NATIONAL NEWS

Dinepensahan ni Office of the Vice President (OVP) spokesperson Atty. Reynold Munsayac, na hindi luho ang desisyon sa paglipat ng lokasyon ng kanilang tanggapan sa Mandaluyong City mula sa Quezon City.

Ayon kay Munsayac, marami ang hindi nakaka-alam na dalawa ang lokasyon ng OVP kabilang na dito ang Quezon City reception House sa New Manila at Ben-Lor Bldg. sa Quezon Ave kung saan, nagtatrabaho ang mga empleyado at iba pang mga opisyal.

Iginiit ng tagapagsalita na masikip at siksikan ang mga empleyado sa Ben-Lor Building at marami umanong pumapasok dito kaya mas minabuti ng bagong administrasyon na maghanap ng bagong opisina.

Sinabi pa ni Munsayac na layunin ng kanilang tanggapan na magkaroon ng efficiency upang maiwasan ang matagal na pag-iikot o pagproseso ng mga dokumento.

Maghahain ng petisyon sa korte ang kampo ng Aktor at komediyanteng si Vhong Navarro upang makapagpiyansa sa kasong Rape na isinampa sa kaniya ng modelong si Deniece Cornejo.

Matatandaang nito lamang September 19, sumuko sa National Bureau of Investigation (NBI) si Navarro dahil sa kasong Act of Lasciviousness na inireklamo ni Cornejo na may piyansang P36,000 para sa pansamantalang kalayaan  nito.

Nasundan pa ito ng isa pang Warrant of Arrest na inilabas naman para sa kasong Rape ni Navarro na Non-Bailable.

Nag-ugat ang kaso nang tangkain umanong gahasain ng komediyante si Cornejo sa loob ng inuupahang Condominium Unit nito sa Bonifacio Global City noong January 2014 pero ibinasura ito ng korte.

Sa kabila nito, naniniwala ang asawa ng komediyante na si Tanya Winona Bautista-Navarro, na walang kasalanan si Vhong dahil consistent at hindi nagsisinungaling ang kaniyang asawa hinggil sa isyung kinakaharap nito.

Ayon kay Tanya, walang nagbago sa mga naging paliwanag ng aktor kaya kanilang ilalaban ang isinampang kaso ni Cornejo.

Samantala, pinasalamatan naman ni tanya ang mga taong nagdarasal at patuloy na naniniwala sa kaniyang mister.

Arestado ang isang beteranong aktor matapos masangkot sa Cybercrime sa Biñan City, Laguna.

Kinilala ang akusado na si Conrado Manuel Ambrosio II o mas kilala bilang si Dindo Arroyo, 61 years old na hinuli sa mismong kaniyang bahay dahil sa Warrant of Arrest na ipinalabas ni Sta. Rosa City Regional Trial Court (RTC) branch 101 Judge Rosauro Angelito Sicat David.

Hindi na idinetalye ng mga otoridad, ang kasong nilabag umano ni Arroyo na nahaharap sa kasong Cybercrime Prevention Act of 2012 at ngayon ay nasa kustodiya na ng Bureau of Jail Management and Penology (BJMP) sa Biñan City.

Samantala, nagbigay naman ng komendasyon ang Korte sa piyansang ₱10,000 ni Arroyo para sa pansamantala nitong kalayaan.

Patuloy na binabantayan ng PAGASA weather bureau ang dalawang sama ng panahon na namataan sa loob at labas ng Philippine Area of Responsibility (PAR).

Ayon kay PAGASA weather specialist Daniel James Villamil, isang Low Pressure Area (LPA) ang namataan sa loob ng PAR sa layong 1,200 kilometers silangan ng Central Luzon pero maliit ang tiyansa nito na maging isang bagyo sa susunod na 24 hanggang 48 hours.

Patuloy paring umiiral ang Southwest Monsoon o Hanging Habagat sa kanlurang bahagi ng Central at Southern Luzon habang minomonitor din ng PAGASA ang namuong tropical depression sa labas ng PAR na namataan sa layong 1,915 kilometers silangan ng extreme Northern Luzon.

Ang naturang bagyo ay may lakas ng hanging aabot sa 45 kilometers per hour at pagbugsong aabot naman sa 55 kilometers per hour at kasalukuyang kumikilos pahilaga-hilagang kanluran sa bilis na 15 kilometers per hour.

