr. sa mga kinauukulan ang mas malalimang imbestigasyon sa sinasabing pagkamatay ng mga sabungero na hanggang ngayon ay hindi pa natatagpuan ang mga katawan.

Ayon kay Presidential Communications Office Usec. Atty. Claire Castro, nais ng Pangulo na matukoy kung sino ang tunay na sangkot sa insidente upang mapanagot at mabigyan ng hustisya ang mga biktima at kanilang mga pamilya.

Gayunman, iginiit ni Usec. Castro na mas mainam na hintayin muna ang isinasagawang imbestigasyon ng Department of Justice na patuloy ngayong nangangalap ng karagdagang ebidensiya at mga testigo na makatutulong sa paglutas ng kaso.

Nanindigan din ang Palace official na naniniwala ang Malacañang sa integridad ng korte at na ang kasong ito ay mareresolba nang naayon sa batas o rule of law.

Nanindigan ang Kamara na hindi makakaapekto ang impeachment trial ni Vice President Sara Duterte sa mga legislative efforts ng dalawang kapulungan ngayong 20th Congress.

Ayon kay House spokesperson Atty. Princess Abante, mananatiling prayoridad ang mga panukalang batas na pakikinabangan ng mamamayan.

Binigyang-diin ni Atty. Abante na hiwalay ang trabaho ng mga kongresista sa pagpasa ng mga batas at pagtutok sa impeachment process.

Tiwala aniya siya na mabibigyan ng pansin ang legislative measures dahil mayroong authorized panel of public prosecutors na nakatalaga sa impeachment proceedings.

Sinabi rin ng tagapagsalita ng Kamara na patuloy na magtatrabaho ang mga kongresista, katuwang ang mga senador para ipasa ang priority measures na tutugon sa mga suliraning panlipunan.

Kabilang aniya sa mga panukalang ipaprayoridad ng Kamara sa 20th Congress ay ang usaping may kinalaman sa national security, pabahay, kalusugan, at economic proposals na sumasalamin sa holistic approach.

Nais ni Department of the Interior and Local Government Secretary Jonvic Remulla na mabigyan ng kapangyarihan ni Pangulong Ferdinand Marcos Jr na magkansela ng pasok sa mga paaralan tuwing may sama ng panahon o bagyo.

Ayon kay Sec. Remulla, hiling niyang gamitin sa buong bansa ang kanyang naging sistema sa Cavite noong siya’y Gobernador pa lamang ng lungsod.

Binigyang-halaga ng D.I.L.G. Secretary ang maagang anunsiyo ng kanselasyon ng klase bago pa tumama ang masamang panahon, dahil nagbibigay ito ng mas maagang babala para sa mga magulang ng estudyante.

Pinabantayan ng pamahalaan ang mga insidente ng diarrhea o madalas na pagdudumi at gastrointestinal infections na maaaring makuhang sa mga sirang tubo ng tubig na pinapasok ng maruming tubig o baha.

Ginawa ni Department of Health spokesman at Assistant Secretary Albert Domingo ang pahayag sa gitna ng pinangangambahang pagkalat ng mga sakit na umuusbong tuwing tag-ulan.

Sakaling may tagas aniya ang tubo ng tubig at kung duda sa inilalabas na tubig nito, pakuluan ito ng dalawang minuto bago inumin o gamitin.

Samantala, nananatili aniya’ng mataas ang kaso ng dengue bagaman under control naman ito.