Nagsiuwian na ang ibang evacuees sa Polillo Island sa probinsiya ng Quezon sa kanilang mga bahay.
Sinabi ito sa DWIZ ni Polillo Mayor Angelique Bosque.
Ayon kay Bosque, maaliwalas na ang panahon sa kanilang lugar at kalmado na ang karagatan.
Ngunit hindi pa rin aniya maaaring pumalaot o lumakbay ang mga mangingisda dahil wala pang go-signal mula sa mga otoridad. – sa panulat ni Hannah Oledan
Patay ang tatlong taong gulang na babae habang sugatan naman ang kapwa bata nito matapos magulungan ng Sports Utility Vehicle (SUV) sa Paranaque City.
Sinubukan namang pigilan ng mga residenteng nakasaksi sa insidente ang SUV driver para ipaalam ang nangyari.
Puno naman ng pagsisisi ang tatay ng biktima na pumasok sa trabaho noong araw na iyon habang ang nanay naman ng biktima ay kakauwi lang galing abroad at kinukumpleto pa ang quarantine period.
Ayon sa driver, hindi nito nakita ang dalawang bata at tumanggi itong magbigay ng pahayag at hindi pa nagbibigay ng tulong sa pamilya.
Samantala, isinailalim na sa inquest procedures para sa mga kasong reckless imprudence resulting to homicide and injury ang suspek. – sa panulat ni Hannah Oledan
Tiklo ang isang radio broadcaster dahil sa kasong cyber libel sa Cebu City.
Inaresto si Arnold Bustamante para sa umano’y paglabag sa ra 10175 o Cybercrime Prevention Act of 2012.
Ayon sa mga otoridad, nagsampa ng kaso ang isang business establishment matapos umanong tatakan ni Bustamante ang mga produkto nito bilang peke at delikado para sa publiko.
Sinabi rin ni Brigadier General Joel Doria na Hepe ng Anti-Cybercrime Group na dinakip si Bustamante sa warrant of arrest na inilabas ni Judge Ramon Daomilas Jr. ng Cebu City Regional Trial Court.
Samantala, inirekomenda naman ang 10,000 pesos piyansa para sa temporary liberty ni Bustamante. – sa panulat ni Hannah Oledan
Inihayag ni Armed Forces of the Philippines (AFP) Public Affairs Chief Colonel Jorry Baclor na nakaantabay na ang pwersa ng kanilang hanay bago pa man makapasok sa bansa ang bagyo.
Handa rin para sa humanitarian assistance at disaster response operations ang Northern Luzon Command, Southern Luzon Command, at Western Command at lahat ng units na nasa ilalim ng kanilang joint operational control.
Naka-deploy na rin ang mga truck at personnel na tutulong sa mga lugar na kasalukuyang nagsasagawa ng mandatory evacuation.
Maging ang kanilang air at naval assets na gagamitin para sa aerial assessment transport, at evacuation operations ay nakahanda na rin.
Nanawagan naman ang AFP sa publiko na mag-ingat at sumunod sa mga otoridad upang maiwasan ang anumang untoward incident. – sa panulat ni Hannh Oledan
Patuloy na nagpapatupad ng hakbang ang Lungsod ng Maynila upang manatili ang pagiging “Green City” nito.
Ito ang sinabi ni Manila Mayor Honey Lacuna.
Dagdag pa ni Lacuna, bumuo ng tatlong grupo ang Department of Public Services upang linisin ang mga daluyan ng tubig sa lungsod.
Aniya, ang mga Estero Rangers ang nakatoka sa paglilinis ng drainage at iba pang daluyan; ang mga mandaragat naman ang naatasang maglinis ng manila bay at ang mga baseco beach warriors ang taga dampot ng basura sa Manila Bay.
Samantala, naglabas din si Lacuna ng executive order na nag-uutos sa mga empleyado ng City Hall na linisin ang kanilang opisina tuwing Biyernes. – sa panulat ni Hannah Oledan
Pinahintulutan na ng Department of Education (DEPED) na maglagay ng kindergarten classrooms sa ikalawang palapag ng mga paaralan.
Inaprubahan ito ni Vice President at Education Secretary Sara Duterte noong nakaraang linggo sa kondisyong aakuin ng mga paaralan ang responsibilidad para sa anumang aksidente na maaaring mangyari.
