NATIONAL NEWS

Isang babae ang natagpuang patay makaraang sakalin gamit ang cord ng cellphone charger sa San Miguel, Bulacan.

Hinihinalang ginahasa rin ang biktimang si Regine Sebastian, 30 anyos, na negosyante at single mom dahil wala itong underwear at puno ng pasa ang katawan nang madiskubre sa kanyang bahay.

Suspek sa krimen ang dating boyfriend ng biktimang si alyas Popoy habang witness ang 10 taong gulang na anak ni sebastian.

Ayon kay Col. Jordan Santiago, hepe ng San Miguel Police, nadiskubre nila sa cellphone ng suspek ang pagkakasunod ng kaganapan, chat maging ang mga larawan.

Nakunan din sa CCTV ang pagpasok at paglabas ng suspek sa bahay ng biktima.

Naaresto naman ang suspek at nahaharap na sa kasong murder.

Samantala, hinihintay na ang resulta ng tests upang mabatid kung hinalay ang biktima habang inaalam na kung ninakawan din ito lalo’t nawawala ang nasa 350,000 pesos na halaga ng kanyang alahas.

Isang pulis ang patay matapos paulanan ng bala ng mga hindi nakilalang salarin sa bayan ng Matanao, Davao Del Sur.

Kinilala ang biktimang si Patrolman Hariz Jhun Adayo, 26 anyos, residente ng Poblacion Uno, Bansalan.

Ayon kay Capt. Flor Daisy Angga, acting police chief ng Matanao, patungo sana si Adayo sa bayan ng Hagonoy habang lulan ng kanyang motorsiklo nang tambangan ng riding-in-tandem sa provincial road.

Pagdating ng biktima sa Barangay New Visayas sa Matanao ay pinaputukan ito ng mga salarin.

Naisugod pa sa Davao Del Sur Provincial Hospital sa Digos City ang pulis subalit hindi na ito umabot ng buhay.

Inaalam na ng pulisya ang motibo sa pamamaslang at sino o anong grupo ang posibleng nasa likod nito.

Namemeligro na namang tumaas ang presyo ng tinapay dahil sa delay ng mga delivery ng raw materials.

Ito ang inamin ni Philippine Federation of Bakers’ Association Vice President Luisito Chavez sa gitna ng nagbabadyang global food shortage, na nagsisimula na umanong maramdaman sa bansa.

Dapat anyang pagtuunan ng pansin ng gobyerno ang pagtatanim ng agricultural crops na magagamit ng mga magtitinapay upang mapababa ang production cost at makabawi ang maliliit na negosyo.

Layunin nitong makamit ang food stability at hindi na masyadong umaasa sa mga imported na raw materials.

Una nang inihayag ng Bangko Sentral ng Pilipinas (BSP) na ang walang puknat na price increase ng oil products, pangunahing food items at paghina ng piso ang nangungunang dahilan ng pagtaas ng presyo ng mga bilihin.

Umaaray na ang ilang negosyo sa food industry ng bansa sa kakulangan sa suplay ng ilang raw material na ginagamit sa pagluluto ng pagkain.

Ilan sa mga pahirapang makuha ang suplay ng chipping potatoes na ginagamit sa french fries at harina na isa sa pangunahing ingredient sa paggawa ng tinapay, pastries, pasta at noodles.

Dahil dito, tumaas na ang presyo ng french fries sa ilang fast food restaurant maging sa ilang food stalls, lalo sa Metro Manila.

Ayon kay Agriculture Undersecretary Kristine Evangelista, global concern ang kakulangan sa chipping potatoes na inaangkat sa ibang bansa, gaya ng Canada at Estados Unidos.

Iminungkahi naman ni Evangelista na gumamit na lamang muna ng white potatoes, camote at taro chips bilang alternatibo sa chipping potatoes.

Aminado naman si Eric Teng, pangulo ng Resto PH na inakala nila noong una na logistical problem lang ang problema sa pag-export ang dahilan ng delay sa kanilang suplay.

Gayunman, dahil sa krisis sa Ukraine, apektado na rin ang fertilizer access ng mga magsasaka sa ibang bahagi ng mundo kaya kinakapos ng suplay.

Ilang bansa na rin ang tumigil sa pag-export ng kanilang mga produkto, gaya ng palm oil ng Indonesia at karne mula Argentina, upang maprotektahan ang kanilang suppy.

Isang babae ang patay makaraang sakalin gamit ang cord ng cellphone charger sa Vigan City, Ilocos Sur.

