NATIONAL NEWS

Halos 90% ng mga bahay at ilang paaralan sa paanan ng Sierra Madre sa General Nakar, Quezon ang napuruhan sa pananalasa ng bagyong Karding.

Ayon kay Municipal Disaster Risk Reduction and Management officer Erberto Astrera, grabe ang sinapit ng kanilang bayan dahil halos lahat ng bubong ng mga bahay at paaralan ang winasak ng malakas na hangin.

Kabilang anya sa mga napinsala ang Umiray Elementary School sa barangay Umiray, na pinaka-malayong barangay sa General Nakar at nasa boundary ng Dingalan, Aurora.

Sa datos, halos 6k residente sa naturang bayan ang apektado ng kalamidad.

Hindi naman gaanong nagtamo ng pinsala ang iba pang barangay sa General Nakar.

Mayorya ng nasabing bayan ay bahagi ng Sierra Madre na pinaka-mahabang mountain rage sa bansa na aabot sa 540 kilometers o mula sa lalawigan ng Cagayan hanggang Quezon.

Binigyang-pugay ang limang rescuer sa Bulacan na nasawi makaraang anurin ng baha sa bayan ng San Miguel sa kasagsagan ng pananalasa ng bagyong Karding.

Kinilala ang biktimang sina George Agustin, 45-anyos; Marvy Bartolome, 36; Narciso Calayag Jr., 33; Troy Justin Agustin, 30- anyos at Jerson Resurecion.

Nasa gitna ng rescue operation ang lima nang tangayin ang kanilang bangka ng malakas na agos matapos bumagsak ang isang pader sa kalapit na gasolinahan.

Narekober ang labi ng mga rescuer dakong ala-6 kahapon ng umaga sa isang palayan.

Aminado si Bulacan Provincial Disaster Risk Reduction Management Office head Liz Mungcal na napakasakit para sa kanya ang pagkawala ng lima dahil pamilya na ang turing niya sa mga ito.

Sa kabila nito, ipinagmamalaki anya nila ang kabayanihan ng mga nasawing rescuer dahil hanggang sa huli ay nagbuwis ng buhay ang mga ito para makapagbigay-serbisyo sa mga mamamayan.

Tiniyak naman ni Governor Daniel Fernando ang paggawad ng mataas na parangal at tulong sa pamilya ng mga rescuer.

Pinamamadali na ng Senado ang pagpapatayo ng mga evacuation center sa ibat-ibang bahagi ng bansa.

Ayon kay Senator Christopher “Bong” Go, dapat pagtibayin ang Senate Bill 193 na may layuning masigurong ligtas ang mga pamilyang apektado ng kalamidad na nasa evacuation centers.

Sinabi ni Go, na mahalaga ang Disaster Resiliency sa bansa sa gitna ng kalamidad kabilang na ang bagyo, lindol, storm surge, landslide at iba pa kaya dapat din na may sapat na kagamitan ang mga evacuee.

Iginiit din ni Go na dapat ligtas, at permanente ang pagpapatayo ng evacuation center sa mga siyudad, munisipalidad at lalawigan kung saan, dapat ay kakayanin nito ang mga super typhoons na may bilis ng hanging aabot sa 300 kilometers per hour, at seismic activity o lakas ng lindol na aabot hanggang Magnitude 8.0.

Bukod pa dito, kailangan ding masiguro ang mga kakailanganin ng mga lilikas gaya ng emergency packs na inubuo ng kumot, mga damit, pagkain, tubig, personal hygiene at mga gamot.

Itinuturong dahilan ng Lokal na Pamahalaan ng San Miguel, Bulacan, ang talamak na quarrying operations sa bundok ng Sierra Madre na nagresulta ng matinding pagbaha sa ilang bahagi ng lalawigan.

Matatandaang nalubog sa baha ang 49 na barangay makaraang manalasa ang bagyong Karding kung saan, limang rescuers ang nasawi dahil sa matinding pagbaha.

Ayon kay San Miguel Mayor Roderick Tiongson, ang bundok ng Sierra Madre ang dahilan kaya hindi dumirekta ang hagupit ng Typhoon Karding sa kanilang lugar kaya dapat itong pahalagahan, pangalagaan at protektahan maging ang iba pang kabundukan sa Pilipinas.

