NATIONAL NEWS

Kinansela ng Philippine Ports Authority (PPA) ang kanilang biyahe sa ilang pantalan dahil sa masamang lagay ng panahon na dulot ng Bagyong Karding, na may international name na “NORU.”

Batay sa abiso ng PPA, mananatili ang suspensyon ng mga biyahe ng pasahero hanggang maalis ang storm signals sa mga apektadong lugar.

Kabilang sa apektadong pantalan ang mga sumusunod:

• North Harbor
• South Harbor
• Batangas Port
• Port Mangement Office (PMO) Mindoro
• PMO Marinduque / Quezon
• PMO Masbate
• PMO Bicol
• Ozamiz (Manila-Bound)
• Port of Dumaguete
• Port of Zamboanga Del Norte

Sinuspinde ng Commission on Elections (COMELEC) ang kanilang pasok sa trabaho sa ilang lugar sa Luzon dahil sa masamang lagay ng panahon bunsod ng super typhoon karding.

Sa abiso ahensya, epektibo bukas, September 26 ang ork suspension sa Region 3, 4-A, 4-B, 5 at National Capital Region (NCR).

Inabisuhan naman ng COMELEC ang publiko na suspendido rin ang pagbibigay ng voter’s certification at lahat ng frontline services sa mga nasabing lugar

Umabot na sa 336 indibidwal o katumbas ng 97 pamilya ang lumikas sa Cagayan Valley at Central Luzon dahil sa super typhoon Karding.
Batay sa datos ng National Disaster Risk Reduction and Management Council (NDRRMC), sa nasabing bilang, mula sa Central Luzon ang 300 katao o katumbas ng 86 na pamilya habang galing naman sa Cagayan Valley ang 36 na katao o katumbas ng 11 pamilya.
Sinimulan naman ng NDRRMC ang forced evacuation sa Quezon Province sa 20 barangay sa Panukulan, anim na barangay sa patnanungan at lima sa barangay jomalig habang isinagawa naman ang pre-emptive evacuation sa 13 barangay sa Burdeos, Quezon.
Nabatid na itinaas sa red alert status ang Cagayan Valley, Ilocos Region at Bicol Region, gayundin sa Abra, Apayao, Benguet, Ifugao, Kalinga at Mountain Province sa Cordillera Administrative Region (CAR) dahil sa naturang bagyo.
Nakikipag-ugnayan naman ang NDRRMC sa Department of Education (DepEd), Commission on Higher Education (CHED) at local chief executives sa pamamagitan ng pre-disaster risk assessment meetings at regular weather updating sessions para sa posibleng suspensyon ng klase at pasok sa trabaho.

Handa na ang Bureau of Jail Management and Penology (BJMP) para sa posibleng epekto ng Super Typhoon Karding.

Ayon kay BJMP Spokesperson Jail Superintendent Xavier Solda, may preemptive measure na silang ginawa bilang bahagi ng protocol tuwing may bagyo.

Una na rito ang paglipat ng Persons Deprived of Liberty (PDLS) na nasa low-lying areas sa ibang pasilidad.

Sinabi naman ni Solda na nakamonitor din si Interior Secretary Benhur Abalos sa sitwasyon ng jail facilities sa panahon ng bagyo. - sa panunulat ni Hannah Oledan

Kasalukuyang nagpupulong ang National Disaster Risk Reduction and Management Council (NDRRMC) kasama ang iba’t ibang ahensya ng pamahalaan at mga Regional DRRMC bilang paghahanda sa Super Typhoon Karding.

Pinangunahan ni DND OIC Secretary at NDRRMC Chairperson Jose Faustino Jr. Ang naturang pagpupulong.

Muli namang nagbabala ang NDRRMC sa publiko hinggil sa Bagyong Karding na kasalukuyang nagdudulot ng pag-ulan sa iba’t ibang bahagi ng bansa.

Maaari din itong magdulot ng pagbaha at pagguho ng lupa sa mga apektadong lugar.

