NATIONAL NEWS

Nagsagawa ng meeting ang mga tauhan at opisyal ng Department of Social Welfare and Development (DSWD) para sa mas pinaigting na pagbabantay sa posibleng epekto ng Bagyong Florita sa Northern at Central Luzon.

Pinangunahan ni DSWD secretary Erwin Tulfo ang pagpupulong na dinaluhan ng mga Regional Directors ng Regions 1, 2, 3, Cordillera Administrative Region (CAR) at National Capital Region (NCR).

Layunin ng ahensya na masigurong handa ang kanilang field offices sa pagtugon sa mga maaapektuhan ng Bagyong Florita.

Ayon kay Tulfo, mahigpit nilang mino-monitor ang Abra at Mountain Province na una nang nagpatupad ng Preemptive Evacuation dahil sa posibleng paglambot ng lupa sa mga lugar na niyanig ng Magnitude 7 na lindol.

Samantala, naka-standby narin ang mga tauhan ng ahensya na handang mamahagi ng relief goods at iba pang tulong sa mga Local Government Units (LGUs).

Sa ngayon, nakahanda na ang nasa kabuuang 22, 982 family food packs at 5, 610 non-food items para sa distribusyon sa mga residenteng maaapektuhan ng kalamidad.

Inanunsiyo ng Metropolitan Manila Development Authority (MMDA) na sinuspinde narin maging ang operasyon ng Pasig River Ferry Service (PRFS) at Philippine National Railways (PNR).

Ito ay dahil sa masamang panahon na nararanasan sa ilang bahagi bansa bunsod ng Bagyong Florita at Hanging Habagat.

Ayon sa MMDA, maglalabas sila ng panibagong abiso sa publiko kung palalawigin ang suspensyon sa operasyon ng mga Ferry Service at PNR.

Suspendido hanggang ngayong araw ang pagpapatupad ng Expanded Number Coding Scheme sa National Capital Region.

Ayon sa Metropolitan Manila Development Authority (MMDA), ang nasabing kautusan ay direktiba ng Malacañang na pansamantalang suspendihin ang pasok sa mga tanggapan ng gobyerno.

Bukod pa dito, sinuspinde din ang pasok sa mga pampublikong paaralan na epektibo mula pa kahapon hanggang ngayong araw dahil sa masamang panahon bunsod ng Bagyong Florita at Hanging Habagat.

Layunin nitong mailayo sa disgrasya ang mga motorista, empleyado at mga estudyante partikular na ang mga tauhan ng kanilang ahensya lalo na ngayong panahon ng tag-ulan.

Bahagyang humina ang Bagyong Florita habang kumikilos patungong West Philippine Sea.

Namataan ang sentro ng bagyo 80 kilometers northwest ng Laoag City, Ilocos Norte na may lakas ng hanging aabot sa 95 kilometers per hour at pagbugsong aabot sa 145 kilometers per hour.

Kumikilos ang Bagyong Florita pakanluran-hilagang-kanluran sa bilis na 25 kilometers per hour.

Nakataas ang Signal no. 3 sa hilagang-kanluran ng Ilocos Norte kabilang na ang Bacarra, Pasuquin, Burgos, at Bangui.

Signal no. 2 sa hilagang-kanluran ng Mainland Cagayan kabilang na ang Ballesteros, Abulug, Pamplona, Sanchez-Mira, Claveria, Santa Praxedes, Kanlurang bahagi ng Babuyan Islands kabilang na ang Calayan Islands, Dalupiri Islands, at Fuga Islands.

Signal no. 2 din sa Apayao, hilagang bahagi ng Abra kabilang na ang Tineg, Lacub, Lagayan, San Juan, Lagangilang, Dolores, Tayum, La Paz, Danglas, Bangued, Langiden, Pidigan, San Quintin, San Isidro, at Peñarrubia maging ang nalalabing bahagi ng Ilocos Norte, at hilagang bahagi ng Ilocos Sur kabilang na ang Santa, Caoayan, City of Vigan, Santa Catalina, Santo Domingo, San Vicente, San Ildefonso, Bantay, Magsingal, San Juan, Cabugao, Sinait, Narvacan, Nagbukel, Santa Maria, at San Esteban.

