NATIONAL NEWS

Wala ng buhay nang matagpuan ang isang binatilyo na 4 na araw ng nawawala.

Kinilala ng Quezon City Police District-Criminal Investigation and Detection Unit ang biktimang si Raniel Reano, disi sais anyos.

Ayon sa QCPD, narekober si Reano sa isang malalim na butas sa construction site sa center island ng EDSA-Bansalangin sa Veterans Village, Quezon City, kahapon.

Dakong alas kwatro ng hapon nang ma-i-ahon si Reano ng special rescue unit ng Bureau of Fire Protection (BFP-SRU) at Metropolitan Manila Development Authority.

Nagpatulong ang BFP-SRU na makuha ang bangkay matapos ipagbigay-alam ng mga magulang ng biktima sa mga opisyal ng barangay Veterans Village ang sinapit ng binatilyo.

Kabilang ang pamilya ni Reano sa mga palaboy na naninirahan sa center island ng EDSA-BANSALANGIN

Inaalam na ng pulisya kung itinulak ang binatilyo sa butas o aksidente itong nahulog.

Sinimulan na Department of Public Works and Highways sa Region 8 ang rehabilitasyon ng mahigit 2-kilometrong San Juanico Bridge na nagdudugtong sa mga isla ng Leyte at Samar.

Ayon sa DPWH-Region 8, naglaan ang kanilang ahensya ng P84.7 million na pondo para sa pagsasaayos ng tulay na daanan ng mga sasakyan mula Luzon patungong Mindanao.

Sinabi ng DPWH na kanilang sisiguraduhin na agad na maaayos ang mga high-tension bolts at kinakalawang na mga bakal, at pagpintura sa buong tulay na halos limampunt taon nang nagbibigay serbisyo sa mga motorista.

Nabatid na bago sinimulan ang rehabilitasyon, nagkasa muna ng inspeksyon ang DPWH Bureau of Design at Bureau of Research and Standard kung saan, inaasahang matatapos ang pinakamahabang tulay sa bansa sa buwan ng Disyembre ngayong taon.

Arestado ang 9 na indibidwal sa ikinasang buy-bust operation ng mga tauhan ng Philippine Drug Enforcement Agency (PDEA) sa tatlong drug den sa Pandacan, Maynila at brgy. Holy Spirit, Quezon City.

Ayon sa PDEA, 6 ang inaresto sa dalawang drug den sa Maynila, kasama na ang umano’y dalawang drug den operator na nasa watchlist ng PDEA.

Arestado naman sa Quezon City ang isang umano’y drug pusher at operator ng drug den na dati naring nakulong dahil sa ilegal na droga.

Aabot sa mahigit 50 gramo ng hinihinalang shabu na aabot sa mahigit P300,000 ang halaga ng nasabat na iligal na droga ng mga otoridad.

Sa pahayag ng PDEA, naging malaking tulong sa kanilang tagumpay ang pagrereport ng barangay at mga residente hinggil sa iligal na aktibidad ng mga suspek na nahaharap sa kaukulang kaso.

4 na estudyante ang nasawi matapos sumalpok ang sinasakyang van sa sinusundang truck sa Tayabas City, Quezon Province ilang araw bago ang face-to-face classes sa Agosto a-22.

Sa imbestigasyon ng Tayabas Police, ang mga bikitimang nasawi ay nasa edad disi-otso hanggang bente-tres na pawang mga residente ng Candelaria, Quezon.

Ayon sa mga otoridad, galing Lucena City ang van na sinasakyan ng mga biktima at mabilis ang takbo nito habang patungo sa Candelaria nang sumalpok ito sa sinusundang forward truck sa paakyat na bahagi ng highway sa barangay Calumpang.

Sa naging pahayag ng driver ng truck, mabigat ang kanilang karga kaya’t hindi niya namalayan ang pagsalpok ng van kung saan, inakala niyang pumutok lang ang 1 gulong sa hulihang bahagi ng truck.

