NATIONAL NEWS

Sinalakay ng operatiba ng Bureau of Customs (BOC)  ang isang bodega sa Pampanga dahil sa umano’y ginagawang hoarding ng imported na asukal.

Ito ay matapos ipag-utos ni Executive Secretary Victor Rodriguez sa BOC batay na rin sa direktiba ni pangulong Ferdinand Marcos Jr. Ang pagbisita sa lahat ng customs bonded warehouse at pagsuri sa mga imbentaryo ng imported agricultural products.

Nahuli at kinilala ang mismong warehouse keeper na si Jimmy Ng, isang chinese filipino.

Nasamsam ng BOC sa nasabing bodega ang libo-libong sako ng imported na asukal mula sa Thailand at daan-daang sako ng asukal sa loob ng mga delivery van.

Nadiskubre rin ng ahensya ang imported items gaya ng sako ng corn starch mula sa China, harina, plastic products, motorcycle parts at iba pa.

Sakaling mapatunayan na naturang asukal ay smuggled, mahaharap ang mga may-ari ng bodega sa kasong smuggling in relation to the provisions of the Customs Modernization Act o CMTA.

Binibigyan naman ng labing limang araw ang may-ari ng bodega upang magpakita ng dokumento para patunayang legal ang inimport na mga produkto.

Nag-courtesy call kay Vice President at Education Secretary Sara Duterte ang ilang foreign ambassadors kahapon sa DepEd Central Office sa Pasig City.

Ayon kay VP Sara, nagpahayag ng suporta si Italian ambassador to the Philippines Marco Clemente sa mga mag-aaral sa pampublikong paaralan at ang pagpapakilala ng italian culture sa bansa, partikular sa musika at teatro.

Sunod namang bumisita sa pangalawang pangulo si Irish Ambassador to the Philippines William John Carlos, kung saan tinalakay ng dalawa ang bilateral relation sa pagitan ng Ireland at Pilipinas.

Bumisita rin kay Vice President Duterte si Vietnamese Ambassador to the Philippines Hoang Huy Chung kung saan tiniyak nito na laging magiging kasangga ng bansa ang Vietnam.

Nakatanggap rin ng painting si Duterte mula sa Vice President ng Vietnam, na isinabit sa conference room ng DepEd.

Sinabi pa ni VP Sara na kabilang sa kanilang napag-usapan ni Lao Ambassador Songkane Luangmuninthone ang kahalagahan ng english language bilang medium of instructions sa mga paaralan.

Unti-unti nang nakakarekober ang Philippine Ports Authority (PPA) mula sa epekto ng COVID-19 pandemic.

Ayon sa PPA, kumita sila ng 5.02 billion pesos sa unang kwarter ng 2022, mula sa 4.61 billion pesos na kinita sa kaparehong panahon noong 2021.

Nahigitan naman ng ahensiya ang target nilang 4.06 billion pesos na kita para sa nabanggit na buwan.

Samantala, dumoble rin ang bilang ng pasaherong naitala ng PPA kasabay ng unti-unting pagluluwag ng restriksyon sa bansa.

Magdaraos ng job fair ang Department of Labor and Employment (DOLE) sa ilang panig ng bansa katuwang ang Department of Tourism (DOT).

Ito ay para mapalakas hospitality industry at tourism sector sa bansa.

Ayon kay Labor Secretary Bienvenido Laguesma, gaganapin ang job fair sa Setyembre 22 hanggang 24 na may temang “Trabaho Turismo Asenso”.

Tututukan ng aktibidad ang mga lugar sa Metro Manila, Cebu at Davao na nakitaan ng kakulangan sa bilang ng manggagawa sa nasabing industriya.

Sinimulan na ng DOLE na makipag-ugnayan sa Philippine Hotel Owners Association upang matukoy ang mga bakanteng posisyon.

Bumilis pa ang internet speed sa Pilipinas nitong Hulyo.

Batay sa global speed monitoring firm na Speedtest by Ookla, umakyat sa ika-84 na pwesto ang Pilipinas sa 140 bansa.

Ito ay matapos bumilis sa 22.56 megabits per second (mbps) ang mobile download median speed ng bansa, mula sa 21.41 mbps noong Hunyo.

