NATIONAL NEWS

Naka-isolate na rin ang anim na crew ng Philippine Airlines flight PR-300 na sinakyan ng lalaking kauna-unahang monkeypox case ng Hong Kong.

Ang anim na flight crew ng PAL na umalis ng Manila noong September 5 patungong Hong Kong ay pawang close contact ng lalaking pasaherong nakitaan ng sintomas ng nasabing virus.

Kinumpirma ni PAL Spokesperson Cielo Villaluna na inabisuhan sila ng kanilang company physician na obserbahan ang flight crew kahit pa walang sintomas ang mga ito ng monkeypox.

Ayon kay Villaluna, kahit ang eroplano na wala namang monkeypox issue ay sasailalim sa mandatory aerosol disinfection.

Nagpadala na rin anya sila ng manifesto ng flight PR300 sa DOH at Hong Kong health authorities upang makatulong sa pagtunton sa mga pasaherong nakasalamuha ng lalaking pasyente.  —sa ulat ni Raoul Esperas (Patrol 45)

Pagkatapos ng dalawang sunod na buwan ng rollback, inaasahan na magtataas ng singil sa kuryente ang Manila Electric Company (Meralco) para sa buwan ng Setyembre.

 Ayon sa Meralco, bunsod ng pagtaas ng generation charge, 39 centavos kada kilowatt hour ang halaga ng aasahan na dagdag-singil sa September bill.

 Mababatid na ng naturang taas singil ay bunsod pa rin ng mas mahal na presyo ng gasolina at mas mahinang halaga ng lokal na pera.

Binuksan ng Department of Foreign Affairs (DFA) ang 800,000 na passport appointment slots sa buong bansa.

 Ito’y matapos na sitahin ni Senator Imee Marcos sa organizational meeting ng Senate Committee on Foreign Relations ang DFA nang lumabas sa website nito na March 2023 pa mayroong mga available slot para sa passport appointment.

 Ayon kay DFA Asec. Henry Bensurto, may ilang lugar na may slot ng September at October at mayroon din aniyang passport on wheels at mga courtesy lane para sa senior citizen, Person with disabilities (PWD) at mga buntis.

 Samantala, kabilang sa isinusulong ng ahensya ang pagkakaroon ng emergency passport para naman sa mga special cases.

Nanindigan ang Department of Health (DOH) na panatilihing ‘mandatory’ pa rin ang pagsusuot ng face mask sa gitna ng COVID-19 pandemic.

 Ayon kay DOH Officer-in-Charge Rosario Vergeire, ito ang naging posisyon ng ahensya sa unang pagpupulong ng pandemic task force kahapon.

Mababatid na una nang itinulak ng Inter-Agency Task Force for the Management of Emerging Infectious Diseases (IATF) na alisin na ang polisiya sa sapilitang pagsusuot ng face mask sa outdoor o open space na hindi matao at may maayos na ventilation.

Samantala, binigyang-diin naman ni Vergeire na ang rekomendasyon ng IATF ay ipapatupad lamang sa mga low-risk setting at mga low-risk na indibidwal.

Walang takas at mararamdamam lalo na ng mga ordinaryong mamamayan ang epekto nang pagsadsad ng piso kontra dolyar.

 Ito’y ayon sa ekonomistang si Emmanuel Leyco ay kung magpapatuloy pa ang pagtaas sa presyo ng langis dahil sa paghina ng piso na magreresulta rin sa lalo pang pagmamahal sa halaga ng mga pangunahing bilihin, serbisyo at pasahe.

 Binigyang-diin ni Leyco na walang kawala ang Pilipinas lalo na ang mga ordinaryong mamamayan sa hindi magandang epekto nang pagbagsak ng palitan piso na kasalukuyang lagpas na sa 57 pesos kada isang dolyar.

Magandang bagay para sa bansa lalo na sa ekonomiya ang ginawang state visits ni Pangulong Ferdinand Bongbong Marcos Jr.

Ito ang inihayag ni National Economic Development Authority (NEDA) Undersecretary Rosemarie Edillon, na isa ito sa mga istratehiyang tinitingnan nila para sa susunod na Phlippine Development Plan (PDP) ng kanilang ahensya.

Sa pamamagitan nito, marami aniyang malilikhang trabaho dahil sa mga investments na papasok sa bansa.

Napaka-strategic din ani Edillon na ang Indonesia at Singapore ang napiling bisitahin ni Pang. Marcos dahil kapwa karatig bansa lamang ng Pilipinas. —sa ulat ni Jopel Pelenio (Patrol 17)

Sinampahan na ng Department of Education (DepEd) ng kasong administratibo ang lima sa pitong guro na sangkot umano sa sexual harassment sa Cavite.

Ayon kay DepEd Spokesperson Atty. Michael Poa, naisumite na noong Biyernes ang fact-finding report laban sa pitong guro sa Bacoor National High School sa Cavite.

Aniya, nakitaan ng matibay na ebidensiya sa limang guro sa naturang akusasyon laban sa kanila habang kulang naman ang ebidensya laban sa dalawang mga guro ng nabanggit na eskwelahan.

Binigyang diin pa ng DepEd, pinatawan ng preventive suspension ang lima at pinagpapaliwanag ng School Division Office (SDO).

Una nang sinabi ni Atty. Poa na posibleng maalis sa trabaho o depende sa kalalabasan ng imbestigasyon ang mga guro na sangkot umano sa sexual harassment.

Magugunitang, nag-ugat ang isyu matapos mag-viral ang post sa twitter kaugnay sa malalaswang karanasan ng mga estudyante sa ilang mga guro ng paaralan.