NATIONAL NEWS

Naglalayong magbigay ng Therapeutic Environment ang Felicidad T. Sy Wellness Centers sa mga government hospital o mga health center upang matugunan ang pangangailangang pangkalusugan ng mga pasyente.

Ito rin ay upang mabigyan ng serbisyong pangkalusugan ang ilang sektor ng kumunidad tulad ng mga bata, matanda, may malulubhang sakit, sundalo, at mga Person With Disability (PWD).

Layon din nasabing wellness centers na tulungan ang mga community health facilities na maging PhilHealth accredited, mapabuti ang mga pasilidad nito at magbigay ng mga pangunahing kagamitan tulad ng

• Weighing scale para sa mga sanggol at matanda
• Examination table
• Dressing carriage, nebulizer machine at iba pa.

Pinalawig din ng Felicidad T. Sy Wellness Centers ang serbisyo sa Armed Forces of the Philippines (AFP) at Philippine National Police (PNP) sa pamamagitan ng pagrerenovate at pagpapabuti ng mga health facilites nito.

Nakatutulong din ang nabanggit na wellness center sa pag-decongest ng mga ospital sa mga pasyenteng may minor illness na maaring tugunan sa health center level na kung saan ito ay magbibigay daan sa mga ospital upang maituon ang pokus sa secondary at tertiary cases.

Sa ngayon, nasa 178 branches na ang Felicidad T. Sy Wellness Center na mayroong 62 pediatric and neonatal wards, 13 wellness centers for elderly, 38 AFP military health facilities, 4 PNP health facilities, at 56 community health centers at may limang special projects mula sa Leyte, Manila, Batangas, at Parañaque.

Nananawagan ang mga producer ng baboy at manok sa gobyerno na balansehin ang pagpapaigting ng lokal na produksyon at importasyon ng mga suplay para matiyak na hindi maaapektuhan ang mga stakeholder sa sektor ng agrikultura.

Ayon kay National Federation of Hog Farmers Incorporated President Chester Tan, sa kanilang pagpupulong kasama si Pangulong Ferdinand Marcos Jr. ay napagsang-ayunan nito na mag-organisa ng isang grupo kasama ang Department of Agriculture at private sektor para talakayin ang demand at suplay ng nasabing produkto.

Paliwanag niya, hindi tutol ang kanilang grupo sa pag-aangkat ngunit dapat aniyang maging makatwiran ang dami nito para magbigay daan sa mga magsasaka na kumita pa rin.

Giit naman ng Philippine Rural Reconstruction Movement (PRRM) na ang pagbaba ng mga taripa at pagtaas ng import volume para sa iba’t ibang mga bilihin ay dapat magpababa ng mga presyo at makapagpabagal sa inflation.

Bahagyang bumaba ang Inflation Rate o pagtaas ng presyo ng mga bilihin sa Ilocos Region sa 6.3 % noong July mula sa 6 point 5% noong June.

Batay sa datos ng Philippine Statistics Authority (PSA), halos dumoble ang inflation mula sa 3.9% sa kaparehong period noong nakaraang taon.

Ilan sa mga dahilan na nag-ambag sa inflation sa nasabing rehiyon ang transportasyon na nasa 20% housing, tubig, kuryente, gas at produktong petrolyo na nasa 7.1% at food at non-alcoholic beverages na may 6.2%.

Nabatid na ang lalawigan ng Ilocos Norte ang nakapagtala ng pinamataas na inflation rate sa 8.3% noong July, sinundan ito ng Ilocos Sur na may 7.6% at pangasinan na may 6.0%.

Bahagyang tumaas ang COVID-19 daily positive rate sa National Capital Region (NCR) sa nakalipas na tatlong araw.

Ayon kay OCTA Research Fellow Dr. Guido david, umabot na sa 17 point 9% ang positivity sa Metro Manila noong August 11.

Pero, hindi aniya malinaw kung naabot na ng rehiyon ang peak ng COVID-19.

Ang positivity rate ay tumutukoy sa porsyento ng mga indibidwal na nagpositibo sa COVID-19 test.

Samantala, sinabi ni David na ang pagtaas ng mga kaso ng naturang sakit ay posibleng magpatuloy hanggang “ber” months.

Inihayag ng PHIVOLCS na dapat manatili muna sa kanilang mga tahanan ang mga residenteng nakatira malapit sa Bulkang Taal.

Ito’y kasunod na rin ng mga naitalang sulfuric emission na inilalabas ng taal volcano sa mga nakalipas na araw.

Ayon kay bagong talagang Department of Science and Technology Secretary (DOST) at PHIVOLCS Chief Renato Solidum, nakaranas ng pagkaamoy ng sulfur dioxide ang ilang barangay sa bayan ng Agoncillo, Laurel, at Talisay sa Batangas.

