Nakapagtala muli ang Department of Health (DOH) na mas mababa sa 2,500 ang bagong nahawa sa COVID-19 sa bansa.
Sa datos ng DOH kahapon, bumaba sa 2,892 ang daily new cases, ang ikalawang araw na hindi lumampas sa 3,000 ang bilang ng nagkasakit.
Bahagya ring bumaba ang active cases sa 35,101 kumpara sa 36,190 noong Martes.
Samantala, nananatili sa 3,744,669 ang mga gumaling habang 61,173 ang mga nasawi dahil sa COVID-19.
Umakyat naman ang total case load sa 3,840,943.
Apat na araw bago ang pagbabalik-eskwela, pumalo na sa 21.8 milyong mag-aaral ang nag-enroll para sa school year 2022-2023.
Batay ito sa datos ng Department of Education (DepEd) hanggang kahapon.
Ayon sa DepEd, pinaka-marami ang nag-enroll sa CALABARZON, 3.1 million; Central Luzon, 2.4 million at National Capital Region, 2.3 million.
Pinaka-kaunti naman sa Cordillera Administrative Region na mayroong 360,668 enrollees.
Nakararanas na ng shortage sa suplay ng sibuyas ang ilang negosyo sa bansa.
Kabilang dito ang fast food chain na Burger King na aminadong kinakapos na ng supply ng puting sibuyas.
Para masolusyunan, inihayag ng pamunuan ng Burger King na dinamihan na lang nilaang paglalagay sa burger ng lettuce at kamatis.
Maliban sa Burger King, apektado rin ng shortage sa sibuyas ang ilang nagtitinda ng shawarma na isa sa kanilang pangunahing sangkap.
Batay sa inilabas na price watch ng Department of Agriculture, unavailable na ang puting sibuyas na unang pumalo sa 400 pesos ang kada kilo.
Una nang kinumpirma ng Department of Agriculture na kinakapos na ang suplay ng puting sibuyas at ang nakikitang solusyon ay ang pag-aangkat ng naturang produkto.
Lusot na sa Committee Level ng Kamara ang panukalang patawan ng excise tax ang single use plastic bags.
Sa House Ways and Means Committee hearing kahapon, inaprubahan ng lahat ng member ang House Bills 220 at 1811 o ang pagpapataw ng 20 pesos Excise Tax sa kada kilo ng single use plastic bag.
Sa sandaling maisabatas, aabot sa 900 million pesos ang makokolektang buwis ng gobyerno.
Layunin ng panukala na mabawasan ang paggamit ng single use plastic sa bansa ng hanggang 72% to 82% upang mabawasan ang masamang epekto nito sa kapaligiran.
Sa kasalukuyan, may kahalintulad din itong batas na umiiral sa Hong Kong, Cambodia, Malaysia, America at Canada.
Isasara ngayong weekend ang ilang kalsada sa Parañaque City upang magbigay-daan sa konstruksyon ng istasyon ng LRT-1 extension.
Tinukoy ng Traffic and Parking Management Office ng lungsodang North at Southbound ng Ninoy Aquino Avenue malapit sa Imelda Bridge.
Magsisimula ang road closure alas-8:00 ng gabi bukas, Agosto 19 hanggang ala-5:00 ng umaga sa Lunes, Agosto 22.
Inabisuhan naman ang mga motoristang daraan sa Northbound lane na kumanan sa Old Sucat Road o sa tapat ng SM Sucat, kanan sa C5 Extension, kaliwa sa Multinational at kanan sa Ninoy Aquino Avenue sa bahagi ng Duty Free.
Sa mga pa-Southbound naman, maaaring kumaliwa sa Multinational, kanan sa C5 Extension Rd., kanan sa Amvel at kanan sa Ninoy Aquino Ave. tapat ng Air Force One.
Maaari ring tahakin ang Quirino Avenue, kaliwa sa Victor Medina o Kabihasnan at kanan sa Ninoy.
Humirit na si Pangulong Bongbong Marcos, Jr sa mga trader na ibaba hanggang P70 ang kada kilo ng presyo ng asukal.
Ayon kay Pangulong Marcos, nakikipag-negosasyon na ang gobyerno sa mga negosyante na nag-alok ng P80 kada kilo pero kanyang hihilingin na ibaba pa hanggang P70.
Naaawa anya ang punong ehekutibo sa mga mamamayan at umaasang mapagbibigyan ng mga negosyante ang kanyang hirit na tapyasan ang presyo ng asukal.
