NATIONAL NEWS

Naniniwala si dating Sandiganbayan Associate Justice Alex Quiroz sa kakayahan ni dating Justice Secretary Crispin Remulla bilang bagong Ombudsman ng bansa.

Kasunod na rin ito ng pagkakatalaga ni Pangulong Ferdinand Marcos Jr. kay Remulla bilang Ombudsman na may mandatong iprayoridad ang mga reklamong inihahain laban sa mga opisyal ng gobyerno.

Ayon kay Justice Quiroz, may sapat na kakayahan at kaalaman si Remulla upang mapanatili ang transparency sa mga isasagawang imbestigasyon sa pamahalaan, kabilang ang anomalya sa flood control projects.

Sa gitna naman ng mga batikos at pagtutol ng ilang kritiko sa appointment, dapat aniyang bigyan ng pagkakataon ang bagong Tanodbayan na gampanan nito ang kaniyang mga tungkulin alinsunod sa Saligang Batas.

Welcome sa Independent Commission for Infrastructure (ICI) ang pagkakatalaga kay dating Justice Secretary Jesus Crispin Remulla bilang bagong Ombudsman.

Naniniwala si ICI Executive Director Brian Keith Hosaka na walang magbabago sa takbo ng kanilang imbestigasyon sa oras na opisyal nang manungkulan si Remulla.

Mas makatutulong aniya sa kanilang trabaho ang pagkakaroon ng bagong Tanodbayan para mapabilis ang proseso at magkaroon ng magagandang resulta ang kanilang imbestigasyon sa maanomalyang flood control projects.

Tiniyak naman ni Hosaka na pabibilisin nila ang paghahain ng rekomendasyon sa Office of the Ombudsman upang kasuhan at mapanagot ang mga personalidad na sangkot sa kontrobersya.

Gayunman, maingat aniya nilang isinasagawa ang imbestigasyon, kabilang ang pangangalap ng ebidensya, upang hindi mabulilyaso lalo’t malaki ang inaasahan ng publiko mula sa kanilang mandato na makulong ang mga sangkot sa kaso.

Pinatitiyak ni Pang. Ferdinand Marcos Jr. sa bagong talagang Ombudsman na si dating Justice Sec. Jesus Crispin Remulla na panindigan ang transparency at accountability sa mga opisyal ng pamahalaan.

Sinabi ni Palace Press Officer at Communications Usec. Claire Castro na ang pagtatrabaho ni Remulla bilang Ombudsman ay para sa bansa at hindi para sa iisang sektor o grupo lamang.

Dagdag pa ni Usec. Castro, inaasahan ng Pangulo ang tapat na pagtupad sa tungkulin ni dating DOJ Secretary at matapang na pagharap at pag-iimbestiga sa mga dapat imbestigahan.

Hindi rin aniya maaaring talikuran ng bagong Ombudsman ang trabaho dahil karapatan ng taumbayan na malaman at makita ang pag-iimbestiga nito sa mga reklamo laban sa mga public officials.

Ipinasilip ni Cavite 4th District Rep. Kiko Barzaga ang umano’y impeachment complaint na kaniyang ihahain laban kay Pangulong Ferdinand Marcos Jr.

Sa Facebook page ng Neophyte Lawmakers, kaniyang ibinahagi ang isang video kung saan tinawag niyang crocodile farm ang plenaryo ng Kamara.

Sinabi din niya na absent umano ang mga buwaya at pansamantalang nagpahinga sa sesyon ng Kamara.

Ipinakita rin niya sa publiko ang ihahaing reklamo para patalsikin sa posisyon si Pangulong Marcos.

Kabilang sa pinagbatayan ng bagitong mambabatas ang betrayal of public trust.

Umaasa si Barzaga na tutugunan ng Kongreso ang kaniyang hinaing at agarang mapapatalsik sa puwesto si PBBM at masimulan ang imbestigasyon sa mga sangkot sa maanomalyang flood control projects.

Una nang nag-post si Barzaga na nananawagan kay Pangulong Marcos na magbitiw na ito sa puwesto, na sinundan pa niya ng isa pang post kung saan sinabi nito na hindi lang si dating House Speaker at Leyte Rep. Martin Romualdez ang dapat makulong kundi pati na rin daw si PBBM.

Tiniyak ng Independent Commission for Infrastructure na ipagpapatuloy nila ang kanilang mandato na imbestigahan ang maanomalyang flood control projects sa kabila ng kawalan ng kapangyarihang makapag-contempt ng mga indibidwal na posibleng sangkot sa kontrobersya.

