NATIONAL NEWS

Isasara ngayong weekend ang ilang kalsada sa Parañaque City upang magbigay-daan sa konstruksyon ng istasyon ng LRT-1 extension.

Tinukoy ng Traffic and Parking Management Office ng lungsodang North at Southbound ng Ninoy Aquino Avenue malapit sa Imelda Bridge.

Magsisimula ang road closure alas-8:00 ng gabi bukas, Agosto 19 hanggang ala-5:00 ng umaga sa Lunes, Agosto 22.

Inabisuhan naman ang mga motoristang daraan sa Northbound lane na kumanan sa Old Sucat Road o sa tapat ng SM Sucat, kanan sa C5 Extension, kaliwa sa Multinational at kanan sa Ninoy Aquino Avenue sa bahagi ng Duty Free.

Sa mga pa-Southbound naman, maaaring kumaliwa sa Multinational, kanan sa C5 Extension Rd., kanan sa Amvel at kanan sa Ninoy Aquino Ave. tapat ng Air Force One.

Maaari ring tahakin ang Quirino Avenue, kaliwa sa Victor Medina o Kabihasnan at kanan sa Ninoy.

Tatlong paaralan na sa Quezon City ang handang sumaklolo sa mga estudyante na apektado nang biglaang pagsasara ng Colegio de San Lorenzo (CDSL).

Kinumpirma ni Quezon City Mayor Joy Belmonte na bukas ang Trinity University of Asia, Thames International School at Quezon City University na tanggapin ang mga apektadong estudyante.

Nakikipag-ugnayan na rin anya ang pamahalaang lungsod sa iba pang eskwelahan.

Inihayag din ni Belmonte na aabot sa pitundaan labingpitong estudyante mula nursery hanggang grade 12 habang animnaraan limampu’t dalawa sa kolehiyo ang naapektuhan ng pagsasara ng CDSL.

Isandaan pitumpu’t dalawa anya sa mga college student ay ga-graduate pa naman ngayong school year.

Tiniyak din ng alkalde ang tulong para sa mga gurong nawalan ng trabaho sa pamamagitan ng public employment and service office.

Inirekomenda ni Bangko Sentral ng Pilipinas Governor Felipe Medalla na magpatupad din ang gobyerno ng tariff scheme sa imported sugar.

Bunsod ito ng panawagan ng manufacturers na payagan ang pag-a-angkat ng karagdagang asukal bagay na tinututulan naman ng mga sugar farmer.

Ayon kay Medalla, sa halip na mga quota, mas maiging payagan ang stakeholders na mag-import nang may taripa na isang paraan din upang mapigilan ang korapsyon.

Mababawasan din anya ang red tape at posibleng smuggling kung magpapataw ng taripa sa imported sugar.

Gaya ng rice tariffication law, ipinunto ni Medalla na maaaring mapunta ang mga revenue sa mga magsasaka sa halip na sa mga bureaucrat na maaari namang tumanggap ng mga “under-the-table payment o padulas” para sa import allotment.

Binigyang-diin ng BSP chief na isang leksyon na natutunan sa rice tariffication ay ang taripa ang pinaka-transparent at episyenteng proteksyon.

Bumuo na ng technical working group ang Land Transportation Office upang tutukan ang mga isyu kaugnay ng no-contact apprehension policy (NCAP).

Sa kabila ito ng kaliwa’t-kanang kontrobersya na kinakaharap ng NCAP na ipinatutupad sa limang lungsod sa Metro Manila.

Ayon kay LTO Chief at DOTr Assistant Secretary Teofilo Guadiz III, naniniwala sila na ang pinaka-mabisang paraan upang maisaayos ang mga issue ay sa pamamagitan ng pag-uusap ng LTO, MMDA at mga lgu.

Umaasa anya sila na magiging bukas ang mga alkalde ng MAYNILA, Quezon City, Valenzuela, Parañaque at Muntinlupa Cities sa mga proposal para sa mas maayos na implementasyon ng naturang polisiya.

Posibleng isagawa ang meeting sa pagitan ng LTO, MMDA at mga lgu sa mga susunod na araw.

Sa ilalim ng no-contact apprehension, ginagamit ang state of the art cameras na may artificial intelligence at gumagana ng bente kwatro oras upang makunan ang mga plaka ng mga sasakyang lumalabag sa traffic rules and regulations.

Ipadadala naman “digitally” sa mga motorista ang kanilang notices of violation.

