NATIONAL NEWS

Umabot na sa 52,000 indibidwal ang lumikas sa kanilang mga tahanan sa gitna ng pananalasa ng bagyong Karding.

 Ayon kay Raffy Alejandro, Deputy Spokesperson ng National Disaster Risk Reduction and Management Council (NDRRMC), bineberipika na nila ang limang nasawi sa bulacan dahil sa bagyo na pawang mga rescuers habang isa ang nawawala sa Camarines Norte.

 Umabot naman sa 43 pantalan sa CALABARZON, MIMAROPA at Bicol lregion ang nagsuspinde ngayong araw ng operasyon dahil sa bagyo na nakaapekto sa 2,882 pasahero.

 Nakapagtala rin ang NDRRMC ang pagkawala ng kuryente at linya ng komunikasyon sa Quezon at Camarines Norte.

 Ang mga lugar na nananatili pa ring lubog sa baha ay ang ilang parte ng Gapan, Nueva Ecija na kasalukuyan nang inaayos ng Department of Public Works and Highways (DPWH).

Pinuri ni Pangulong Ferdinand ‘Bongbong’ Marcos Jr. ang mga Local Government Units (LGUs) na maagang naghanda para sa pananalasa ng bagyong Karding.

Sa situational briefing ng National Disaster Risk Reduction and Management Council (NDRRMC) ngayong araw, binigyang-diin ng pangulo ang magandang koordinasyon ng mga LGUs para maayos na mailikas at makapaghatid ng tulong sa mga apektadong residente.

Binigyang-halaga naman Ni Pangulong Marcos Jr. ang pagasa dahil sa mga ibinibigay nitong abiso na tulong para makapaghanda ang lahat.

Aabot sa 1.226 milyong kustomer ng MANILA Electric Co. (Meralco) ang nawalan ng suplay ng kuryente sa gitna ng pananalasa ng bagyong Karding.

 Ayon sa Meralco, nakaapekto ang power interruption sa 1.226 milyon nilang kustomer magmula noong Linggo, September 25.

Hanggang kaninang alas-sais ng umaga, umabot na sa 51,773 ang mga kustomer ng Meralco na nawalan ng kuryente kung saan mayorya ay mula sa Bulacan, Rizal at Marikina.

 Tiniyak naman ng ahensiya na tuloy-tuloy ang pagtatrabaho ng kanilang mga crew upang agad na maibalik ang suplay ng kuryente.

 Ang mga lugar na pinaghahatiran ng suplay ng kuryente ng Meralco ay ang mga siyudad at munisipalidad sa  Bulacan, Cavite, Metro Manila, Rizal at maging sa probinsya ng Batangas, Laguna, Pampanga, at Quezon.

Isinara ng ilang local banks ang ilan sa kanilang branches sa bansa dahil sa epekto ng bagyong Karding.

 Ang mga nagsaradong bangko ay ang mga sumusunod;

 Lahat ng branch ng Bank of the Philippine Islands (BPI) na nasa NCR, CAR, region 1, 2, 3, 4-a, 4-B.

 Ilang branch ng Land Bank of the Philippines sa Northern at Southern Luzon na naapektuhan ng bagyo.

 At mga branch ng Rizal Commercial Banking Corporation (RCBC) na nasa Cordillera Administrative Region (CAR), Region 1, Region 3, Albay, Camarines Sur, Quezon, at ilang branch sa Laguna.

 Manananatili namang bukas at operational ang online banking ng mga sumusunod na bangko kaya may access pa rin dito ang kanilang mga customers.

 Naglaan ng 1.1 bilyong pisong pondo ang department of Social Welfare and Development (DSWD) para sa kanilang disaster response at pamamahagi ng tulong sa mga maaapektuhan ng bagyong Karding.

 Ayon kay DSWD Spokesperson Romel Lopez, kasalukuyan silang nagsasagawa ng relief efforts sa Ilocos region, Cagayan Valley, Central Luzon, CALABARZON, MIMAROPA, Bicol region, National Capital Region (NCR), at Cordillera Administrative Region (CAR).