Ayon kay ICI Executive Director Brian Keith Hosaka, patuloy sila sa pag-iimbestiga kahit na recommendatory power lamang ang mayroon sila.

Pinawi rin ni Exec. Dir. Hosaka ang takot ng publiko na baka ma-whitewash o madaya ang imbestigasyon dahil closed-door ang kanilang mga ginagawang pagdinig.

Naninindigan din ang ICI sa desisyon nito na hindi i-livestream ang imbestigasyon dahil maaari anila itong magamit sa pamumulitika.

Dahil dito, naglalabas na lamang ang komisyon ng mga litrato ng mga resource persons na sumasailalim sa kanilang mga hearing.

Pag-aaralan ng Malacañang kung maaaring panagutin o sampahan ng kaukulang kaso ang ilang sundalo na naghayag ng planong pag-atras ng suporta sa administrasyong Marcos.

Matatandaan na kamakailan, inamin ni Armed Forces of the Philippines Chief of Staff General Romeo Brawner Jr. na may maliit na grupo ng mga sundalo na sinasabing nagbanta ng pagbawi ng kanilang suporta sa kasalukuyang administrasyon.

Sinabi ni Palace Press Officer at PCO Undersecretary Atty. Claire Castro na matagal nang alam ni Pangulong Ferdinand Marcos Jr. ang ganitong impormasyon.

Gayunman, tiniyak ni General Brawner sa Pangulo na mananatiling tapat ang buong hanay ng AFP sa umiiral na chain of command.

Ayon kay Usec. Castro, patuloy ang tiwala ng Commander-in-Chief sa Sandatahang Lakas ng Pilipinas at kinikilala ng Pangulo ang kagalingan at dedikasyon ng mga ito sa tungkulin.

Naniniwala aniya si Pangulong Marcos na gagawin ng mga sundalo ang tama at nararapat, alinsunod sa sinumpaang tungkulin ng mga ito na maging tapat sa bayan, sa taumbayan, at sa chain of command.

 Sinibak ng Armed Forces of the Philippines si Col. Raymund Dante Lachica bilang commander ng AFP Security and Protection Group, na nagbibigay ng seguridad para kay Vice President Sara Duterte.

Ayon kay AFP Public Affairs Office Chief Col. Xerxes Trinidad, mula sa pagiging commander ng ASPG, na dating kilala rin bilang Vice Presidential Security and Protection Group, ni-reassign si Col. Lachica sa Philippine Army noong Oktubre a-kwatro.

Sinabi ni Col. Trinidad na ang reassignment ni Col. Lachica ay may kinalaman sa kinakaharap nitong kaso sa Ombudsman na sinasabing may kaugnayan sa confidential funds ng Office of the Vice President noong 2022.

Nabatid na inirekomenda ng Kamara ang pagsasampa ng kasong plunder, technical malversation, bribery, at corruption charges laban kay Col. Lachica at Col. Dennis Nolasco dahil sa sinasabing maling paggamit sa pondo ng OVP.

Handa si dating House Speaker at Leyte 1st District Rep. Martin Romualdez, na humarap sa isinasagawang pagdinig ng Independent Commission for Infrastructure o ICI.

Ito’y matapos kumpirmahin ng tanggapan ni Rep. Romualdez, na natanggap na nila ang imbitasyong ipinadala ng komisyon.

Ayon kay Rep. Romualdez, handa siyang makipagtulungan sa ICI at buo ang kaniyang suporta sa layuning isulong ang transparency at pananagutan tungo sa mabuting pamamahala.

Patunay lamang ito na fake news ang mga kumakalat na balita online na nasa labas ng bansa ang dating lider ng Kamara.

Matatandaang inimbitahan ng ICI si Romualdez para dumalo at makiisa sa nagpapatuloy na pagdinig ng ICI sa darating na Martes, October 14, 2025.

Arestado ang isang lalaki matapos mahuling nagnakaw ng otsenta pesos na tsokolate sa loob ng isang mall sa Quiapo, Maynila.

Batay sa police report, nahuli ang suspek ng duty security guard habang tinatangkang ilabas ang isang milk chocolate nang hindi ito binabayaran.

Hindi anila nagpakita ng resibo ang suspek, dahilan para agad itong arestuhin.

Sa ngayon, nasa kustodiya ng Manila Police District–Sta. Cruz Police Station ang suspek at inihahanda na ang kasong theft laban dito.

—sa panulat ni John Riz Calata