Patuloy namang nagpapaalala sa publiko ang PAGASA na doblehin ang pag-iingat at panatilihin ang pagiging alerto at pagdadala ng payong para sa biglaang pagbuhos ng ulan at matinding sikat ng araw.

Nasa 700 centenarians o mga edad 100 pataas ang hindi pa rin nakatatanggap ng 100,000 peso cash gift mula sa Department of Social Welfare and Development.

Napabilang sa waitlisted ang mga nasabing senior citizen makaraang aminin ng DSWD na walang inilaan ang Department of Budget na dagdag-pondo para sa cash gift.

Sa pagharap sa House Special Committee on Senior Citizens Organizational Meeting, inihayag ni DSWD director for Program Management Bureau Maricel Deloria kasama sa kanilang binabayaran ngayong taon ang mga na-waitlisted noong isang taon.

Ayon kay Deloria, pinaka-maraming waitlisted ay mula sa  Ilocos region, 120 beneficiaries; Western Visayas, 116; Central Visayas, 110 at NCR, 45 beneficiaries.

Nagsumite na anya sila ng request para sa dagdag pondo sa DBM at kanila nang hinihintay ang tugon nito.

Nilinaw ng Philippine National Police ang issue sa umano’y hindi pag-aresto ng mga pulis sa mga armado umanong lalaking pumasok sa Masungi Georeserve sa Baras, Rizal kamakailan.

Ayon kay PNP spokesman, Col. Jean Fajardo, napag-alaman ng pulisya na totoong naka-detail ang mga security guard sa nasabing lugar subalit may security officer na kulang sa firearm registration.

Nakatakda naman anyang magpaliwanag ang sinagtala security agency kaugnay nito.

Magsasagawa ang Regional Civil Safety Unit ng Police Regional Office-4A ng administrative proceedings upang mabatid kung anong administrative liabilities ang maaaring ipataw sa naturang security agency.

Nilinaw din ni Fajardo na wala silang nakitang 30 armadong lalaki sa masungi taliwas sa naunang sumbong dahil anim na security guards lang ang nadatnan at kasalukuyang nagka-kampo sa lugar.

Samantala, kabilang din sa iniimbestihahan ay kung may mga retirado at aktibong Pulis na sinasabing naging sangkot sa iligal umanong pag-okupa sa masungi na isang protected area.

Naglunsad ng kilos-protesta ang ilang residente ng Baras, Rizal laban sa umano’y pang-aagaw ng lupa ng Masungi Georeserve Foundation.

Hinarangan ng mga demonstrador ang kalsada sa barangay pinugay subalit agad silang sinita ng mga Pulis.

Inihayag naman ng Baras Municipal Police na walang permit ang mga residente upang magkilos-protesta.

Iginiit ng mga demonstrador na tatlong taon na anilang hindi napakikinabangan ang kanilang lupang sinasaka mula nang bakuran ng Masungi.

Batay sa iprinesenta nilang survey plan, bahagi ng Upper Marikina River Basin Protected Landscape ang hinahabol nilang Lot 2.

Taong 2017 nagkaroon ng kasunduan ang Department of Environment and Natural Resources (DENR) at Masungi Georeserve Foundation upang mapangalagaan ang naturang protected area.

Gayunman, base sa website ng DENR ay may nakabinbing ancestral domain claim ang mga katutubong dumagat-remontado sa nasabing lugar, na bahagi ng lupang dating sinasaka at tinitirahan ng mga nagprotesta.

Nakatakdang makipagkita si Pangulong Bongbong Marcos kay U.S. President Joe Biden sa 77th United Nations General Assembly (UNGA) sa New York.

Ito, ayon kay Press Secretary Trixie Cruz-Angeles, ang pagkakataon upang talakayin ng dalawang leader ang 76 na taong mabungang alyansa ng Pilipinas at U.S. sa aspeto ng mutual cooperation, two-way trade, direct investments at iba pang issue.

Kamakailan ay inamin ni Pangulong Marcos sa pagdalo sa New York Stock Exchange Economic forum na hindi niya makita ang hiniharap ng Pilipinas nang wala ang matagal na nitong kaalyadong U.S., bilang partner.

Kasalukuyang nasa Estados Unidos si PBBM para sa kanyang working visit at inaasahang magbabalik-bansa sa Sabado, Setyembre a – 24.