 Tinatayang nasa 224,000 food packs ang inihanda ng DSWD para sa 194 evacuations centers na pansamantalang tinitirahan ng 9 thousand indibidwal.

 Samantala, tiwala naman si Lopez na sapat ang nabanggit na pondo para makatulong sa mga nasalanta ng bagyo.

 Nag-ikot si Pangulong Ferdinand Marcos Jr. sa mga lugar na sinalanta ng bagyong Karding.

Sa mga larawang ibinahagi ng pangulo sa Twitter post nito, ipinakita niya ang mga lugar na nalubog sa baha partikular sa Bulacan, Tarlac at Nueva Ecija.

Nais umano ng pangulo na makita ng personal ang lawak ng danyos ng bagyo na unang naipaulat bilang super typhoon.

Hindi naman bumaba sa mga lugar na naapektuhan ng bagyo ang pangulo dahil ayaw nitong maantala ang isinasagawang rescue at humanitarian operations ng Local Government Units (LGUs) at mga otoridad.

Magtatakda na lang aniya siya ng araw sa pagpunta sa mga lugar na labis na naapektuhan ng bagyo.

Samantala, agad namang ipinag-utos ng pngulo ang pag air-lift sa mga immediate needs para sa mga residente ng Polillo Islands na una nang hinagupit ng bagyo. –  sa panulat ni Hannah Oledan

Nagsagawa na ng relief operations at namigay ng food packs ang Department of Social Welfare and Development (DSWD)-Bicol sa mga na-stranded at apektado ng bagyong Karding.

Sa panayam ng DWIZ, sinabi ni Norman Laurio, Regional Director ng DSWD-Bicol na nagtungo rin ang mga tauhan ng departamento sa pier ng Pasacaw, Sorsogon upang mamigay ng hot meals sa mga na-stranded sa pantalan.

Maliban sa food boxes, namigay rin ng non-food items para sa mga apektado. –  sa panulat ni ni Hannah Oledan

Pumalo sa halos 500 klase ang nasuspinde dahil sa bagyong Karding.

Batay ito sa datos ng National Disaster Risk Reduction and Management Council (NDRRMC).

Mayorya sa mga nagsuspinde ng klase ay mula sa CALABARZON o katumbas ng 142 klase, sumunod ang CAR na may 77, MIMAROPA na may 73, Region 1 na may 67, Region 5 na nasa 59, Region 2 na nasa 58, at Region 3 na nasa 12.

Iniulat din ng NDRRMC na 328 tanggapan ng pamahalaan ang nagsuspinde ng trabaho dahil sa masamang lagay ng panahon.

Nagpaalala muli ang NDRRMC sa publiko na mag-ingat at makinig sa abiso ng kanilang mga lokal na pamahalaan. –  sa panulat ni Hannah Oledan

Nagsiuwian na ang ibang evacuees sa Polillo Island sa probinsiya ng Quezon sa kanilang mga bahay.

Sinabi ito sa DWIZ ni Polillo Mayor Angelique Bosque.

Ayon kay Bosque, maaliwalas na ang panahon sa kanilang lugar at kalmado na ang karagatan.

Ngunit hindi pa rin aniya maaaring pumalaot o lumakbay ang mga mangingisda dahil wala pang go-signal mula sa mga otoridad. –  sa panulat ni Hannah Oledan

Patay ang tatlong taong gulang na babae habang sugatan naman ang kapwa bata nito matapos magulungan ng Sports Utility Vehicle (SUV) sa Paranaque City.

Sinubukan namang pigilan ng mga residenteng nakasaksi sa insidente ang SUV driver para ipaalam ang nangyari.

Puno naman ng pagsisisi ang tatay ng biktima na pumasok sa trabaho noong araw na iyon habang ang nanay naman ng biktima ay kakauwi lang galing abroad at kinukumpleto pa ang quarantine period.

Ayon sa driver, hindi nito nakita ang dalawang bata at tumanggi itong magbigay ng pahayag at hindi pa nagbibigay ng tulong sa pamilya.

Samantala, isinailalim na sa inquest procedures para sa mga kasong reckless imprudence resulting to homicide and injury ang suspek. –  sa panulat ni Hannah Oledan