NATIONAL NEWS

Nalampasa na ng Department of Education (DEPED) ang kanilang target na 28.6 million na enrollees para sa school year 2022-2023.

Ito ay matapos na pumalo sa kabuuang 28,797,660 ang bilang ng mga naka-enroll nang estudyante.

Mababatid na nagsimula ang enrollment period noong Hulyo a-25 at natapos kahapon o sa unang araw ng klase.

Samantala, sinabi naman ni DEPED Spokesperson Michael Poa na bunsod nito ay naiulat din ng ahensya ang kakulangan sa mga silid-aralan na aabot sa halos 40,000 sa buong bansa.

 Naniniwala ang isang eksperto na mayroon nang local transmission monkeypox virus sa Pilipinas.

Ito ay matapos makumpirma ang isang kaso ng naturang sakit sa Iloilo.

Ayon kay Infectious Disease Expert Dr. Rontgene Solante, importanteng malaman ng Department of Health (DOH) ang nakasalamuha ng pasyente na sinasabing may monkeypox.

Aniya, isang magandang indikasyon na nakita ng mga dalubhasa ang kaso ng monkeypox sa Pilipinas.

Sinabi naman ni DOH-OIC Maria Rosario Vergeire, na inaalam nila kung may nakasalamuhang banyaga ang sinasabing pasyente dahil ang ibang nakasalamuha ng pasyente ay hindi umano nagpakita ng sintomas ng nasabing sakit.

Pinalitan na ni Pangulong Ferdinand Marcos Jr. ang Build Build Build (BBB) program ng nakaraang administrasyon.

 Sinabi ng punong ehekutibo sa kaniyang budget message na sa pamamagitan ng Build, Better, More (BBM) program ay hindi lamang ipagpapatuloy ng kanyang administrasyon ang infrastructure program ng Duterte administration kundi palalawigin pa ito.

 Mababatid na sa ilalim ng 2023 National Expenditure Program, may kabuuang 1.196 trillion pesos na pondong nakalaan para sa infrastructure program.

 Samantala, kasama rin sa BBM program ang pagpapatuloy ng mga transportation infrastructure project ng nakaraang administrasyon gaya ng North-South Commuter Railway, Metro Manila Subway Project, at LRT-1 Cavite extension project.

Nangangalap ng 31 bilyon piso ang administrasyong marcos Jr. para sa National Disaster Risk Reduction and Management (NDRRMF) fund para sa taong 2023.

 Batay sa National Expenditure Program 2023, gagamitin ang pondo para sa aid, relief at rehabilitation services ng mga komunidad na apektado ng human-induced at natural calamities.

 Kabilang din dito ang repair at reconstruction ng mga permanenteng imprastraktura, kabilang na ang ibang capital expenditures para sa disaster operation at rehabilitation activities.

 Maaaring ikonsidera ang rekomendasyon ng National Disaster Risk Reduction and Management Council (NDRRMC) kung ito ay sasailalim sa pag-apruba ng pangulo para sa mga lokal na kalamidad o ng angkop na ahensya para sa international crises.

Mababatid na sa ilalim ng expenditure program ay magkakaroon ng karagdagang pagkukunan ng pondo ang pamahalaan para sa quick response fund ng implementing agency. –  sa panulat ni Hanhah Oledan

Umabot na sa 180 pamilya ang inilikas sa Cagayan Valley at Cordillera Administrative Region (CAR) bunsod ng bagyong Florita.

 Batay sa ulat ng national disaster risk reduction and Management Council (NDRRMC) na 110 pamilya ang inilikas mula sa CAR habang pitumpung pamilya naman ang mula sa Cagayan Valley.

 Kanselado na rin ang mga klase sa lungsod ng CAR, Ilocos region, Cagayan Valley, Central Luzon, at Bicol.

 Suspendido naman ang trabaho sa ilang siyudad at munisipalidad sa Ilocos region at Cagayan.

 Naiulat din ang tatlong rain-induced landslides sa Ilocos region at Bicol region habang dalawang insidente ng pagbaha naman ang naitala sa Ilocos region. –  sa panulat ni Hannah Oledan

Umapela ang Malacañang sa kongreso para sa 9 billion pesos na budget para sa taong 2023 kasama na rito ang 4.5 billion pesos para sa confidential at intelligence funds.

 Nakasaad sa 2023 National Expenditure Program na isinumite sa House of Representatives, humiling ang Office of the President (OP) ng 9,031,722,000 pesos na pondo para mapanatili ang kanilang operasyon hanggang sa susunod na taon.