Samantala, ini-ranggo rin ang Pilipinas sa ika-46 na pwesto sa kabuuang 182 bansa para sa fixed broadband.

Kasunod ito ng pagbilis ng fixed broadband median download speed ng bansa sa 75.62 mbps mula sa 68.94 mbps noong Hunyo.

Ang pagbilis ng internet speed sa Pilipinas ay dahil sa agarang paglalabas ng permit ng mga LGU sa mga telcos company.

Hinimok ng Department of Transportation (DOTr) ang Department of Education (DepEd) at Commission on Higher Education (CHEd), namaglagay ng bike racks at shower sa mga paaralan.

Ayon kay Transporation Secretary Jaime Bautista, makatutulong ito upang mahikayat ang mga mag-aaral, guro at school personnel na gumamit ng bisikleta.

Iniangkla ni Bautista ang mungkahi sa Department Order 2020-014, kung saan pinapayagan ang mga kabataang edad 15 anyos pataas na gumamit ng bisikleta sa national at primary roads basta may kasamang matanda.

Samantala, nagpaalala rin ang DOTr sa mga motorista na sumunod lagi sa batas-trapiko lalo na ngayong balik-eskwela na ang mga mag-aaral.

Umapela rin ang opisyal sa Department of the Interior and Local Government (DILG), Metropolitan Manila Development Authority (MMDA) at Land Transportation Office (LTO) na mag-deploy ng maraming traffic enforcers at marshals lalo na sa mga school zone.

Nakapagtala muli ang Department of Health (DOH) na mas mababa sa 2,500 ang bagong nahawa sa COVID-19 sa bansa.

Sa datos ng DOH kahapon, bumaba sa 2,892 ang daily new cases, ang ikalawang araw na hindi lumampas sa 3,000 ang  bilang ng nagkasakit.

Bahagya ring bumaba ang active cases  sa 35,101 kumpara sa 36,190 noong Martes.

Samantala, nananatili sa 3,744,669 ang mga gumaling habang 61,173 ang mga nasawi dahil sa COVID-19.

Umakyat naman ang total case load sa 3,840,943.

Apat na araw bago ang pagbabalik-eskwela, pumalo na sa 21.8 milyong mag-aaral ang nag-enroll para sa school year 2022-2023.

Batay ito sa datos ng Department of Education (DepEd) hanggang kahapon.

Ayon sa DepEd, pinaka-marami ang nag-enroll sa CALABARZON, 3.1 million; Central Luzon, 2.4 million at National Capital Region, 2.3 million.

Pinaka-kaunti naman sa Cordillera Administrative Region na mayroong 360,668 enrollees.

Nakararanas na ng shortage sa suplay ng sibuyas ang ilang negosyo sa bansa.

Kabilang dito ang fast food chain na Burger King na aminadong kinakapos na ng supply ng puting sibuyas.

Para masolusyunan, inihayag ng pamunuan ng Burger King na dinamihan na lang nilaang paglalagay sa burger ng lettuce at kamatis.

Maliban sa Burger King, apektado rin ng shortage sa sibuyas ang ilang nagtitinda ng shawarma na isa sa kanilang pangunahing sangkap.

Batay sa inilabas na price watch ng Department of Agriculture, unavailable na ang puting sibuyas na unang pumalo sa 400 pesos ang kada kilo.

Una nang kinumpirma ng Department of Agriculture na kinakapos na ang suplay ng puting sibuyas at ang nakikitang solusyon ay ang pag-aangkat ng naturang produkto.

Lusot na sa Committee Level ng Kamara ang panukalang patawan ng excise tax ang single use plastic bags.

Sa House Ways and Means Committee hearing kahapon, inaprubahan ng lahat ng member ang House Bills 220 at 1811 o ang pagpapataw ng 20 pesos Excise Tax sa kada kilo ng single use plastic bag.

Sa sandaling maisabatas, aabot sa 900 million pesos ang makokolektang buwis ng gobyerno.

Layunin ng panukala na mabawasan ang paggamit ng single use plastic sa bansa ng hanggang 72% to 82% upang mabawasan ang masamang epekto nito sa kapaligiran.

Sa kasalukuyan, may kahalintulad din itong batas na umiiral sa Hong Kong, Cambodia, Malaysia, America at Canada.