NATIONAL NEWS

 Inihayag ng Department of Trade and Industry (DTI) na hindi na sakop ng price freeze ang pagpapalawig sa national health emergency bunsod ng COVID-19 sa bansa.

 Ayon kay DTI Consumer Protection Group Assistant Secretary Ann Cabochan, kapag extension lamang ang deklarasyon ng national health emergency ay hindi na nagpapatupad.

 Matatandaang una nang inihayag ni Pangulong Bongbong Marcos Jr. ang pag-pabor sa pagpapalawig ng state of public health emergency hanggang sa katapusan ng taon sa gitna ng nalalapit na pagtatapos nito sa Setyembre a-12.

Nanindigan ang limang alkalde sa National Capital Region (NCR) na mananatili ang pagpapatupad ng No Contact Apprehension Policy (NCAP) sa kabila ng ilang reklamo at batikos mula sa ilang indibidwal at grupo.

Pumirma sa isang joint statement ang mga alkalde ng Valenzuela City, Parañaque City, Quezon City, Manila City, at San Juan City upang ipahayag na mananatili ang NCAP sa kanilang mga lungsod.

Matatandaang noong Agosto a-16, apat na transport group ang naghain ng petisyon sa korte suprema upang ipatigil ang NCAP sa ilang lungsod sa Metro Manila.

Idineklara bilang special non-working holiday ang Agosto a-19 sa lungsod ng Quezon.

 Ayon sa pamahalaan ng lungsod ito ay upang gunitain ang ika-144 na kaarawan ng dating pangulong si Manuel L. Quezon.

 Samantala, bunsod nito ay walang pasok sa mga pribado at pampublikong mga opisina, maliban na lamang sa health and rescue, fire protection at law enforcement.

Magsasagawa sa Setyembre a-otso ng Nationwide Simultaneous Earthquake Drill ang National Disaster Risk Reduction and Management Council (NDRRMC).

Ayon kay NDRRMC Spokesman Mark Timbal, isasagawa ang earthquake drill bilang paghahanda sa mga kalamidad gaya ng lindol lalo na’t muli nang sasalang ang mga estudyante sa face-to-face classes.

Matatandaan na noong Hulyo ay niyanig ng magnitude 7.0 na lindol ang Abra na puminsala sa maraming istruktura.

Nakatakdang isumite ng Department of Budget and Management (DBM) sa kamara ang National Expenditure Program (NEP) para sa taon 2023 o ang panukalang pambansang pondo sa darating na Lunes, August 22.

Batay sa abiso ng kamara, pangungunahan ni DBM Secretary Amenah Pangandaman ang pagpasa ng NEP kay House Speaker Martin Romualdez alas diyes ng umaga na susundan ng presentasyon ng DBM ukol sa nilalaman nito sa Lunes.

Nauna nang inihayag na nasa 5.268-trillion pesos ang panukalang budget para sa susunod na taon na siyang kauna-unahang pambansang pondo sa ilalim ng Marcos Jr. administration.

Habang nauna na ring tiniyak ng mga lider ng mababang kapulungan ang maayos at mabilis na pag-apruba sa 2023 national budget alinsunod sa timeline itinakda nito. – sa ulat ni Tina Nolasco (Patrol 11)

Tumaas ng 20% ang bilang ng bagong kaso ng monkeypox virus sa buong mundo.

Ayon kay World Health Organization (WHO) Director-General Dr. Tedros Ghebreyesus, nasa 7500 ang naiulat na kaso noong nakaraang linggo.

Dahil dito, umabot na sa 3500 ang kabuuang monkeypox cases na naitala sa 92 bansa.

Sinabi naman ng WHO na dapat tiyakin ng lahat ng bansa ang kahandaan nito laban sa naturang virus.

Matatandaang nakapagtala ang Pilipinas ng unang kaso ng monkeypox virus noong Hulyo 29.

Nanindigan ang Metro Manila Mayors sa kanilang desisyon na panatilihin ang pagpapatupad ng No-Contact Apprehension Program (NCAP)sa kabila ng inihain petisyon sa supreme court para sa Temporary Restraining Order(TRO).

Batay sa isang joint statement, nangako ang mga alkalde ng rehiyon na ipagpapatuloy ang pag-improve ng imprastruktura at mga kalsada para sa mas ligtas na kapaligiran.

Para sa local chief executives, may kani-kaniyang traffic adjudication board ang bawat local government unit kung saan maaaring tutulan o iprotesta ng mga motorista ang ipinataw na violations sa kanila.

Maliban dito, hinimok naman nila ang lahat ng ahensya na suportahan sila sa pagsusulong ng mga International-Proven Program para sa epektibong traffic management.

Ang naturang joint statementary pirmado nina Valenzuela City Mayor Wes Gatchalian, Parañaque City Mayor Eric Olivarez, Quezon City Mayor Joy Belmonte, Manila Mayor Maria Sheila Lacuna, at San Juan City Mayor Francis Zamora.

Dumaraan na sa pag-aaral ni Pangulong Ferdinand “Bongbong” Marcos Jr. ang isang proposal para sa pagsasaayos ng water resources ng bansa.

Sa pamamagitan ng Integrated Water Resources Management Program, maipapatupad dito ang organisadong pagsasaayos at pangangasiwa ng tubig, lupa at katulad na resources sa bansa ng hindi nakukumpromiso ang ecosystem.

Sinabi pa ng pangulo na sa pamamagitan nito, magkakaroon ng strategic framework para sa National Water Management, Policymaking at Planning.

Mahahagip din aniya ng ipinapanukalang programa ang paghahanap ng mga bagong water supply na dito ay makikinabang ang mga urban areas.

Layunin aniya nitong masiguro na may malinis na inuming tubig na magiging available sa lahat ng pilipino kahit pa sa malalayo at liblib na lugar sa bansa.

Apektado rin nang pagtaas ng presyo ng asukal ang mga manufacturer ng gamot.

Ipinabatid ni Higinio Porte, Jr., Pangulo ng Philippine Pharmaceutical Manufacturers Association na apektado ang produksyon nila ng syrup at suspension na ang 20% to 30% formulation ay gawa sa asukal.

Sinabi ni Porte na hindi naman uubrang magtaas ng presyo ang mga gumagawa ng gamot kaya’t umaapela sila sa gobyerno na palakasin ang lokal na produksyon ng asukal.

Ina-absorb na lamang aniya ng manufacturers ang halos 100 pisong halaga na ng refined sugar kada kilo.