Pinayuhan din nito ang publiko na makinig at sumunod sa payong pangkaligtasan ng mga otoridad. - sa panunulat ni Hannah Oledan

Arestado ang isang lalake matapos mahuli ng mga otoridad na may dalang 3 sako na may lamang aso para ibenta sa illegal dog meat trade noong Setyembre 24.

Nasakote ng mga tauhan ng Peñaranda Municipal Police ang suspek na si Ruel Bote, na residente ng Barangay Conception General Tinio Nueva Ecija habang sakay ng kanyang motorsiklong may dalang trailer.

Nasagip naman ng mga otoridad ang limang mapapayat na aso na dala ng suspek

Iniutos naman ni Police Regional Office 3 Director Brigadier General Cesar Pasiwen sa kanyang mga tauhan ang striktong pag-iimplementa ng batas na magpoprotekta sa mga aso at iba pang hayop.

Nahaharap ngayon si bote sa kasong paglabag sa RA 10631 o Animal Welfare Act of 2017. - sa panunulat ni Hannah Oledan

Nakabalik na ng Pilipinas si Pangulong Ferdinand Marcos Jr. mula sa 6 na araw nitong working visit sa Amerika.

Dumating sina pbbm at iba pang kasamahan nito sa Ninoy Aquino International Airport  (NAIA) terminal 2 dakong alas- 6 ng umaga kanina.

Sinalubong naman siya ni Vice President at Education Secretary Sara Duterte na nangasiwa sa buong bansa habang nasa Amerika ang pangulo.

Binigyang-diin din ng pangulo sa kanyang arrival speech ang mga naging aktibidad at acheivements niya sa kanyang week-long visit sa u.s. mula September 18 hanggang 24.

Aniya, agad itong nakipagkita at nagpasalamat sa filipino community sa new jersey para sa kontribusyon ng mga ito sa Pilipinas at Estados Unidos.

Kabilang sa mga global issues na nabanggit ni PBBM ay ang climate change, pagtaas ng presyo ng pagkain, rapid technological change, peaceful resolution of international disputes, pagprotekta sa mahihinang sektor, at pagtuldok sa lahat ng uri ng pagtatangi. - sa panunulat ni Hannah Oledan

Prayoridad ng Department of Human Settlements and Urban Development (DHSUD) ang konstruksyon ng in-city housing projects para masiguro na hindi mapapalayo ang mga Informal Settler Families  (ISF) sa kanilang pangkabuhayan.

Ayon kay Housing Secretary Jose Rizalino Acuzar, hindi matagumpay ang mga naging pabahay dahil tumangging lumipat ang ilang ISF dahil sa epekto nito sa kanilang pangkabuhayan.

Batay sa datos, ang housing backlog sa bansa ay nasa mahigit 6.5 -M unit na kung saan 3.5 -M sa mga ito ay mga ISF.

Paglilinaw ni Acuzar, hindi lamang tutuon sa mga ISF ang naturang programang pabahay.

Kamakailan lang ay nilagdaan nina Acuzar at Quezon City Mayor Joy Belmonte ang isang memorandum of understanding para simulan ang programa sa pabahay ng pamahalaan.

Samantala, maaaring abutin ng isa at kalahating taon ang konstruksyon ng naturang programa upang masiguro ang maayos na kalidad ng mga unit. – sa panunulat ni Hannah Oledan

 Aabot sa 200 million pesos hanggang 300 million pesos ang kailangan ng Department of Social Welfare and Development (DSWD) para muling buhayin ang educational assistance program para sa mga indigent students.

Ayon kay DSWD Secretary Erwin Tulfo, aminado ang kagawaran na hindi sapat ang 1.5 billion pesos na budget para sa programa dahil sa bilang ng mga estudyante na nagparehistro kung saan umabot ito ng dalawang milyon.

Aniya, ang panukalang halaga ng karagdagang pondo para sa cash assistance program ay maaaring ipamahagi sa bawat distrito, at ang pagpaparehistro ay maaaring gawin sa bawat rehiyon.

Nabatid na umabot sa mahigit isa punto anim na bilyong piso ang kabuuang halaga na naipamahagi ng DSWD sa ilalim ng naturang programa.