NATIONAL NEWS

Nanumpa na bilang bagong Ombudsman si dating Justice Secretary Jesus Crispino Remulla.

Pasado alas-diyes ng umaga nang dumating si Remulla sa Korte Suprema sa Padre Faura, Maynila, kung saan pinangasiwaan ni Supreme Court Senior Associate Justice Marvic Leonen ang kanyang panunumpa.

Bago italaga bilang Justice Secretary, nagsilbi si Remulla bilang Kinatawan ng 3rd District ng Cavite mula 2004 hanggang 2010, at ng 7th District mula 2010 hanggang 2013.

Naging Gobernador din ng Cavite si Remulla mula 2016 hanggang 2019, at muling nahalal bilang Kinatawan ng 7th District bago italaga sa Department of Justi

Niyanig ng magnitude 4.4 na lindol ang lalawigan ng La Union kaninang alas-10:30 ng umaga.

Ayon sa PHIVOLCS, natunton ang sentro ng pagyanig sa layong 3 kilometro hilagang-silangan ng bayan ng Pugo at may lalim na 23 kilometro.

Naramdaman ang Intensity IV sa Pugo at Tubao, La Union at Baguio City;

Intensity III naman sa Itogon, Benguet; Villasis, Pangasinan; at San Fernando, La Union.

Tectonic ang origin ng lindol, at walang inaasahang aftershocks o pinsala matapos ang pagyanig.

Tiniyak ng Department of Public Works and Highways na walang substandard o ghost flood control projects sa Muntinlupa City at lahat ng proyekto ay aprubado ng Central Office.

Tugon ito ng DPWH sa liham ng Sangguniang Kabataan Federation sa pangunguna ni Councilor Jonas Abadilla, SK Federation President ng Muntinlupa, na humiling ng paglilinaw sa mga flood control projects sa kanilang lungsod — partikular ang dalawang proyekto sa Barangay Poblacion na nagkakahalaga ng ₱143.5 milyon.

Sa kanilang liham na ipinadala noong Setyembre 25, mula sa Barangay Poblacion at Southville 3, tinanong ng mga kabataan kung sino ang nagpapasya sa pagpili ng mga proyekto, ano ang mga batayan sa pagpapatupad, at kung kabilang ba ang Muntinlupa sa mga proyekto na iniimbestigahan ng kagawaran.

Kabilang sa kanilang binanggit na proyekto ay ang ₱49-milyong flood control project sa Barangay Poblacion at ₱94.5-milyon sa Southville 3.

Pinuri naman ng DPWH District Engineering Office ang SK sa pagiging mapagmatyag at ipinaliwanag na ang project identification at implementation ay pinangangasiwaan ng kagawaran, katuwang ang local government units at district representatives.

Gayunman, ang DPWH Central Office pa rin ang may final approval sa ilalim ng General Appropriations Act na ipinapasa ng Kongreso.

Ayon sa DPWH, tinutukoy ang flood control projects batay sa community vulnerability, technical studies, at proteksyon ng umiiral na imprastraktura.

Iginiit ni 1Sambayan convenor Atty. Howard Calleja na kailangang maging balanse ang transparency at confidentiality sa isinasagawang imbestigasyon ng Independent Commission for Infrastructure hinggil sa maanomalyang flood control projects.

Aniya, para maalis ang duda ng taong bayan sa paggulong ng kaso, kailangang alamin ng otoridad ang iba’t ibang antas ng transparency na maaaring buksan para sa publiko.

Sa pananaw ni Atty. Calleja, nais lamang makita ng taong bayan na may partisipasyon sila sa imbestigasyon.

Maaari aniya ito sa pamamagitan ng ilang grupo na maaaring dumalo o tumayong representante ng bawat sektor ng lipunan sa bawat pagdinig ng ICI, at silang mag-uulat sa publiko hinggil sa mga nangyayari sa mga hearing.

Ibinunyag ni Senate Committee on Finance Chairman Sherwin Gatchalian na may overpricing sa mga farm-to-market roads na ginawa ng Department of Public Works and Highways noong 2023 at 2024.

Ayon kay Sen. Gatchalian, kabilang sa mga contractor na may overpriced farm-to-market road projects ang Hi-Tone Construction and Development Corporation na iniimbestigahan din sa maanomalyang flood control projects at sinasabing may kaugnayan kay dating Ako Bicol Partylist Rep. Zaldy Co.

Batay sa tala ng senador, nasa ₱10.3 bilyon ang kabuuang halaga ng overpriced farm-to-market roads, na karamihan ay nasa Bicol Region.

Dagdag pa ni Sen. Gatchalian, nadiskubre niya ang aniya’y extremely overpriced farm-to-market roads sa sampung rehiyon sa bansa, kabilang ang Regions 5 at 8.

Naniniwala ang mambabatas na hindi lamang nagkataon na Region 5 ang may pinakamalaking nakuha na FMR funds at may pinakamaraming kontrata ang Hi-Tone Construction and Development Corporation na sinasabing konektado kay Co, na dating chairman ng House Committee on Appropriations.

Sinabi naman ni Agriculture Secretary Francisco Tiu Laurel Jr. na hindi pa siya ang kalihim ng Department of Agriculture noong napondohan ang mga nabanggit na FMRs, kaya maging siya ay ikinagulat ito.

Bukas ang Independent Commission for Infrastructure (ICI) sa posibilidad na bigyan sila ng karagdagang kapangyarihan sa isinasagawang imbestigasyon sa maanomalyang flood control projects.

Pero ayon kay ICI Executive Director Brian Keith Hosaka, kahit na mayroon lamang silang recommendatory power, ipagpapatuloy pa rin nilang gawin ang kanilang mandato.

Umaasa rin si Hosaka na madaragdagan ang bilang ng kanilang staff para mas mabilis na matapos ang kanilang trabaho at agarang matugunan ang hinaing ng mga Pilipino na mapanagot ang mga tao sa likod ng kontrobersyal na kaso.

Samantala, nanindigan din ang ICI sa kanilang desisyon na hindi i-livestream ang isinasagawang imbestigasyon upang maiwasang magamit ito sa anumang political agenda.

 Papalo sa ₱1.7 trillion ang nalagas sa Philippine stock market sa loob lamang ng tatlong linggo dahil sa isyu ng korapsyon sa bansa, partikular na ang kontrobersiya sa maanomalyang flood control projects.

Kinumpirma ito ni Securities and Exchange Commission Chairman Francis Lim sa annual conference ng Financial Executives Institute of the Philippines.

Ayon kay Chairman Lim, dahil sa kontrobersiya, nawalan ng kumpiyansa ang publiko at nalagas ang napakalaking halaga sa market value sa kabila ng tumataas na corporate earnings.

Aniya, hindi umaalis ang mga investors dahil sa mahihinang fundamentals kundi dahil sa mahinang integridad.

Binigyang-diin ni Chairman Lim na kapag nasira ang tiwala ng mga namumuhunan, nawawalan ng kapital — kung saan ang pamahalaan, mga negosyo, at publiko ang mananagot dito.