Naniniwala si Tiongson na sa gitna ng mga kalamidad sa bansa, ang kalikasan ang siyang sasalba o sasagip sa maraming buhay at ari-arian.

Sinalanta din ng Typhoon Karding ang ilang korte sa Nueva Ecija partikular na sa Cabanatuan City.

Batay sa partial report ng Korte Suprema, kailangan ng agarang re-pair o agad na maisa-ayos ang kanilang tanggapan sa nabanggit na lugar dahil sa pinsalang iniwan ng nagdaang bagyo.

Samantala, wala namang matinding pinsalang idinulot si Typhoon Karding sa mga hukuman pero pinamamadali na ang pagsasa-ayos sa mga nasirang tanggapan ng korte upang hindi maantala ang mga operasyon nito.

Muling nagpaalala sa publiko ang Philippine Animal Welfare Society (PAWS) na huwag pabayaan o iwanan at isama sa paglikas ang kanilang mga alagang hayop sa gitna ng kalamidad.

Kasunod ito ng muling pag-alala ng ahensya sa trahedyang nadatnan ng mga miyembro ng PAWS nang bumisita sa mga lugar na naapektuhan ng nagdaang bagyong Ulysses kung saan, maraming mga bangkay ng hayop ang nakitang nakatali at nakakulong sa gitna ng pagbaha.

Ayon sa PAWS, dapat masiguro ng mga may-ari ang kaligtasan ng kanilang mga alagang hayop sa tuwing may sakuna tulad ng bagyo.

Dahil dito, muling nanawagan ang PAWS na alisin ang kadena ng inyong mga alagang hayop o i-unlock ang kanilang mga kulungan kung hindi ito kayang ilikas sa panahon ng emergency o mga sakuna.

Iginiit ng PAWS na karapatan ng mga hayop na mabigyan sila ng pagkakataong maging malaya at makipaglaban para sa kanilang mga buhay.

Nagkasa ng Road clearing operation sa dalawang lugar sa Nueva Vizcaya matapos maitala ang landslide bunsod ng pananalasa ng typhoon Karding.

Ayon sa mga otoridad, hindi madaanan ang Malico Road sa Malico, Santa Fe papuntang Pangasinan at Antutut Provincial Road sa Kasibu matapos gumuho ang lupa sa mga nabanggit na kalsada dahilan para suspindehin ang trabaho sa public offices sa Nueva Vizcaya.

Samantala, umabot naman sa 105 pamilya o katumbas ng 401 indibidwal ang inilikas at nananatili pa rin sa evacuation centers bunsod ng kalamidad.

Sa ngayon, namahagi na ng relief goods sa mga apektadong pamilya sa ibat-ibang evacuation centers ang pamahalaang lokal ng lalawigan.

Nagsagawa ng donation drive ang Caritas Manila o Church of the Poor para sa mga nasalanta ng bagyong Karding sa Luzon.

Sa official facebook page, nanawagan sa publiko ng relief assistance ang naturang Simbahan upang matulungan ang mga apektado ng nagdaang bagyo.

Ayon sa Caritas Manila, ang kada P1,000 na ibibigay ng publiko bilang donasyon ay katumbas ng 10 kilong bigas, assorted canned goods, noodles, munggo, oatmeal, at malinis na inuming tubig; ang P2,000 ay para naman sa wash kits na binubuo ng water voucher, jerry cans, pail with cover, at sanitation and hygiene kits kabilang na ang body soap, laundry soap, toothbrush, toothpaste, at alcohol.

Katumbas naman ng bedding materials na binubuo ng family size tent o trapal, kumot at mats ang P5,000 na donasyong ibibigay ng publiko; habang ang P10,000 na donasyong matatanggap ng Simbahan mula sa mga mag-aabot ng tulong, ay ilalaan naman sa shelter repair sheets na binubuo ng galvanized iron sheets o yero, vulcaseal, coco lumber, semento, mga pako, at solar lamp.

Layunin nitong mabigyan ng pagkakataon na makapagsimulang muli ang mga pamilyang naapektuhan ng bagyong karding partikular na ang mga nawalan ng tirahan dulot ng pagbaha.

Nilinaw naman ng Caritas Manila na ang donation drive na kanilang isinasagawa ay ligal at aprubado o mayroong solicitation permit mula sa Department of Social Welfare and Development (DSWD).