Iginiit naman ng pangulo na may supply pa ang bansa kaya’t hindi pa kailangang mag-import sa ngayon.
Tatlong paaralan na sa Quezon City ang handang sumaklolo sa mga estudyante na apektado nang biglaang pagsasara ng Colegio de San Lorenzo (CDSL).
Kinumpirma ni Quezon City Mayor Joy Belmonte na bukas ang Trinity University of Asia, Thames International School at Quezon City University na tanggapin ang mga apektadong estudyante.
Nakikipag-ugnayan na rin anya ang pamahalaang lungsod sa iba pang eskwelahan.
Inihayag din ni Belmonte na aabot sa pitundaan labingpitong estudyante mula nursery hanggang grade 12 habang animnaraan limampu’t dalawa sa kolehiyo ang naapektuhan ng pagsasara ng CDSL.
Isandaan pitumpu’t dalawa anya sa mga college student ay ga-graduate pa naman ngayong school year.
Tiniyak din ng alkalde ang tulong para sa mga gurong nawalan ng trabaho sa pamamagitan ng public employment and service office.
Inirekomenda ni Bangko Sentral ng Pilipinas Governor Felipe Medalla na magpatupad din ang gobyerno ng tariff scheme sa imported sugar.
Bunsod ito ng panawagan ng manufacturers na payagan ang pag-a-angkat ng karagdagang asukal bagay na tinututulan naman ng mga sugar farmer.
Ayon kay Medalla, sa halip na mga quota, mas maiging payagan ang stakeholders na mag-import nang may taripa na isang paraan din upang mapigilan ang korapsyon.
Mababawasan din anya ang red tape at posibleng smuggling kung magpapataw ng taripa sa imported sugar.
Gaya ng rice tariffication law, ipinunto ni Medalla na maaaring mapunta ang mga revenue sa mga magsasaka sa halip na sa mga bureaucrat na maaari namang tumanggap ng mga “under-the-table payment o padulas” para sa import allotment.
Binigyang-diin ng BSP chief na isang leksyon na natutunan sa rice tariffication ay ang taripa ang pinaka-transparent at episyenteng proteksyon.
Bumuo na ng technical working group ang Land Transportation Office upang tutukan ang mga isyu kaugnay ng no-contact apprehension policy (NCAP).
Sa kabila ito ng kaliwa’t-kanang kontrobersya na kinakaharap ng NCAP na ipinatutupad sa limang lungsod sa Metro Manila.
Ayon kay LTO Chief at DOTr Assistant Secretary Teofilo Guadiz III, naniniwala sila na ang pinaka-mabisang paraan upang maisaayos ang mga issue ay sa pamamagitan ng pag-uusap ng LTO, MMDA at mga lgu.
Umaasa anya sila na magiging bukas ang mga alkalde ng MAYNILA, Quezon City, Valenzuela, Parañaque at Muntinlupa Cities sa mga proposal para sa mas maayos na implementasyon ng naturang polisiya.
Posibleng isagawa ang meeting sa pagitan ng LTO, MMDA at mga lgu sa mga susunod na araw.
Sa ilalim ng no-contact apprehension, ginagamit ang state of the art cameras na may artificial intelligence at gumagana ng bente kwatro oras upang makunan ang mga plaka ng mga sasakyang lumalabag sa traffic rules and regulations.
Ipadadala naman “digitally” sa mga motorista ang kanilang notices of violation.
Nagpaalala sa mga lokal na pamahalaan ang Ecowaste Coalition sa pagpili ng pinturang gagamitin sa mga pedestrian lane ngayong pagbubukas ng klase.
Hirit ng grupo, dapat gumamit ang mga LGUs ng lead-safe paints sa pagpipintura ng markings sa kalsada at sa speed humps ng mga school zone.
Mas ligtas anila ang ganitong uri ng pintura dahil pino-protektahan nito ang mga bata at matatanda na makasinghot ng mapanganib na kemikal.
Ibinabala naman ng grupo ang pagkalat ng mga pinturang may taglay na lead sa kabila ng pag-phase out dito ng pamahalaan.
Batay sa pag-aaral, ang exposure sa lead ay maaaring magdulot ng pinsala sa utak o sa nervous system ng isang bata at maka-aapekto sa kanyang paglaki, pananalita, pandinig at pag-uugali.