NATIONAL NEWS

Pumalo na sa 141.38 million pesos ang pinsalang idinulot ng bagyong Karding sa sektor ng agrikultura ng bansa.

 Sa inisyal na datos ng Department of Agriculture (DA), sakop ng pinsala ang 16,229 ektaryang pananim sa Cordillera Administrative Region (CAR), Ilocos region, Central Luzon at CALABARZON.

 Katumbas ito ng 5,866 metriko toneladang nasirang pananim na kinabibilangan ng bigas, mais at high-value crops na nakaapekto sa higit pitungraang magsasaka.

 Bilang solusyon, posibleng makipag-ugnayan ang DA sa survival and recovery o sure program ng Agricultural Credit Policy Council, para sa 500 million pesos na halaga ng quick response fund.

Pinayagan na ng Land Transportation Franchising and Regulatory Board (LTFRB) ang pagtayo ng mga pasahero sa loob ng Public Utility Vehicles (PUVs) na nasa lugar na nakasailalim sa alert level 1.

 Batay sa Memorandum Circular no. 2022-070, sasakupin ng direktiba ang mga Public Utility Bus (PUBs) at Modern Public Utility Jeepney (MPUJs) class 2.

 Pero kailangang nakasunod ito sa ilang kondisyon tulad ng; hanggang 15 pasahero ang papayagang nakatayo para sa low entry/low floor PUBs; hanggang 10 pasahero sa mga coach-type PUBs; at hanggang limang pasahero sa MPUJs-class 2.

 Sinumang hindi sumunod sa direktiba ay papatawan ng multang alinsunod sa Joint Administrative Order no. 2014-01.

Nakatanggap ng impormasyon ang probinsya ng Quezon kaugnay sa isang napaulat na nasawi matapos matabunan ng lupa dahil sa landslide.

Sa panayam ng DWIZ kay Infanta Vice Mayor L.A. Ruanto, kinumpirma nito na nagmula sa munisipalidad ng Burdeos, Quezon ang biktima.

Hindi naman nagbigay ng ibang impormasyon si Ruanto sa pagkakilanlan ng nasawi na bineberipika pa ngayon ng pamahalaan.

Ang umiray sa General Nakar sa Northern, Quezon ang pinaka-napinsala ng bagyong Karding.

Ito rin ang pinagtuunang pansin ng lokal na pamahalaan upang mahatiran ng tulong lalo’t maraming residente ang nananatili sa evacuation centers.

Walang naitalang damage ang Manila International Airport Authority (MIAA) sa Ninoy Aquino International Airport (NAIA) sa gitna ng pananalasa ng bagyong Karding.

 Ayon sa pamunuan ng MIAA, nagsagawa na ng clearing operation ang kanilang engineering at operations teams sa airside at landside areas ng NAIA.

 Ininspeksyon din ang mga runways at taxiways para alamin kung may mga nakaharang na maliliit na kalat.

 Lubos naman ang pasasalamat ni MIAA General MAnager Cesar Chiong dahil wala silang naitalang power at water interruption at maging ang nasugatang indibdiwal.

 Sa datos noong Linggo, aabot sa 41 biyahe sa naia ang kinansela dahil sa bagyo habang nasa 161 biyahe ang na-delay ng dalawang oras.

Ilang pasilidad ng Department of Health (DOH) sa Nueva Ecija ang nasira dahil sa pananalasa ng bagyong Karding.

 Sa situational briefing ni Pangulong Ferdinand Marcos Jr., inilatag ni Health Officer-in-Charge Maria Rosario Vergeire ang mga nasira kabilang ang nabasag na glass panes, napunit at tumutulong bubong sa drug rehabilitation center.

 Naitala ito sa kanilang facility sa Mega Drug Abuse Treatment and Rehabilitation Center na nagsisilbing covid-19 Quarantine Facility.

 Tiniyak naman ni vergeire na naka-stand-by ang iba nilang mga ospital para sa emergency responses.

Umabot na sa 52,000 indibidwal ang lumikas sa kanilang mga tahanan sa gitna ng pananalasa ng bagyong Karding.

 Ayon kay Raffy Alejandro, Deputy Spokesperson ng National Disaster Risk Reduction and Management Council (NDRRMC), bineberipika na nila ang limang nasawi sa bulacan dahil sa bagyo na pawang mga rescuers habang isa ang nawawala sa Camarines Norte.

 Umabot naman sa 43 pantalan sa CALABARZON, MIMAROPA at Bicol lregion ang nagsuspinde ngayong araw ng operasyon dahil sa bagyo na nakaapekto sa 2,882 pasahero.

 Nakapagtala rin ang NDRRMC ang pagkawala ng kuryente at linya ng komunikasyon sa Quezon at Camarines Norte.

 Ang mga lugar na nananatili pa ring lubog sa baha ay ang ilang parte ng Gapan, Nueva Ecija na kasalukuyan nang inaayos ng Department of Public Works and Highways (DPWH).

Pinuri ni Pangulong Ferdinand ‘Bongbong’ Marcos Jr. ang mga Local Government Units (LGUs) na maagang naghanda para sa pananalasa ng bagyong Karding.

Sa situational briefing ng National Disaster Risk Reduction and Management Council (NDRRMC) ngayong araw, binigyang-diin ng pangulo ang magandang koordinasyon ng mga LGUs para maayos na mailikas at makapaghatid ng tulong sa mga apektadong residente.

Binigyang-halaga naman Ni Pangulong Marcos Jr. ang pagasa dahil sa mga ibinibigay nitong abiso na tulong para makapaghanda ang lahat.