NATIONAL NEWS

Dapat na payagan ang mga lokal na pamahalaan na magdesisyon ukol sa pagpapatupad o hindi ng pagsusuot ng face mask sa outdoor set up.

Ayon kay Presidential Adviser for Entrepreneurship Joey Concepcion, naniniwala siyang hindi na kailangan ang paggamit ng face mask sa labas dahil alam aniya ng lahat na mild lamang ang epekto ng Omicron variant sakaling tamaan nito.

Nabatid na kamakailan lamang nang hindi kilalanin ng Department of the Interior and Local Government (DILG) ang inilabas na executive order ni Cebu Governor Gwendolyn Garcia hinggil sa opsyonal na pagsusuot ng face mask sa mga open and well-ventilated spaces.

Humihirit ang Confederation of Truckers Association of the Philippines (CTAP) ng dagdag-singil sa freight fees sa gitna ng patuloy na pagtaas ng presyo ng langis.

Sa panayam ng DWIZ, sinabi ni CTAP President Mary Zapanta na dumadaing na ang mga truckers dahil din sa mataas na gastos sa operation cost.

Sakali aniyang mapagbigyan sila sa kanilang hiling na 40% dagdag-singil o tinatawag na fuel adjustment rate ay makatutulong ito para sa mga truckers.

Hindi pa rin nakakatanggap ng one COVID-19 allowance ang ilang mga healthcare worker sa ilang pribadong ospital.

Ito ang ibinunyag ni Private Hospitals Association of the Philippines (PHAPI) President Dr. Jose Rene De Grano na naghihintay pa rin ng kanilang benepisyo ang mga health workers.

Halos kalahati rin aniya sa mga ito ang umalis na sa kanilang mga trabaho para sa mga oportunidad abroad.

Una nang sinabi ng palasyo na nakapaglabas na ang Department of Budget and Management  (DBM) ng nasa 7.9 billion pesos para sa allowance ng  mga naturang indibidwal na nagsilbi bilang frontliners sa pagtugon laban sa COVID-19 sa bansa.

Bukas naman ang PHAPI sa pagsusumite ng mga panaglan ng healthcare workers na hindi pa nabigyan ng allowance para ito ay matugunan.

Umaaray na ilang taxi driver sa walang puknat na pagtaas ng presyo ng mga produktong petrolyo.

Ito ang dahilan kaya’t humiling na rin ang mga taxi driver at operator ng flagdown rate.

Umapela ang Philippine National Taxi Operators Association (PNTOA) na dagdagan ng bente pesos ang kasalukuyang kwarenta pesos na flagdown rate sa taxi.

Ayon kay PNTOA President Bong Suntay, na kinatawan din ng ika-apat na distrito ng Quezon City, temporary additional 20 pesos lang naman ang kanilang hirit pero wala munang calibration ng Metro.

Kailangang-kailangan anya itong ipatupad agad upang maisalba ang mga driver na lumiliit na ang inuuwing kita sa kani-kanilang pamilya.

Gayunman, wala pang natatanggap na petisyon ang LTFRB mula sa grupo habang ipinaliwanag ni Executive Director Kristina Cassion na kailangan nilang balansehin ang kakayahan ng mga commuter na magbayad ng 60 pesos na flagdown.

Pina-panagot ng grupong National Federation of Small Fisherfolk Organization in the Philippines o Pamalakaya si Agriculture Secretary William Dar sa kinakaharap na food crisis ng bansa.

Sa kanilang inilunsad na kilos-protesta sa tapat ng tanggapan ng Department of Agriculture sa Quezon City, kahapon, ipinanawagan din ng Pamalakaya ang pagpapatigil sa importasyon ng isda.

Iginiit ni Pamalakaya Spokesman Rommel Arambulo na sa halip mag-import ng galunggong, dapat anilang bigyan ng subsidiya ang mga mangingisda para maka-agapay sa kanilang hanap =buhay.

Dapat din anyang taasan ang fuel subsidy sa 15,000 mula sa kasalukuyang 3,000 pesos at bilisan ang pamamahahagi nito upang maagapan ang lumiliit na kita ng mga mangingisda bunsod ng hindi maawat na oil price hike.

Una nang inaprubahan ni Pangulong Rodrigo Duterte ang kalahating bilyong pisong pondo para sa fuel subsidy ng nasa 158,000 magsasaka at mangingisda.

Gayunman, hindi pa natatapos ng DA ang distribusyon ng nasabing ayuda.

Naniniwala si Senator-Elect JV Ejercito na mas darami ang mahihikayat na gumamit ng bisikleta, e-scooter at e-bike bilang alternatibong transportasyon sa gitna ng patuloy na pagtaas ng presyo ng langis.

Kaya nanawagan si Ejercito, na aktibong siklista at advocate ng active transportation, sa pamahalaan na tiyakin ang mas ligtas na bike lanes.

Dapat anyang tiyakin ng pamahalaan ang kaligtasan ng mga siklista at scooter rider habang pinagaganda pa ang mass transportation sa bansa.

Ayon kay Ejercito, dapat pangunahan ng Land Transportation Office (LTO) ang pag-popromote ng bisikleta at scooters at tiyaking mabibigyang prayoridad ang active transportation sa national flagship infrastructure program ng gobyerno.

Umapela naman ang nagbabalik-senadong mambabatas sa LTO na ituloy ang pag-aaral kung paano maituturing ang e-scooters at e-bikes bilang alternatibong transportasyon. —sa ulat ni Cely Ortega-Bueno (Patrol 19)

Desisyon ng sinumang senador na hirap mag-ingles ang paggamit ng tagalog o wikang filipino sa pakikipag-debate at pakikipag-talakayan sa plenaryo.

Reaksyon ito ni Senate President Tito Sotto sa pahayag ni Senator-Elect Robin Padilla na tagalog ang kanyang gagamitin sa pakikipag-debate dahil mga Pilipino naman at hindi Amerikano ang mga mambabatas na kanyang haharapin.

Gayunman, binigyang-diin ni Sotto na hindi rin mapililit ang ibang senador na sagutin si Padilla sa wikang Tagalog.

Dapat anyang tandaan na ang journal, rules, index at bills ay pawang nakasulat sa english maging ang konstitusyon.

Alinsunod sa Article 14, Section 7 ng 1987 Constitution, kapwa official language ng bansa ang Filipino at Ingles. —sa ulat ni Cely Ortega-Bueno (Patrol 19)