NATIONAL NEWS

Plano ng National Irrigation Administration (NIA) na magtayo ng mas marami pang mga Dam sa ibat-ibang lugar sa Pilipinas.

Ayon kay NIA Administrator Benny Antiporda, layon ng kanilang ahensya na pumasok sa public at private partnership para sa pagpapatayo ng mga Dam sa buong bansa.

Sinabi ni Antiporda, na aabot sa P800 bilyong ang halaga ng pondong kakailanganin para sa naturang proyekto upang matugunan ang mga problema at suhestiyon sa irigasyon at masiguro ang sapat na suplay ng tubig sa panahon ng tag-init.

Samantala, siniguro naman ng ahensya na may sapat na mapagkukuhanan ng suplay ng tubig ang bansa sakaling kailanganin ito sa summer season.

Bumuo na ng Special Investigation Task Group (SITG) ang Philippine National Police (PNP) para magsagawa ng malalimang imbestigasyon sa pagkasawi ng apat na indibidwal na natagpuan sa loob ng isang abandonadong kotse sa Barangay Macabud, Rodriguez, Rizal.

Sa report ng Rodriguez Municipal Police Station, nakatanggap sila ng tawag tungkol sa mga hindi kilalang bankay na natagpuan sa loob ng isang NISSAN na may plakang NGU 1923.

Dalawa sa mga biktima ang nakilala na ng kanilang mga kamag-anak, habang patuloy pang inaalam ng mga otoridad ang pagkakakilanlan sa dalawa pang babaeng biktima.

Ayon kay PNP chief Police Gen. Rodolfo Azurin Jr., inaalam na ng mga tauhan ng SITG ang motibo para mapanagot ang mga suspek sa naganap na krimen.

Samantala, sinabi naman ni PNP Public Information Office chief Police Brig. General roderick Augustus Alba na patuloy pang tinitignan ng kanilang ahensya ang sunod sunod na mga kaso ng pagdukot at pagkamatay na iniuulat umano sa social media.

Bukod pa dito, nakadepende din sa pagtaya ng mga ground commanders kung may sapat na basehan para irekomenda ang paglikha ng SITG upang imbestigahan ang naturang insidente.

Inihayag ng Commission on Elections (COMELEC) na posibleng mangailangan ang kanilang ahensya ng mas malaking halaga ng pondo kung ipagpapaliban ang Barangay at Sangguniang Kabataan Elections sa susunod na taon.

Sa isinagawang pagdinig ng Senate Committee on Electoral Reforms and People’s Participation, sinabi ni Comelec chairman George Garcia na posibleng pumalo sa P17 billion ang pondo kailan kung iuurong ang BSK Election sa May 2023 habang P18 billion naman kung sa December 2023 naman isasagawa ang halalan para sa Barangay at SK.

Nilinaw ni Garcia na kung i-re-reset ang eleksiyon, posibleng muling buksan ng COMELEC ang registration at inaasahang aabot sa tatlo hanggang limang milyon ang karagdagang magpaparehistro.

Ayon kay Garcia, aabot lang sa P8.5 billion ang magiging pondo at mas makakatipid ang ahensya kung matutuloy ang Barangay at SK Election ngayong December 5, 2022.

Samantala, ikinagulat naman ni Committee chairman Senator Imee Marcos ang pagdoble ng kakailanganing pondo sa Barangay at SK Elections.

Iginiit ng Senadora na hindi na dapat pang i-postpone ang naturang Halalan dahil naipangako na noon, na ito na ang huling pagpapaliban sa botohan.

Nanawagan si Senator Imee Marcos sa Philippine National Police (PNP) at National Bureau of Investigation (NBI) na imbestigahan ang serye ng pandurukot at pamamaslang sa mga indibidwal partikular na sa mga kabataang kababaihan sa ilang lugar sa bansa.

Ayon sa Senadora, dapat siyasatin ng mga otoridad kung ano ang nag-ugat sa pagkawala sa isang 15-anyos na babaeng biker sa san Jose Del Monte City na natagpuang wala nang buhay sa Bustos, Bulacan.

Nabatid na may mga pasa, paso ng sigarilyo, at mga strangulation marks o fracture ang dalagita na nagpapakitang ginahasa ito batay na rin sa resulta ng isinagawang forensic autopsy ng mga otoridad.

Sinabi ni Senator Imee na nakababahala na ang naitatalang magkakasunod na krimen sa mga kababaihan lalo pa’t nagsimula na ang Balik-Eskwela para sa 28K estudyante.