Nagpaalala sa mga lokal na pamahalaan ang Ecowaste Coalition sa pagpili ng pinturang gagamitin sa mga pedestrian lane ngayong pagbubukas ng klase.

Hirit ng grupo, dapat gumamit ang mga LGUs ng lead-safe paints sa pagpipintura ng markings sa kalsada at sa speed humps ng mga school zone.

Mas ligtas anila ang ganitong uri ng pintura dahil pino-protektahan nito ang mga bata at matatanda na makasinghot ng mapanganib na kemikal.

Ibinabala naman ng grupo ang pagkalat ng mga pinturang may taglay na lead sa kabila ng pag-phase out dito ng pamahalaan.

Batay sa pag-aaral, ang exposure sa lead ay maaaring magdulot ng pinsala sa utak o sa nervous system ng isang bata at maka-aapekto sa kanyang paglaki, pananalita, pandinig at pag-uugali.

Isa pang petisyon na tumutol sa implementasyon ng no-contact apprehension (NCAP) ang inihain sa Korte Suprema.

Hiniling ng petitioner na si Atty. Juman Paa sa Supreme Court na ideklarang labag sa batas ang NCAP at ipatigil ang implementasyon ng Ordinance 8676 na ipinasa ng Manila City Council noong 2020.

Alinsunod sa ordinansa, pinapayagan ang Manila Traffic and Parking Bureau na pagmultahin ang mga traffic violator na mahuhuli at makukunan ng traffic cameras.

Kabilang si Paa, na residente ng Maynila, sa mga motoristang pinagmulta ng P20,360 dahil umano sa traffic violation.

Iparerehistro sana ng petitioner ang kanyang s.u.v. sa Quezon City noong Hunyo pero kinailangan muna niyang magbayad ng multa sa Maynila dahil sa apat na traffic violations na obstruction ng pedestrian lane noong Mayo hanggang Hunyo 2021.

Nasa P2,000 ang multa para sa first offense; P3,000 para sa second offense habang tig-P4,000 para sa third at fourth offenses.

Pinatawan din si Paa ng P7,360 na interest at surcharge para sa non-payment pero kanyang nilinaw na wala siyang natanggap na anumang notice ng violations.

Iginiit ng petitioner na hindi siya dapat patawan ng surcharges at iba pang interests dahil nabigo ang MTPB na ipaalam ang kanyang unang violation.

Samantala, napag-alaman ni Paa na napunta sa Taguig City ang notice of violations sa halip na sa kanyang bahay sa Maynila.

Ipinunto ng abogado na nalabag ang kanyang “right to due process” dahil nawalan siya ng pagkakataon na magpaliwanag sa traffic enforcer o tumalima sa 10-day administrative protest na nakasaad sa ordinansa.

Nasa 9,500 personnel ang itatalaga ng National Capital Region Police Office para sa seguridad ng milyun-milyong mag-aaral na magbabalik eskuwela simula sa Lunes, Agosto a – 22.

Ayon kay NCRPO Director Brig. Gen. Jonnel Estomo, kanyang pupulungin ang unit commanders upang talakayin ang kanilang operasyon sa pagbubukas ng school year 2022-2023.

Tiniyak din ng bagong hepe ng NCRPO ang pagpapaigting sa random checkpoints at police visibility sa Metro Manila.

Bagaman aminado si Estomo na limitado ang resources ng NCRPO, kumpiyansa siyang susuportahan ng local government units ang kanilang security measures, bukod pa sa pagpapatuloy ng war on drugs.

Nananatiling ligtas ang pagbiyahe sa iba’t-ibang tourist destination sa Pilipinas.

Ito ang tiniyak ng Department of Tourism sa kabila ng hakbang ng United States Centers for Disease Control and Prevention (CDC) na ilagay ang Pilipinas sa ilalim ng alert level 3 para sa “high-level of covid-19”.

Pinawi naman ni Tourism Secretary Christina Frasco ang pangamba ng mga biyahero kahit mahigit sa kalahati ng dalawandaan tatlumpu’t limang lugar na mino-monitor ng CDC ay nasa ilalim ng nasabing level.

Kampante anya sila sa mga inilatag na health guidelines sa bansa upang ma-balanse ang kaligtasan at pagbiyahe ngayong panahon ng new normal.

Sa pagtaya ng Department of Health hanggang nitong Agosto a – 15, umabot na sa mahigit 72 milyong Filipino na ang fully vaccinated.