NATIONAL NEWS

Aabot sa P81-M halaga ng shabu ang nasabat ng PNP-Drug Enforcement Unit sa buy-bust operation sa Barangay Maysan, Valenzuela City.

Naaresto naman ang mga suspek na sina Joseph Malasaga, Algie Nabenia at Nolan Julia.

Dakong alas-11:30 kahapon ng umaga nang ilunsad ng pulisya ang operasyon sa kanto ng Maysan Road at Cecilio J. Santos Street.

Hindi naman nakapalag sina Malasaga nang dakpin ng mga pulis na nagpanggap na buyer.

Nahaharap sa kasong paglabag sa RA 9165 o Comprehensive Dangerous Drugs Act of 2002 ang mga suspek.

Darating na sa Pilipinas sa Hunyo a-1 ang pangalawang bagong barko ng Philippine Coast Guard na binili mula sa Japan.

Ito ang BRP Melchora Aquino na binili ng Pilipinas sa halagang P14.55-B sa ilalim ng Jica Step Loan Agreement na nilagdaan noong Februay 7, 2020.

Ang nasabing Multi-role response vessel na nakamodelo sa Kunigami-Class vessel ng Japan Coast Guard ay may habang 97-meter.

Gagamitin ang naturang PCG vessel upang mapalakas ang maritime security, safety, law enforcement, search and rescue at marine environmental protection capabilities.

Mayo a-6 nang dumating sa Pilipinas ang isa pang barko ng PCG na BRP Teresa Magbanua, na mula rin sa Japan.

Naniniwala ang isang legal luminary at law dean na hindi malayong ibasura ng Supreme Court ang petisyon para sa disqualification kay presumptive president Ferdinand “Bongbong” Marcos Junior.

Ayon kay San Beda College of Law Dean, Father Ranhillo Aquino, karaniwan nang pinagtitibay ng Supreme Court ang mga desisyon ng mga administrative body, tulad ng COMELEC.

Sa pagkakataon anyang ito ay idinismiss ng poll body ang petisyon na humihiling na ipa-disqualify si Marcos.

Ipinaliwanag ni Aquino na batay sa kasaysayan ay nirerespeto ng SC ang kagustuhan ng taumbayan na pinagbabatayan sa kaso laban sa mga halal na opisyal.

Bagaman hindi anya maaaring hulaan ang susunod na hakbang ng kataas-taasang hukuman, kapag nahalal na ang isang tao ay hindi na pakiki-alaman ng SC ang disqualification dahil ang paninindigan nila ay nagpasya na ang taumbayan na dapat igalang.

Noong martes ay naghain ng petisyon sa Korte Suprema ang grupo ng mga civic leader sa pangunguna ni Fr. Christian Buenafe na humihiling ng temporary restraining order upang pigilan ang kongreso na mag-convene bilang National Board of Canvassers at bilangin ang boto ni BBM.

Nababahala ang dalawang health expert sa posibleng epekto ng na-detect na bagong Omicron subvariant BA.4 sa Pilipinas.

Ayon kay Dr. Ted Herbosa, adviser ng National Task Force against COVID-19, malaki ang magiging epekto ng BA.4 variant lalo na sa mga may comorbidities.

Bagaman hindi nakamamatay kumpara sa Delta variant, mabilis ang transmission ng bagong virus.

Samantala, nakikita ni OCTA research fellow Dr. Guido David na magdudulot ng surge o pagdami ng bilang ng kaso ang bagong variant.

Noong Sabado, unang na-detect ang Omicron BA.4 sa isang Pinoy na nagmula sa middle east na wala namang nararamdamang sintomas.

Ikinokonsiderang variant of concern ang Omicron BA.4 na nangangahulugang mabilis itong makapaghawa at magdulot ng sakit.

Naghigpit na ang Davao City sa lahat ng buhay na domestic,  captured wild birds at poultry products mula sa mga lugar na may bird flu.

Alinsunod ito sa Executive Order 19 ng Davao City na nilagdaan ni acting mayor Sebastian Duterte, na layuning  protektahan ang publiko sa epekto ng Avian Influenza.

Kabilang sa pansamantalang ipinagbabawal ang mga sisiw, itlog, dumi, balahibo ng manok mula sa luzon at iba pang lugar na mayroong kaso ng H5N1 Avian Influenza.

Pinaigting na rin ang preventive measures laban sa bird flu sa pamamagitan ng pagdaragdag ng quarantine checkpoints sa lahat ng entry at exit points sa lungsod na umabot na sa 15.

Kasalukuyang nasa ilalim ng Stage 1 o Avian Influenza-Free Area ang Davao City.

Magugunitang nagpositibo sa naturang sakit ang ilang ibon at iba pang poultry animals sa Bulacan at Pampanga habang noong Marso at Abril, na-detect din ang bird flu sa Tacurong, Sultan Kudarat at Magsaysay, Davao Del Sur.

Minamadali na ng Department of Energy ((DOE) ang regulatory framework upang maisama ang nuclear energy sa power mix ng bansa na layuning i-adopt ng susunod na administrasyon.

Ayon kay DOE Undersecretary Gerardo Erguiza Junior, mayroon na silang mga pag-aaral upang tiyakin ang kaligtasan at seguridad ng nuclear power alinsunod sa international standards.

Mayroon na rin anyang “involvement” ang stakeholders at nabuo na rin ang framework at papaspasan na ito maging ang pagbalangkas ng isang batas para rito.

Aminado si Erguiza na ang pagkakaroon ng nuclear power sa bansa ay naka-depende sa susunod na administrasyon.

Magugunitang nangako si Presumptive President Ferdinand “Bongbong” Marcos Junior na pabibilisin ang adoption ng bansa sa nuclear power na layuning pababain ang singil sa kuryente.

Ito’y makaraang ilabas ni Pangulong Rodrigo Duterte ang executive order na naglalayong gamitin ang nuclear power bilang pagkukunan ng enerhiya kasama ang iba pang alternative energy resources.

Pansamantalang isasara sa publiko ang Manila Zoo simula sa Hunyo 1 upang isailalim sa “maintenance at finishing touches” na bahagi ng nagpapatuloy na redevelopment nito.

Ito ang inanusyo ni Manila Mayor Francisco “Isko Moreno” Domagoso sa kanyang “The Capital Report”.

Ayon kay Yorme, ilang araw lamang isasara sa publiko ang zoo para tanggalin nang tuluyan ang mga harang at tapusin ang rehabilitasyon upang higit na mag-enjoy ang mga bibisita, partikular na ang mga bata.

Hintayin na lamang aniya ang anunsiyo ng lokal na pamahalaang lungsod ng maynila hinggil dito.

Samantala, sa sandali namang magkaroon ng paniningil sa zoo, inihayag ni Domagoso na bibigyan ng 50% discount ang mga senior citizen.

Umabot na sa 12 aftershocks ang naitala ng Philippine Institute of Volcanology and Seismology (PHIVOLCS) sa Calatagan, Batangas.

Ito’y matapos yanigin ng Magnitude 6.1 na lindol ang nasabing lugar alas-5:50 ng umaga kahapon.

Unang naramdaman ang mga aftershock dakong ala-6 ng umaga hanggang ala 6:11 kagabi na pawang may lakas na Magnitude 1.6 hanggang 2.8.

Wala pa namang naitala ang PHIVOLCS na pinsala sa mga ari-arian matapos ang pagyanig.

Samantala, niyanig din ng Magnitude 2.9 na lindol ang Nasugbu, Batangas dakong alas-11:19 kagabi.