 Kabilang sa paglalaanan ng pondo ay ang mga sumusunod:

• 7 milyong piso para sa retirement at life insurance premiums ng mga empleyado.
• 87 billion pesos para sa maintenance at iba pang operating expenses
• 56 bilyong piso para sa personal services
• 590 milyong piso para sa capital outlay

 Iminumungkahi naman ng palasyo ang 2.25 bilyong piso para sa confidential expenses at isa pang 2.25 bilyong piso para sa intelligence fund.

 Isinumite naman ng Department of Budget and Management (DBM) ang kanilang proposed 5.268 trillion pesos na national budget para sa taong 2023.

 Nananatili namang highest budgetary priority ang sektor ng edukasyon, ayon sa mandato ng konstitusyon, at makatatanggap ng 8.2% increase sa 852.8 billion.

 Pag-lalaanan naman ang mga programa sa imprastraktura ng kabuuang P1.196 trilyon, na nakikitang tutulong sa pagbangon ng ekonomiya kasunod ng pagbagsak nito dulot ng pandemya. – sa panulat ni Hannh Oledan

Tumaas na rin ang presyo ng mga pagkain sa school canteen sa isang partikular na paaralan sa Parañaque City.

 Nasa dalawang piso hanggang limang piso ang itinaas ng mga tindang pagkain kaugnay sa pagtataas ng presyo ng mga bilihin.

 Bukod sa pagtataas ng presyo, nauubos din ang break time ng mga estudyante sa pagpila para makabili ng pagkain.

 Siniguro naman ng pamunuan ng eskwelahan na gagawa sila ng paraan para hindi na masayang sa mahabang pila ang oras ng mga estudyante para sa pagkain.

 Imbes na estudyante ang lalabas para bumili ng pagkain, magde-deploy na lamang sila ng mga maglalako sa labas ng mga silid-aralan.  –  sa panulat ni Hannah Oledan

Hindi pinayagan ng Land Transportation Franchising and Regulatory Board (LTFRB) ang isang transport group na ibalik ang ilang ruta na konektado sa university belt.

 Sa panayam ng DWIZ, sinabi ni Boy Vargas, Presidente ng Alliance of Transport Operators and Drivers Association of the Philippines (ALTODAP), lumapit ito sa LTFRB para ibalik ang mga ruta ng Francisco Homes–Araneta Center, Lagro-Cubao–Araneta Center, Antipolo Cubao via Cubao, at Antipolo-JRU.

 Ngunit ang tanging binuksan lamang ay ang mga ruta ng bulacan, cavite na papuntang Parañaque Integrated Terminal Exchange (PITX).

 Pinaliwanag naman ni Vargas ang importansya ng pagbubukas ng mga ruta sa u-belt.

 Giit pa ni Vargas, kung magsasagawa ang LTFRB ng pag-aaral patungkol sa mga ruta ay dapat isama sila ng mga ito.

Suportado ng United Sugar Producer Federation (UNIFED) ang pagbaba ng presyo ng asukal sa 70 piso kada kilo.

 Sa panayam ng DWIZ, sinabi ni Manuel Lamata, Presidente ng UNIFED, na boluntaryong nakipag-ugnayan ang kanilang mga miyembro sa presidente upang ibaba ang presyo sa kada kilo ng asukal.

 Ngunit aniya, hindi na nila kayang ibaba ito sa animnapung piso.

 Kumbinsido naman si lamata na artipisyal lamang ang sugar shortage na kinakaharap ng bansa.

 Kaugnay nito, naniniwala si Lamata na may economic sabotage sa artificial sugar shortage na kinakaharap ng bansa at dapat paimbestigahan ang mga sangkot sa ilegal na pag iimbak ng asukal. – sa panulat ni Hannah Oledan

Tatanggapin pa rin ng Department of Education(DepEd) ang mga late enrollee.

Kasunod na rin ito nang opisyal na pagtatapos ng enrollment kahapon kasabay nang pagbubukas ng klase para sa school year 2022-2023.

Ayon kay Atty Michael Poa, spokesman ng Dep Ed, ipinag utos ni Vice President at Education Secretary Sara Duterte-Carpio sa lahat ng public schools na tanggapin pa rin ang mga estudyanteng  late nang pinagenrol ng kanilang mga magulang.

Binigyang diin ni Poa na hindi dapat ipagkait amg edukasyon sa mga batang Pilipino dahil late lamang sila nakapag enrol.

Hanggang kahapon, nasa 28, 035, 042 na ang pumasok sa eskuwelahan mula kindergarten hanggang senior high school.