Iginiit ng Senadora na dapat maparusahan ang mga salarin na nasa likod ng pagkawala ng mga indibidwal lalo na ng mga kababaihang ginahasa at brutal na pinaslang.

Sa ngayon, pinamamadali na ni Senator Marcos ang pagkilos ng mga Law Enforcement Agencies upang masugpo ang insidente ng sunod-sunod na pagdukot at pagpaslang sa mga inosente.

Apat na mga bangkay ang natagpuan sa loob ng isang abandonadong kotse sa bulubunduking bahagi ng Rodriguez, Rizal.

Ayon sa Hepe ng Rodriguez PNP na si Police Lt. Col. Marcelino Pipo, nakatanggap sila ng report mula sa isang concerned citizen hinggil sa nakitang mga Bangkay sa Barangay Macabud.

Sa imbestigasyon ng mga otoridad, nagduda na ang mga residente dahil hindi nila kilala ang naturang sasakyan kung saan, ilang oras na itong nakaparada sa nasabing lugar.

Dito na naglakas ng loob ang mga residente na silipin ang loob ng kotse at dito na nakita ang apat na katawan ng mga biktima kabilang na ang dalawang lalaki at dalawang babae.

Sa pahayag ng mga otoridad, may mga tama ng bala sa ulo at katawan ang mga biktima pero walang bakas ng dugo sa sasakyan kaya posibleng hindi ito sa sasakyan binaril o pinatay.

Nakuha sa loob ng sasakyan ng mga otoridad, ang apat na piraso ng pinaghihinalaang shabu.

Sa ngayon, isa palang umano ang nagpakilalang kamag-anak ng isa sa mga biktima na ngayon ay kinukuhanan na ng salaysay ng mga otoridad.

Nakaantabay na ang Northern Luzon Command ng Armed Forces of the Philippines (AFP) sa mga lugar na maaapektuhan ng Bagyong Florita matapos itong mag-landfall sa Maconacon, Isabela kahapon ng umaga.

Ayon kay Lt. Gen. Ernesto Torres Jr., Commander ng Northern Luzon Command, bago paman maglandfall ang Bagyong Florita sa nabanggit na lugar ay na-ideploy na ang kanilang mga tauhan sa hilagang bahagi ng bansa.

Sinabi ni Torres na kanila nang ipinakalat ang iba’t ibang unit ng Joint Task Force kasama ang kanilang mga kagamitan bilang Disaster Response at para maasistehan ang mga residente sa Central at Northern Luzon.

Nakamonitor narin ang Joint Task Force “Karagatan” ng Naval Forces Northern Luzon Command ng Philippine Navy sa bahagi ng Laoag City at Ilocos Norte habang nagsasagawa na ng Humanitarian Assistance and Disaster Response Operations ang mga miyembro ng Tactical Operations Wing Northern Luzon at Philippine Air Force’s Disaster Response and Rescue Teams para sa mga apektadong lugar.

Bukod pa dito, nagbigay din ng tulong ang 77^th Infantry Battalion at 5^th Infantry Division sa mga kababayang Pilipino sa Cagayan at Isabela Provinces.

Samantala, nilinaw naman ni Torres na maliban sa Internal Security at Territorial Defense, layunin rin ng NOLCOM na tugunan ang Disaster Relief and Response Operations sa mga lugar na makararanas ng kalamidad.

Nagsagawa ng meeting ang mga tauhan at opisyal ng Department of Social Welfare and Development (DSWD) para sa mas pinaigting na pagbabantay sa posibleng epekto ng Bagyong Florita sa Northern at Central Luzon.

Pinangunahan ni DSWD secretary Erwin Tulfo ang pagpupulong na dinaluhan ng mga Regional Directors ng Regions 1, 2, 3, Cordillera Administrative Region (CAR) at National Capital Region (NCR).

Layunin ng ahensya na masigurong handa ang kanilang field offices sa pagtugon sa mga maaapektuhan ng Bagyong Florita.

Ayon kay Tulfo, mahigpit nilang mino-monitor ang Abra at Mountain Province na una nang nagpatupad ng Preemptive Evacuation dahil sa posibleng paglambot ng lupa sa mga lugar na niyanig ng Magnitude 7 na lindol.

Samantala, naka-standby narin ang mga tauhan ng ahensya na handang mamahagi ng relief goods at iba pang tulong sa mga Local Government Units (LGUs).

Sa ngayon, nakahanda na ang nasa kabuuang 22, 982 family food packs at 5, 610 non-food items para sa distribusyon sa mga residenteng maaapektuhan ng kalamidad.