Kinilala ang biktimang si Jessa Arola, 25 anyos, residente ng Bayan ng Banayoyo habang suspek sa krimen ang dati nitong nobyong si Dennis Raquel Junior, 27 anyos.

Ayon kay Vigan City Police OIC, Lt. Col. Franklin Ortiz, nakita ang bangkay ni Arola sa inuupahan nitong bahay sa Barangay Tamag kung saan inabutan din si Raquel.

Isinumbong ang suspek ng nakababata nitong kapatid na kanyang tinawagan at pinagsabihan ng nagawang krimen.

Nagkaroon anya ng pagtatalo ang dating magkasintahan hanggang sa mauwi sa pananakal umano ni Raquel kay Arola gamit ang cord ng cellphone charger.

Bago ang krimen ay nabanggit umano ng biktima sa kaibigang si Leila Bilgera, na naghahanap ng extrang padlock si Arola para sa kaniyang kuwarto at inamin din nito ang problema sa nobyo.

Iniimbestigahan na ng mga otoridad ang krimen habang nakapiit na ang suspek sa Vigan City Police.

Pinangalanan na ng Bangko Sentral ng Pilipinas (BSP) ang kanilang ika-5 deputy governor sa katauhan ni Outgoing Tourism Secretary Bernadette Romulo-Puyat.

Itinalaga si Puyat sa BSP, ilang linggo matapos simulan ng Central Bank ang paghahanap ng kanilang bagong deputy governor.

Mayo 12 nang i-anunsyo ng BSP na mababakante ang nasabing posisyon.

Inihayag naman ni outgoing BSP governor at Incoming Finance Secretary Benjamin Diokno na aprubado na ng kanilang Monetary Board ang appointment ni Puyat.

Hindi tulad ng BSP Governor at Monetary Board Members na itinatalaga ng pangulo, ang policy-making body ng Central Bank ang nag-a-appoint ng mga Deputy Governor at Assistant Governor.

Samantala, papalit naman si Puyat bilang Tourism Secretary ni Liloan Mayor Christina Garcia Frasco, Spokesperson ni Vice President-Elect Sara Duterte-Carpio.

Isang pulong ang idinaos sa pagitan nina President-Elect Bongbong Marcos at ilang incoming at incumbent na miyembro ng Kongreso.

Ito’y upang talakayin ang mga legislative agenda ni Marcos at detalye ng kanyang unang State of the Nation Address (SONA) sa Hulyo.

Kumatawan para sa senado sina Senate President Pro-Tempore Ralph Recto, Senate Majority Leader Juan Miguel Zubiri, Senators Nancy Binay, Ronald Dela Rosa, Lito Lapid, Ramon Revilla Junior;

Incoming Senators JV Ejercito, Jinggoy Estrada, Loren Legarda at Raffy Tulfo habang binubuo ang house contingent nina House Majority Leader Ferdinand Martin Romualdez at Isabela Rep. Tonypet Albano.

Binigyang-diin ni Marcos na gaya ng mga obserbasyon ay naniniwala silang magkakaroon ng maayos na relasyon ang executive at legislative branches lalo’t “well represented” ang Luzon, Visayas at Mindanao.

Pinayuhan naman ng susunod na pangulo sina Incoming Speaker Romualdez at Zubiri na mag-usap at talakayin ang mga posibleng legislative agenda para sa SONA lalo’t si Zubiri ang isa sa pinaka-matunog na contender sa pagiging Senate President.

Gayunman, hindi inungkat ni Zubiri ang posibilidad ng term-sharing sa senate presidency sa kanyang pakikipag-pulong kay Marcos.

Tinututukan na ng Department of Health (DOH) ang pagtaas ng dengue cases sa tatlong rehiyon sa bansa.

Tinukoy ni DOH-Epidemiology Bureau Chief, Dr. Alethea De Guzman ang Region 3 o Central Luzon, Region 7 o Central Visayas at Region 9 o Zamboanga Peninsula.

Malaki anya ang kontribusyon ng tatlong rehiyon sa mga bagong kaso noong nakaraang buwan, maliban sa Metro Manila.

Batay sa datos ng DOH, aabot sa 6,622 dengue cases ang naitala sa bansa mula April 10 hanggang May 7.

Sa naturang bilang, 908 cases o 14% ay mula sa region 8; 881 cases o 13% sa region 7 habang 593 cases o 9% sa region 3.

Una nang iniulat ng kagawaran na nakapagtala sila ng pagtaas ng dengue cases simula noong katapusan ng Marso 20 hanggang Abril 30 na umabot sa 11,435 kumpara sa 5,901 cases sa kaparehong panahon noong isang taon.