Signal no. 1 naman sa Batanes, nalalabing baagi ng Babuyan Islands, nalalabing bahagi ng Mainland Cagayan, hilaga at kanlurang bahagi ng Isabela kabilang na ang Cordon, Ramon, San Mateo, Cabatuan, Aurora, San Manuel, Burgos, Quirino, Delfin Albano, Cabagan, Tumauini, San Pablo, Santa Maria, Santo Tomas, Quezon, Mallig, Roxas, at Maconacon.

Signal no. 1 din sa hilagang bahagi ng Nueva Vizcaya kabilang na ang Kayapa, Ambaguio, Villaverde, Solano, Bagabag, at Diadi maging sa nalalabing bahagi ng Abra, Mountain Province, Ifugao, Benguet, at nalalabing bahagi ng Ilocos Sur, at La Union.

 Inanunsiyo ng Department of Agriculture (DA) na bukod sa asukal ay may kakulangan na rin sa suplay ng asin sa bansa.

 Ayon kay DA Undersecretary Domingo Panganiban ito ang rason kung bakit naglagay sila ng 100 million pesos sa 2023 national budget upang mapabuti ang produksyon ng asin sa bansa.

 Dagdag pa ni Panganiban, umaangkat pa rin ng asin ang Pilipinas ngunit hindi niya sinabi ang dami ng asin na inaangkat.

 Samantala, nilinaw din ng opisyal na hindi isinama ng Bureau of Fisheries and Aquatic Resources (BFAR) sa kanilang panukalang budget ang pondo para sa produksyon ng asin.

Nalampasa na ng Department of Education (DEPED) ang kanilang target na 28.6 million na enrollees para sa school year 2022-2023.

Ito ay matapos na pumalo sa kabuuang 28,797,660 ang bilang ng mga naka-enroll nang estudyante.

Mababatid na nagsimula ang enrollment period noong Hulyo a-25 at natapos kahapon o sa unang araw ng klase.

Samantala, sinabi naman ni DEPED Spokesperson Michael Poa na bunsod nito ay naiulat din ng ahensya ang kakulangan sa mga silid-aralan na aabot sa halos 40,000 sa buong bansa.

 Naniniwala ang isang eksperto na mayroon nang local transmission monkeypox virus sa Pilipinas.

Ito ay matapos makumpirma ang isang kaso ng naturang sakit sa Iloilo.

Ayon kay Infectious Disease Expert Dr. Rontgene Solante, importanteng malaman ng Department of Health (DOH) ang nakasalamuha ng pasyente na sinasabing may monkeypox.

Aniya, isang magandang indikasyon na nakita ng mga dalubhasa ang kaso ng monkeypox sa Pilipinas.

Sinabi naman ni DOH-OIC Maria Rosario Vergeire, na inaalam nila kung may nakasalamuhang banyaga ang sinasabing pasyente dahil ang ibang nakasalamuha ng pasyente ay hindi umano nagpakita ng sintomas ng nasabing sakit.

Pinalitan na ni Pangulong Ferdinand Marcos Jr. ang Build Build Build (BBB) program ng nakaraang administrasyon.

 Sinabi ng punong ehekutibo sa kaniyang budget message na sa pamamagitan ng Build, Better, More (BBM) program ay hindi lamang ipagpapatuloy ng kanyang administrasyon ang infrastructure program ng Duterte administration kundi palalawigin pa ito.

 Mababatid na sa ilalim ng 2023 National Expenditure Program, may kabuuang 1.196 trillion pesos na pondong nakalaan para sa infrastructure program.

 Samantala, kasama rin sa BBM program ang pagpapatuloy ng mga transportation infrastructure project ng nakaraang administrasyon gaya ng North-South Commuter Railway, Metro Manila Subway Project, at LRT-1 Cavite extension project.