NATIONAL NEWS

Pinangunahan ng Philippine Air Force (PAF) ang pagsasagawa ng coastal cleanup drive sa Manila Dolomite Beach sa Roxas Boulevard sa Maynila kahapon.

Ayon sa PAF, ginawa ang hakbang bilang pakikiisa nila sa International Coastal Cleanup Day ngayong araw, Setyembre 17.

Nakuha sa lugar ang nasa 150 na sako ng sari-saring basura tulad ng plastic, wrappers, facemasks, plastic bottles at iba pang waste materials.

Humingi ng paumahin ang Manila International Airport Authority (MIAA) sa mga pasahero ng Terminal 3 at iba pang airport stakeholders dulot ng perwisyong idinulot ng power interruption na tumama sa paliparan mula alas-11:00 kagabi hanggang kaninang umaga.

Ayon kina DOTr Secretary Jaime Bautista at MIAA General Manager Cesar Chiong, dahil sa pagkawala ng suplay ng kuryente ay nabalam ang mga operasyon sa airport dahil kinailangan pang gawing manual ang check-in at loading ng mga bagahe habang humaba rin ang pila sa immigration.

Samantala, tinatayang 16 international at 15 domestic flights ang apektado ng insidente na kinabibilangan ng mga sumusunod:

 Domestic Flights

Departure

5J 951 Manila-Davao

5J 473 Manila-Bacolod

5J 381 Manila-Cagayan

5J 635 Manila-Puerto Princesa

5J 961 Manila-Davao

5J 991 Manila-General Santos

5J 451 Manila-Iloilo

5J 551 Manila-Cebu

5J 651 Manila-Tacloban

5J 357 Manila-Roxas

5J 481 Manila-Bacolod

5J 851 Manila-Zamboanga

Arrival

5J 2506 Cebu-Manila

5J 3966 Davao-Manila

TK 265 Cebu-Manila

International Flights

Departure

EK 335 Manila-Dubai

QR 929 Manila-Doha

Z2 942 Manila-Kuala Lumpur

TK 265 Manila-Istanbul

5J 929 Manila-Bangkok

5J 813 Manila-Singapore

SQ 915 Manila-Singapore

EK 337 Manila-Dubai

5J 5038 Manila-Nagoya

Arrival

5J 827 Osaka-Manila

Z2 232 Denpasar-Manila

5J 502 Kuala Lumpur-Manila

5J 804 Singapore-Manila

SQ 918 Singapore-Manila

EK 336 Dubai-Manila

Samantala, matapos ang joint investigation ng MIAA at Manila Electric Company (Meralco) ay natukoy na nagkaroon ng problema sa T3 power substation na nagdulot ng power outage.

Kasabay nito, tiniyak din ng MIAA na gumagawa na sila ng mga aksiyon upang maiwasang maulit ang mga kaparehong insidente.

Nasakote ng Philippine National Police ang ilang High Value Individuals (HVI) sa magkahiwalay na operasyon.

Ayon kay PNP Public Information Office chief Police Brigadier General Roderick Alba, unang nahuli si Helland Bautista Manalang at nahuli ng 374,000 pesos na halaga ng hinihinalang shabu sa Angeles City, Pampanga.

Sa Pampanga rin nahuli sina Channy Zulueta, Ed Paulo Magbanua at Christina Marie Tan kung saan nakuha mula sa kanila ang 884,000 pesos na halaga ng ipinagbabawal na droga.

Samantala, tinatayang 52 million pesos na halaga ng marijuana ang winasak ng mga awtoridad sa Tinglayan, Kalinga.

Pahayag naman ni PNP Chief Gen. Rodolfo Azurin Jr., tuloy-tuloy ang kampanya ng pamahalaan kontra ilegal na droga.  

Nasagip ng mga tauhan ng Philippine National Police (PNP) ang isang hinihinalang biktima ng kidnapping sa Al-Barka, Basilan.

Batay sa ulat kay PNP chief Police General Rodolfo Azurin Jr., sapilitan umanong tinangay ng sampung armadong suspek ang biktima sa kanilang tirahan sa Barangay Bohe Piang noong Setyembre 13.

Sa tulong naman ng binuong tracker team ng PNP ay agad itong nailigtas matapos abandonahin ng mga suspek sa isang safe house.

Kasalukuyang isinasailalim sa physical examination at debriefing ang biktima.

Dinampot ng mga elemento ng PNP-Criminal Investigation and Detection Group (CIDG) ang isang armadong Chinese at ang kanyang Pilipinang kasama habang nagsasagawa umano ng panininiktik sa potensyal na kidnap victim sa loob ng Clark Freeport zone sa Mabalacat City, Pampanga.

Kinilala ni CIDG Director Police Brigadier General Ronald Lee ang mga suspek na sina Xiong Gang, 35 taong gulang, at Nete Joy Gallenero Juanico, 28 taong gulang.

Nakuha mula sa dalawa ang isang 9mm pistol na may silencer at may mga bala, isang black airsoft pistol, at posas.

Sinita ng mga tauhan ng Clark Development Corporation Police ang dalawa habang nakasakay ng isang kotse at umaaligid sa tapat ng Clark Hills Village.

Pinuri naman ni PNP Chief General Rodolfo Azurin Jr. ang pagtutulungan ng pulisya at komunidad sa pagmo-monitor sa mga dayuhan na posibleng sangkot sa POGO-related crimes at iba pang krimen.