NATIONAL NEWS

Dapat hanapin ng mga lokal na pamahalaan ang mga hindi pa nababakunahan at eligible na makatanggap ng booster shots kontra COVID-19.

Ito ang inihayag ni Department of the Interior and Local Government o DILG secretary Eduardo Año, na dapat mag house-to-house ang mga lokal na opisyal.

Aniya dapat i-maximaze ng mga LGU ang kanilang hurisdiksyon para himukin ang mga hindi pa nababakunahan na magpaturok na bilang pag-iingat sa mas nakahahawang Omicron subvariant na BA.4

Nabatid na kinumpirma ng Department of Health (DOH) nitong Sabado ang kaso ng BA.4 subvariant sa isang Pilipino na dumating sa bansa noong May 4 mula sa Middle East at nagpositibo sa test result noong May 8.

Batay naman sa European Center for Disease Prevention and Control (ECDC), variant of concern ang subvariant na BA.4 dahil maari itong kumalat nang mas mabilis o magdulot nang mas malalang sakit.

Pinaalalahanan ng Department of Health (DOH) ang publiko na ang patuloy na pagsunod sa health standards at pagpapabakuna ang pinaka-epektibong paraan para magkaroon ng proteksyon sa lahat ng bagong COVID-19 variant.

Inilabas ng DOH ang pahayag ilang araw matapos ma-detect ang mas nakahahawang subvariant ng Omicron na BA.4 sa isang Pinoy na mula sa Middle East nitong Mayo.

Para sa health department, ang pagsusuot ng face masks, pag-isolate kung may sakit at pagpapabakuna ang mabisang proteksyon laban sa nabanggit na sakit.

Posible naman aniyang makaranas ng mga sintomas na fatigue, pag-ubo, hirap sa paghinga, joint pain at iba pa ang mga tinatawag na kaso ng Long COVID.

Nagpositibo sa COVID-19 si vaccine czar secretary Carlito Galvez Jr.

Ayon kay Galvez, mild symptoms lamang ang kaniyang nararamdaman at nananatili siyang matatag dahil bakunado sila kontra COVID-19 ng kaniyang pamilya na kasalukuyang naka-isolate.

Humingi naman ng paumanhin si Galvez sa mga taong nakasalamuha niya noong nakalipas na lima hanggang pitong araw.

Hinikayat din niya ang mga ito na magpa-test laban sa nabanggit na sakit at obserbahan ang health conditions.

Samantala, patuloy pa ring imo-monitor ni galvez ang vaccination efforts ng pamahalaan.

Binatikos ng Department of the Interior and Local Government (DILG) ang grupong kontra daya dahil sa “overactive imagination and conspiracy theories” nito ukol sa failure of elections at umano’y malawakang pandaraya sa nagdaang halalan.

Tinawag ni DILG spokesperson undersecretary Jonathan Malaya na iresponsable ang Kontra Daya dahil walang anumang basehan ang sinabi nitong bigo ang Automated Election System (AES) na bantayan ang kasagraduhan ng balota.

Paliwanag niya na ang source code, ang human-readable copy ng software na nagpapatakbo sa AES ng Comission on Elections (Comelec) ay isinailalim sa masusing pagsusuri ng lahat ng political parties, cause oriented groups at information technology experts.

Giit pa ni Malaya na ang naturang watchdog ay naglalayon lamang na pagdudahan ang integridad ng halalan para magdulot ng kalituhan sa publiko gamit ang maling impormasyon.

Pinayagan ng Department of Education o DepEd ang mas marami pang in-person recognition at closing rites sa mga paaralan sa Bicol region matapos na luwagan ng pamahalaan ang COVID-19 restrictions.

Ayon kay director Gilbert Sadsad ng DepEd-Bicol, mahigit 2,500 na paaralan na ang mayroong face-to-face classes sa kanilang lugar kaya pahihintulutan nito ang mga nasa ilalim ng Alert level 1 at 2 na magsagawa ng closing activities.

Pero kailangan aniyang makipag-ugnayan ang mga paaralan sa kani-kanilang lokal na pamahalaan para sa tulong at pag-apruba rito gayundin ang pagpayag ng mga magulang.

Mahigpit namang ipatutupad sa naturang aktibidad ang pagsunod sa health protocols tulad ng pagsusuot ng face mask at social distancing.

Ginawaran ng Heart of Education Award ang isang Pilipina special education teacher sa Amerika na si Ella Wagan-Nava dahil sa dedikasyon nito sa pagtuturo.

Si Wagan-Nava ay ang kauna-unahang Pilipinong nakatanggap ng naturang parangal na kinikilala ang mga natatanging guro sa clark county schools sa Las Vegas, Nevada.

Ayon sa Pinay masaya ito sa ginagawa niyang pagtuturo sa mga batang may special needs bagama’t maraming hamon sa pagtuturo sa mga batang tulad ng mga ito lalo na sa kasagsagan ng COVID-19 pandemic kung saan napilitan silang lumipat sa online at hybrid learning mula sa nakasanayang face-to-face classes.