NATIONAL NEWS

Naglaan ng 2.5 billion pesos na pondo ang Department of Budget and Management (DBM) para paghusayin ang mga paliparan sa buong bansa.

Ito’y alinsunod sa nais ni Pangulong Ferdinand Bongbong Marcos Jr. na palakasin ang transportation infrastructure sa Pilipinas.

Sa ilalim ng 2023 National Expenditure Program (NEP), itinaas ng DBM ang budget ng Department of Transportation (DOTr) sa 120.4% o katumbas ng 167.1 billion pesos mula sa 75.8 billion pesos na pondo ngayong 2022.

Maliban sa mga malalaking railway at road transport project ang pagsasamoderno ng aviation project ay tututukan din ng pamahalaan.

Sinabi ni Budget Secretary Amenah Pangandaman, sa pamamagitan ng paglalaan ng pondo para sa improvement ng mga naturang proyekto, maipatutupad aniya ang mga direktiba ni Pangulong Marcos Jr. na Build Better More (BBM).

Kinilala ang Pilipinas sa larangan ng turismo ngayong taon.

Ito’y matapos kilalanin ang Pilipinas sa naganap na 29th World Travel Award sa Vietnam.

Ang Pilipinas ang nangunguna sa beach at dive destination sa Asya.

Ito na ang ika-apat na sunod na taong pagkilala sa mga diving spot sa Pilipinas habang ito ang ika-anim na pagkilala sa ganda ng mga dalampasigan ng bansa.

Bukod dito, nanguna rin ang Intramuros, Manila bilang tourist attraction sa Asya na tinalo ang Angkor Temples ng Cambodia at Taj Mahal ng India.

Dahil dito, ikinatuwa at ipinagpasalamat ni Tourism Secretary Kristina Frasco ang pagkilala sa bansa at binigyang diin ang kahalagahan ng turismo.

Ang World Travel Awards (WTA) na nabuo sa Europa nuong 1993 ay itinuturing na Oscars sa larangan ng turismo.

Inaasahang agad na maglalabas ang Office of the Executive Secretary ng Executive Order para sa boluntaryong pagsusuot at paggamit ng face mask sa buong bansa.

Ayon kay Department of Health (DOH) Officer In Charge Maria Rosario Vergeire na sumang-ayon na verbally si Pangulong Ferdinand Bongbong Marcos Jr. pero kailangan pa itong opisyal na magawan ng kautusan o maisyuhan ng legal document.

Aniya, inaasahan na agad na mailalabas ng Palasyo ang EO at kailangan na lamang itong hintayin.

Dahil naipaabot na ang rekomendasyong ito sa pangulo at nakuha naman ang kaniyang pag-apruba, inianunsyo na aniya nila para malaman ng publiko ang resolusyon ng Inter-Agency Task Force (IATF).

Suportado ng Department of Science and Technology (DOST) ang paggamit muli ng nuclear power bilang tugon sa iba pang pangangailangan ng bansa.

Ito’y dahil pa rin sa kinakaharap na mataas na presyo ng kuryente.

Sinabi ni DOST Secretary Renato Solidum, bukas ang ahensiya sa nasabing mungkahi para sa isang science based technology at para makatulong na rin sa pagresolba sa mga kinakaharap na hamon ng bansa.

Maliban dito, kinokonsidera rin ng ahensiya ang paggamit ng nuclear energy para sa kanilang energy mix.

Iginiit ni Solidum sakaling matuloy ang paggamit ng nuclear energy ng bansa, susuportahan naman ito ng DOST sa pangunguna ng Department of Energy (DOE).

Itinanggi ni MECO Head Silvestre Bello, III ang report na pansamantalang sinuspinde ng Taiwan ang visa free privilege nito para sa mga Pilipino.

Ayon kay Bello, nakausap niya si Taiwanese representative to the Philippines Michael Pei-Yung Hsu na nagsabing posibleng nagkaruon lamang ng misunderstanding sa naturang report.

Sinabi ni Bello na batay sa paliwanag ng ambassador, hindi naman nabanggit ang Pilipinas sa anunsyo mismo ng Taiwan hinggil sa iniaalok na visa free entry sa ibang bansa tulad ng Amerika, United Kingdom, Canada at mga bansa sa Europa.

Hindi nasasagot ng Pinaslakas Vaccination Campaign ang takot ng mga Pilipino sa side effects ng COVID-19 booster shots.

Ayon ito kay Dr. Maricar Limpin, Immediate Past President ng Philippine College of Physicians (PCP) dahil “more political” aniya ang dating ng nasabing kampanya kaya’t hindi ito makabuluhan sa publiko.

Sinabi ni Limpin na sa naturang kampanya, lalakas ang Pilipinas subalit dapat ding makita ang inaasahang aksyon mula sa publiko.

Magugunitang target ng gobyerno na hanggang nitong Hulyo ay makapagbigay ito ng booster shots sa 23 million Pinoys subalit hanggang nitong September 6 ay nasa 2.2 million pa lamang ang nabibigyan ng booster jabs.