Posibleng nagmula sa ibang bansa ang promotor ng kumakalat na personalized text scams at unsolicited text messages.
Ayon sa Department of Information and Communications Technology (DICT), nakikipagtulungan sila sa mga international counterpart nito para matukoy ang internet protocol o IP address ng mga server na sangkot sa text scam.
Giit ng DICT, kakailanganin ang malawakang imbestigasyon hinggil sa naturang isyu dahil nangyayari rin ito sa ibang bansa.
Umaasa ang isang infectious disease expert na mapapataas ang COVID-19 vaccination coverage, lalo na ang booster shot na gaganaping special vaccination days ngayong buwan.
Nabatid na inanunsyo ng Department of Health (DOH) na magsasagawa ito ng National COVID-19 booster week sa September 26 hanggang 29.
Ayon kay University of the Philippines – Philippine General Hospital (UP-PGH) Dr. Anna Lisa Ong-Lim, matataandaan na ginawa na rin ng pamahalaan noon ang pagbabakuna ng primary vaccine kung saan ito ay naging epektibo.
Kaya naman inaasahan niya na mapapataas ng nasabing aktibidad ang target booster coverage.
Gayunman, hinikayat ni Ong-Lim ang gobyerno na i-highlight ang kahalagahan ng pagpapaturok ng booster shot.
Magkakasa ng National COVID-19 booster week ang Department of Health (DOH) sa September 26 hanggang 29.
Ito ay para mapalakas ang booster uptake sa general population.
Batay sa datos ng DOH, nasa 18.5 million Pilipino pa lamang ang nakatatanggap ng booster shots noong September 9.
Malayo ito sa 72.7 million Pilipinong fully vaccinated na laban sa COVID-19.
Gayunman, sinabi ni DOH head assistant Lorra Angelia Sayson na makatutulong ang naturang booster week para maabot ang target ng PinasLakas campaign, na makapamahagi ng booster doses sa 50% o 23.8 million Pilipino sa loob ng 100 days ng administrasyong Marcos.
Nakapamahagi na ang Department of Social Welfare and Development (DSWD) ng mahigit P935-M educational assistance sa mga mag-aaral.
Ayon kay DSWD undersecretary Jerico Javier, nasa P261,208,000 ang na-distribute kahapon kaya umabot na sa kabuuang P935,971,800 ang kabuuang halaga ng cash aid na ibinigay sa 372,298 na benepisyaryo as of September 11.
Sinabi naman ni Javier na wala silang naitalang problema sa naganap na distribusyon ng educational aid kahapon.
Mananatili ang mandatory mask rule sa Davao City hanggang December.
Ito ang binigyang-diin ni Mayor Sebastian “Baste” Duterte na hindi agarang ipatutupad ang mas maluwag na face mask policy sa lugar.
Ayon kay Duterte, suportado niya ang rekomendasyon ni acting City Health Officer Dr. Ashley Lopez na panatilihin ang pagsusuot ng face mask sa indoor at outdoor setting hanggang Disyembre.
Giit pa ng alkalde na ipatutupad lamang niya ito kung magiging maayos ang ilang lugar sa bansa pagkatapos ng implementasyon ng naturang mask rule.
Nabatid na simula July ng taong ito ay tumaas ang active COVID-19 cases sa Davao City.
Nakitaan ng bahagyang pagtaas ng COVID-19 infections ang National Capital Region (NCR).
Ayon kay OCTA research fellow Dr. Guido David, sumampa sa 13.3% ang positivity rate noong September 9 mula sa 12.1% noong September 2.
Ang positivity rate ay tumutukoy sa bilang ng nagpositibo sa COVID-19 mula sa kabuuang bilang ng mga nagpa-test.
Tumaas din ang reproduction number sa rehiyon sa 1.11 noong September 7 mula sa 0.93 noong August 31.
Ikinokonsidera namang mababa ang Average Daily Attack Rate (ADAR) sa NCR na nasa 5.58 per 100,000 population, kahit na nakitaan ito ng bahagyang pagtaas.
Nananatili ring mababa ang COVID-19 hospital bed at Intensive Care Unit occupancies sa 34.5% at 28.9%.
Samantala, pinaalalahanan ni David ang nasa vulnerable sector, partikular na ang mga senior citizen at may commorbidity na mag-ingat laban sa COVID-19.
Lalo pang lumakas ang Typhoon Inday at bahagyang bumagal habang nasa karagatan sa Silangan ng Taiwan.
As of 11am kanina, huling namataan ang Typhoon Inday sa layong 335 kilometers hilagang-silangan ng Itbayat, Batanes.
Taglay na ng bagyo ang lakas ng hanging aabot sa 165 kilometers per hour (km/h) malapit sa gitna at pagbugsong aabot sa 205 km/h.
Kumikilos ito pakanluran hilagang-kanluran sa bilis na 10 km/h.
Dahil sa bagyo, patuloy na makararanas ng malalakas na pag-ulan, pagkulog at pagkidlat ang Batanes at western sections ng Central at Southern Luzon.
Uulanin din ang Metro Manila at nalalabing bahagi ng bansa pero dala ito ng pinagsamang localized thunderstorm at Habagat.
Sa Lunes, inaasahang kikilos pahilagang kanluran sa Philippine Sea ang bagyong Inday at posibleng lumabas ng Philippine Area of Responsibility sa Martes ng umaga o hapon.
Kinalma ng Philippine Institute of Volcanology and Seismology (PHIVOLCS) ang publiko kasunod ng MAGNITUDE 7.7 na lindol na yumanig sa eastern New Guinea Reg Papua New Guinea.
Ayon sa PHIVOLCS, hindi magdudulot ng tsunami ang malakas na lindol.
Kaninang alas-7:46 ng umaga yumanig ang lindol na may episentrong 1,000 kilometro sa baybayin ng Papua New Guinea at Indonesia.
May lalim itong 79 kilometers at tectonic ang pinagmulan batay sa datos ng PHIVOLCS.
Sa ngayon, wala pang naitatalang nasawi dahil sa lindol pero asahan ang maraming damage at afteshocks.
Bumaba sa 2.9 milyon ang bilang ng mga Pilipinong nagsasabing nakaranas sila ng kagutuman o walang makain sa ikalawang quarter ng kasalukuyang taon batay sa survey ng Social Weather Station (SWS).
Mula ito sa dating 3.1 milyon na bilang ng mga Pilipino nagsabing walang makain kahit isang beses sa tatlong buwan o noong unang quarter nang 2022.
Batay pa sa tala ng SWS mas mababa ng 0.6 points mula sa sa 12.2% ang hunger rate nitong Hunyo kumpara noong Abril o 0.2 points na mas mababa sa 11.8% noong Disyembre nang nakaraang taon.
Ipinanawagan ni House Committee on Appropriations Chairperson at Ako Bicol Party-List Rep. Elizaldy Co sa Department of Information and Communication Technology (DICT) na ibaba ang halaga internet subscription at mas pabilisin ito.
Ayon kay Co, mahigit isang taon na kasi ang nakalilipas mula nang magkaroon ang bansa ng tatlong telecom provider na anila’y maghahatid ng mas mabilis at maayos na serbisyo sa mga konsumer ngunit hanggang sa ngayon wala pang nakikitang pag-unlad sa serbisyo ng mga ito.
Bunsod nito pinasisilip ng mambabatas sa DICT ang performance ng Smart, Globe at Dito internet service providers.