Sinabi pa ng driver na hindi niya itinabi ang truck na kaniyang minamaneho at nakita na lamang niya sa side mirror na kaladkad na nila ang naturang van.

Hawak ngayon ng Tayabas Police ang truck driver para sa kaukulang kaso at imbestigasyon.

Pinaboran ni Pangulong Ferdinand “Bongbong” Marcos, Jr. ang planong pagpapalawig ng state of public health emergency sa bansa hanggang sa huling buwan ngayong taon.

Ayon sa pangulo, maraming mga binibigay sa international medical community kapag state of emergency at posible itong maantala kung ititigil ang state of emergency.

Matatandaang isinailalim ni dating Pangulong Rodrigo Duterte ang bansa sa state of public health emergency noong March 2020 bilang hakbang para tugunan ang covid-19 pandemic na nakatakdang magtapos sa darating na Setyembre.

Nabatid na mananatili ang state of public health emergency hanggat hindi binabawi ni Pangulong Marcos Jr. ang naturang deklarasyon.

Pinuna ng Commission on Audit (COA) ang mahigit 3-bilyong mga transactions ng Department of Health (DOH) na taliwas umano sa itinatakda ng Republic Act 9184 o ang Governemnt Procurement Act.

Base sa 2021 audit report, sinabi ng COA na aabot sa mahigit P3-bilyong ang kabuuang mga transaksiyon na may improper computation sa approved budget for the contract (ABC).

Ayon sa COA, mali ang paraan ng pagbili ng DOH at mayroong kawalan sa pagpaplano, at iba pang kadahilanan.

Sa naging pahayag ng DOH, pumayag sila na sabihan ang bids and awards committee (BAC) at ng iba pa nilang opisina na sundin ang mga batas at regulasyon.

Bukod pa dito, pinayagan din ng DOH na patawan ng tamang liquidata damages ang mga contractor at suppliers sa naantalang delivery ng mga binili ng gobyerno.

Samantala, nasilip din ng COA ang hindi pagsumite ng kagawaran ng mga dokumento hinggil sa mga transaksiyon na nagkakahalaga ng P5.8 billion kaya hindi umano malaman kung tama at makatwiran ang mga transaksiyon ng ahensya.

Inihayag ng COA na pumayag din ang DOH na makapagbigay ng financial report at transaction documents para malaman kung may iregularidad sa paggasta ng ahensya.

Sa ngayon, binigayn ng anim napung araw ang DOH para sagutin ang mga napuna at katanungan ng COA hinggil sa transaksiyon ng DOH.

Idinadaing ngayon ng mga magsasaka ang mababa at mahinang produksiyon ng pananim na tubo sa Negros Occidental.

Ayon sa mga magsasaka, nagsimula na ang milling season o harvest sa mga plantasyon ng tubo sa kanilang lugar na isa sa pinakamalaking plantation sa bansa.

Sinabi ng mga sugarcane planter na apektado na ang kanilang produksiyon dahil sa mataas na presyo ng pataba o abono kung saan, mula sa animnapung tonelada kada ektarya ng produksiyon ng tubo, nagiging tatlumput dalawang tonelada nalang kada ektarya ng produksiyon.

Dahil dito, nagkukulang na ang kanilang produksiyon bunsod narin ng kakulangan sa alaga dahil sa pagtitipid ng fertilizer kung saan, ang dating dalawang beses na paglalagay ng abono, ay nagiging isang beses nalang sa loob ng sampung buwan upang maibalik ang kanilang puhunan at para maiwasan ang kanilang pagkalugi.

Nabatid na ang dating P800 sa kada sako ng abono, ay umabot na sa P3,200 ang presyo ng kada sako nito.

Bukod pa diyan, maging ang pagtanggal ng mga damo sa mga pananim ay tinitipid narin ng mga magsasaka kung saan, limang araw nalang kada linggo mula sa anim na araw.

Ayon sa mga magsasaka, mura ang lingguhang bayad sa kanila at mas lalo pang liliit ang kanilang kita kung saan, isanglibo lamang ang natatanggap ng mga nag-aalaga ng pananim na tubo.