Kailangan din na malapit ang mga silid-aralan sa mga emergency access points, at kailangang isama sa lahat ng information material ang lokasyon ng classroom sa ikalawang palapag at ang implikasyon nito sa oras na magkaroon ng emergency.
Saklaw ng polisiya ang parehong public at private schools. – sa panulat ni Hannah Oledan
Itinutulak ni Senador Sherwin Gatchalian ang karagdagang pondo para labanan ang lahat ng uri ng human trafficking kabilang na ang Online Sexual Abuse or Exploitation of Children (OSAEC).
Pinuna ni Gatchalian ang halos 35% tapyas sa pondo sa pagsugpo sa naturang krimen para sa susunod na taon.
Una rito, 59 million pesos na lang ang inilaang pondo para sa kampanya laban sa human trafficking para sa susunod na taon mula sa 90 million pesos na pondo ngayong taon.
Inamin naman ni Justice Undersecretary Nicky Ty, ang pagtapyas sa pondo ay makakapekto sa tier 1 rating ng Pilipinas sa Anti-Trafficking in Persons Report for 2022 ng Amerika.
Samantala, iginiit ni Gatchalian na nananatili pa ring banta ang human-trafficking sa mga Pilipino at sa bansa dahil sa pagiging talamak nito. – sa panulat ni Hannah Oledan
Balik operasyon na ang mga tren matapos manalasa ni super typhoon Karding ngayong araw.
Balik sa normal ang operasyon ng Metro Rail Transit-Line 3 (MRT-3), kung saan umarangkada ito kaninang alas-4:36 ng umaga sa North Avenue station at alas-5:18 ng umaga sa Taft Avenue station.
Itinakda ang last trip ngayong Lunes mamayang alas-9:30 ng gabi sa North Avenue station at alas-10:11 ng gabi sa Taft Avenue station.
Maliban dito inanunsyo naman ng Light Rail Manila Corporation na balik-operasyon na ang Light Rail Transit-Line 1 (LRT-1) sa 19 na istasyon mula Baclaran hanggang Balintawak kaninang alas singko ng umaga.
Umarangkada na rin muli ang LRT-2, kung saan walong tren ang bumibiyahe hanggang kaninang alas-7:25 ng umaga.
Samantala, ilang biyahe naman ng Philippine National Railways (PNR) ang umarangkada na rin ngayong araw.
Ipinanawagan ni Assistant Minority Leader at Gabriela Partylist Rep. Arlene Brosas sa administrasyon na hanapan ng pondo ang P15,000 na subsidiya sa produksyon ng mga magsasaka na apektado ang lupang sakahan ng pananalasa ng bagyong Karding.
Ayon kay Brosas maaari aniyang kunin ang pondo para rito sa contingent fund at bahagi ng unprogrammed fund na nakalaan para sa cash assistance ng mga magsasaka ng palay.
Isusulong din ng mambabatas na maisama nasabing subsidiya para sa nasa 9.7-M magsasaka at mangingisda sa panukalang 2023 budget.
Nabatid na batay sa pinakahuling tala ng Department of Agriculture (DA) nasa 1.7 milyong ektarya na ng pananim ang pinsalang dulot ng bagyo sa LUZOn at halos 1.5 milyong ektarya mula dito ay sakahan ng palay.
Habang aabot naman sa nasa 75. 83% naman ang kabuuang pinsalang maidudulot nito sa mga palayan at 52.37 percent sa mga maisan ayon sa ahensya. – sa ulat ni tina Nolasco (Patrol 11)
Magpapadala ang pamahalaan ng generator sets sa mga lalawigan ng Nueva Ecija at Aurora, matapos mawalan doon ng kuryente dahil sa pananalasa ni super typhoon Karding.
Sa isang Twitter post sinabi ni Pangulong Ferdinand Marcos Jr., na sa kanyang gjnawang aerial inspection, napag-alaman niyang wala paring kuryente sa mga lugar na ito.
Kaya naman ayon sa punong ehelutibo, agad niyang inatasan ang mga kinauukulang ahensya ng gobyerno na magpadala doon ng gensets.
Kabilang din ani Pang. Marcos Jr. sa patuloy na nararanasang problema ng mga apektadong residente sa Nueva Ecija at Aurora ang kawalan ng suplay ng tubig. – sa ulat ni Jopel Pelenio (Patrol 17)