Aniya, nagkaroon ng pag-irita sa mata at lalamunan ng mga residente dahil sa maraming ibinugang sulfur dioxide gas mula sa main crater ng taal.

Imposibleng maipatupad at mapanatili ang physical distancing sa mga bata sa loob ng mga silid-aralan.

Ito ang inamin ng Department of Health (DOH) kasunod nang nakatakdang pagbubukas ng klase sa ika-22 ng Agosto.

Dahil dito, pinaalalahanan ni DOH Officer In Charge Maria Rosario Vergeire ang mga estudyante na sundin ang mga ipinatutupad na health protocols sa mga paaralan.

Maliban dito, hinimok din ni Vergeire ang mga magulang na pabakunahan ang kanilang mga anak laban sa COVID-19.

Giit pa ni Vergeire na dapat bakunado ang lahat ng guro at non-teaching personnel na haharap at makikipag-inter act  sa mga bata.

Samantala, muling hinikayat ng health official ang education department na maglagay ng safety officers para masiguro na nasusunod ang mga health and safety protocols gaya ng pagsusuot ng facemask, pag-sanitize ng alcohol at pagsuri sa temperature sa mga paaralan.

Inabswelto ng Korte Suprema ang isang dating hukom na kasama sa mga nabanggit sa kasong administratibo na inihain ng kanyang mga tauhan.

Maliban kay dating Cavite Regional Trial Court Branch 16 judge Rudiger Falcis II, nilinis din ng kataas-taasang hukuman sina court stenographer Consuelo Huertas at process server Ariel Fernando.

Kasama si Falcis sa mga inimbestigahan sa reklamo matapos niyang bigyan ng kopya ang Supreme Court ng sinumpaang salaysay ng detainee na si Susana Tinoco na nag-akusa ng korapsiyon at anomalya ng mga court workers.

Ngunit ayon sa mataas na hukuman, trabaho o responsibilidad ng isang hurado na tiyakin na walang iregularidad sa kanyang tanggapan.

Pinangasiwaan ni Pangulong Ferdinand “Bongbong” Marcos Jr. ang mass oath-taking ng mga bagong miyembro ng Bangsamoro Transition Authority (BTA) sa Malacañang.

Unang ibinahagi sa social media ni presidential son at Ilocos Norte Rep. Ferdinand Alexander “Sandro” Marcos ang panunumpa ng mga bagong BTA members.

Kinumpirma naman nina Executive Secretary Victor Rodriguez at Press Secretary Trixie Cruz-Angeles ang oath-taking ceremony sa Palasyo na dinaluhan ni United Nations Resident Coordinator to the Philippines Gustavo González.

Masayang inihayag ng Pangulo na lahat ng mga miyembro ng BTA ay may intensiyong itaguyod ang kapayapaan at kaunlaran sa Bangsamoro region.

Ipinasara ng Department of Migrant Workers (DMW) ang isang illegal recruitment agency sa Ermita, Maynila.

Ayon kay Secretary Susan Ople, pinadlak ng Anti-Illegal Recruitment Branch ng Philippine Overseas Employment Administration (POEA) ang Kharem’s International matapos madiskubreng nag-aalok ito ng ‘non-existent jobs’ sa Gitnang Silangan.

Natuklasan din na bukod sa hindi rehistrado ay wala ring lisensya para makapag-operate ang kompanya na nag-o-offer ng trabaho para sa mga domestic workers, beauticians, at on-call cleaners sa United Arab Emirates o UAE at iba pang bansa sa Middle East.

Sinasabing ang bogus job offerings ay ginagawa ng Kharem kapalit ng placement at iba pang advance fees.

Samantala, nanawagan naman si Ople sa mga nabiktima ng kompanya na lumapit sa Anti-Illegal Recruitment Branch ng POEA upang makakuha ng libreng legal assistance.

Planong mag-hire ng Department of Education (DepEd) ng kahit isang security personnel kada paaralan upang matiyak ang kaligtasan ng mga mag-aaral, guro, at iba pang non-teaching personnel.

Ang pahayag ay ginawa ni DepEd spokesperson Michael Poa matapos makaranas ng sekswal na pang-aabuso ang apat na elementary teachers sa Ocampo, Camarines Sur noong Agosto 9.

Batay sa inisyal na impormasyon, naghahanda para sa pagbubukas ng klase ang mga guro nang pumasok sa paaralan ang isang armadong lalaki at ginahasa ang mga biktima.

Dahil dito, sinabi ni Poa na lalagda sila sa isang agreement kasama ang iba pang ahensya upang magkaroon ng guwardiya ang mga pampublikong eskwelahan.