NATIONAL NEWS

Hinihinalang biktima ng human trafficking ang 43 dayuhan na nasagip ng Department of Interior and Local Government (DILG) makaraang ipasara ang isang Philippine Offshore Gaming Operators (POGO) establishment sa Pampanga.

Ayon kay DILG secretary Benhur Abalos, kasama nila ang Philippine National Police Anti-Kidnapping Group nang salakayin at permanenteng ipasara ang Lucky 99 Outsourcing Inc., na matatagpuan sa Fil-Am friendship Hi-way, Angeles City, Pampanga.

Pahayag ng Kalihim, nagresulta ang raid na ito sa pagkakasagip sa mga foreign nationals na natagpuan sa loob ng establiyemento.

Babala ni Abalos, tuloy-tuloy ang kanilang pagtugis sa mga indibidwal na sangkot sa mga kaparehong iligal na aktibidad na bahagi ng pinaigting na kampanya ng pamahalaan laban sa mga pogo na dawit sa human trafficking.

Makikipag-ugnayan din aniya ang dilg sa Philippine Amusement and Gaming Corporation (PAGCOR) at Securities and Exchange Commission (SEC) upang mas mapalalim pa ang imbestigasyon sa mga ganitong kaso o problemang kinakaharap ng bansa.

Nakapagtala ang Department of Health ng 2,275 new COVID-19 infections, dahilan upang umabot na sa 3,918,329 ang kaso sa buong bansa.

Ayon  sa DOH, bumaba ang bilang na ito mula sa 2,619 infections nitong nakalipas na Biyernes at ikatlong sunod na araw na mas mababa sa 3K ang naitalang kaso ng ahensya.

Sa datos ng Health Department, nagkaroon din ng pagbaba  ang active infections ng bansa, na nasa 26,271 na lamang, mula sa dating 26,363 cases.

Nakuha naman ng National Capital Region ang highest number of cases sa nakalipas na dalawang linggo, matapos makapagtala ng 10,073 infections, na sinundan ng CALABARZON- 3,666, Central Luzon -2,185, Davao Region – 1,189, at Western Visayas – 957.

Umakyat sa 3,829,544, ang mga nakarekober habang umabot sa 62,514 ang fatality cases.

Nakipag-usap at nakipagkamay si King Charles III ng Britain sa mga nakapilang mga tao na nais magbigay galang yumaong si Queen Elizabeth II, na nakahimlay sa Palace of Westminster, sa London.

Kasama ni King Charles III na humarap sa publiko ang anak na si Prince William.

Libu-libong tao ang pumila at naghintay sa kanilang pagkakataon na makita sa huling pagkakataon si Queen Elizabeth.

Karamihan sa mga nagtungo sa Westminster Hall ang magdamag na naghintay para lamag makita ang yumaong reyna ng United Kingdom.

Inaasahan ng Department of Environment and Natural Resources na mababawasan ng 50 porsyento ang basura.

Ito ay matapos payagan ni Pangulong Ferdinand Marcos Jr. na gawin na lamang opsyonal ang pagsusuot nito sa outdoor areas.

Ayon kay DENR- Environmental Management Bureau Director William Cuñado, malaking tulong ito para mabawasan ang dami ng face masks na itatapon.

Sa kabila nito, inirekomenda rin ng ahensya na gumamit na lamang ng reusable mask ang publiko.

Aarangkada ang libreng-sakay para sa mga empleyado ng gobyerno sa mga pangunahing railway system services sa Lunes, September 19.

Kabilang dito ang Metro Rail Transit Line 3 (MRT-3), Light Rail Transit line 2 (LRT-2) at Philippine National Railways (PNR).

Ayon sa Department of Transportation, ito ay kasabay ng isang buwang selebrasyon ng Philippine Civil Service anniversary bilang bahagi ng “treats to government workers” ng Civil Service Commission.

Magsisimula naman ang free rides ng MRT-3 at LRT-2 mula alas-7 ng umaga hanggang alas-9 ng umaga at alas-5 ng hapon hanggang alas-7 ng gabi habang buong araw naman ang libreng-sakay ng mga government employee sa PNR sa Lunes.

Para makakuha ng libreng-sakay, kailangan lamang magpakita ng ID bilang patunay na nagtatrabaho sa ahensya ng gobyerno at tanggapan nito.

Tinututukan ngayon ng Philippine Council for Agriculture and Fisheries (PCAF) ang mahalagang papel ng mga kababaihan sa rice supply chain.

Ito’y bunga ng hangarin nitong mapaigting pa ang Gender and Development (GAD) plans, budgeting, at utilization ng mga rice-related agencies.

Sa isang PCAF-commissioned study na may pamagat na “Enhancing Gender Outcomes of Different Rice-Related Agencies through Gender Analysis of Rice Supply Chain and Advocacies,” lumalabas na binabalikat na rin ng mga babae ang lumolobong papel nito sa pagtatanim ng palay.

Natuklasan din na mas abala ang mga kababaihan kumpara sa mga kalalakihan sa pagdating sa capital at seed sourcing sa pre-production.

Sa production segment na madalas iniaatang sa mga lalaki, lumitaw sa pag-aaral ng PCAF na mas marami na ring mga babae ang lumalahok sa transplanting habang pareho namang nakikiisa ang mga ito sa weeding.

Samantala, sinasabing dominado rin ng mga kababaihan ang postproduction activities tulad ng palay drying, milling, at marketing.

Binanggit naman sa pag-aaral ang umiiral na gender gap sa sektor na umaabot umano hanggang sa edukasyon at agricultural training.

Bukod dito, tinukoy din ang dalawang balakid para sa full participation ng mga babae sa agrikultura na kinabibilangan ng limited registration sa Registry System for Basic Sectors in Agriculture (RSBSA) at unpaid domestic work.

Nagwakas ang maliligayang araw ng dalawang indibidwal na sinasabing sangkot sa pang-aabuso ng mga kabataan matapos masakote ng mga elemento ng Women and Children Protection Center ng Philippine National Police.

Ayon kay PMGen Benjamin Santos Jr., Acting Deputy Chief for Operations ng PNP, nadakip ang mga Pilipinong suspek kasunod ng natanggap na intelligence report mula sa United States Homeland Security Investigation na may mga nagbebenta ng mga malalaswang larawan at video sa probinsya ng Bulacan.

Tatlong buwang nagkasa ng case buildup at surveillance operation ang pulisya sa Luzon.

Sa ikinasang entrapment operation sa Muzon, San Jose Del Monte, nahuli naman ang babaeng suspek kung saan natuklasang wanted din pala ito sa Amerika, Europa at Australia dahil sa pagiging facilitator.

Samantala, nasa labindalawang biktima naman ng pang-aabuso ang nasagip ng PNP sa magkahiwalay na operasyon sa Bulacan at Leyte.