NATIONAL NEWS

Dumarami ang mga Pilipinong nakakaramdam ng matinding stress dahil sa problema sa pera, kalusugan, trabaho, pag-aaral, at pamilya.

Sa isinagawang survey ng Social Weather Stations na ginawa noong September 24 hanggang 30, lumabas na 34% ng mga Pilipino ay madalas ma-stress araw-araw. Mas mataas ito kaysa sa 27% noong 2019, bago ang pandemya.

Samantala, 32% ang minsan lang na-stress, 30% ang madalang ma-stress, at 4% ang halos hindi nakararanas nito.

Ayon sa SWS, 1,500 na matatanda mula sa iba’t ibang bahagi ng bansa ang tinanong sa survey.

Ipinapakita ng resulta na lumalala ang problema sa mental at emosyonal na kalusugan ng mga Pilipino dahil sa patuloy na hamon sa ekonomiya at araw-araw na buhay.

Hindi pa nakakabalik ng Pilipinas si dating Ako Bicol Party-list Rep. Zaldy Co.

Ito’y ayon sa immigration and travel records ng Bureau of Immigration kasunod ng inilabas na Immigration Lookout Bulletin Order para sa dating mambabatas dahil sa kanyang pagkakadawit sa mga maanomalyang flood control projects at insertions sa 2025 budget.

Ayon kay BI Deputy Spokesman Melvin Mabulac, wala pa sa bansa si Co, habang tinitingnan din nila kung sino pa sa bagong listahan ng mga may ILBO ang nasa Pilipinas.

Nilinaw rin ni Mabulac na para lamang sa monitoring ng biyahe ng isang indibidwal ang ILBO, at iba pa ito sa hold departure order na inilalabas ng korte.

Pinag-aaralan ng Senado na tapyasan ang budget ng Department of Public Works and Highways para sa infrastructure projects na mapag-aalamang overpriced.

Ayon kay Senate Committee on Finance Chairman Sherwin Gatchalian, napag-usapan nila ang haka-haka ni Senador Loren Legarda na posibleng bago pa isinumite ang budget ng DPWH ay overpriced na ang ilan sa mga nilalaman nito.

Kaya kapag naaprubahan ito, sinabi ni Sen. Gatchalian na magpapatuloy pa rin ang ligaya ng mga tiwaling opisyal at kawani ng DPWH hanggang sa susunod na taon.

Una nang inirekomenda ng Independent Commission for Infrastructure na bawasan ng kalahati ang halaga ng kontrata ng DPWH para sa mga public works.

Naitala sa pinakahuling survey ng Tangere ang pinakamataas na public distrust sa pamahalaan sa loob ng tatlong taon.

Batay sa survey, pito sa sampung Pilipino o 70 percent ang suportado ang mungkahi ni Senador Alan Peter Cayetano na magkaroon ng snap elections dahil sa pagkadismaya ng publiko sa performance ng mga national institution.

Pinakamaraming pabor na magsagawa ng early election sa Visayas at Mindanao, na nagpapakita rin ng malakas na pagsuporta kay Vice President Sara Duterte.

Kaugnay nito, umabot sa 42 percent ang distrust rating sa Kamara; 39 percent sa Senado; 30 percent sa Office of the President; at 28 percent sa Office of the Vice President.

Isinagawa ang survey sa pamamagitan ng mobile-based respondent platform, na nilahukan ng 1,500 participants sa buong bansa.

Tiniyak ng Department of Public Works and Highways na walang substandard o ghost flood control projects sa Muntinlupa City at lahat ay aprubado ng central office.

Tugon ito ng DPWH sa liham ng mga Sangguniang Kabataan, sa pangunguna ni Councilor Jonas Abadilla, pangulo ng SK Federation ng Muntinlupa, na humiling na mabigyang linaw ang mga flood control projects sa kanilang lugar, partikular ang dalawang proyekto sa Barangay Poblacion na nagkakahalaga ng 143.5 million pesos.

Sa liham ng SK Federation mula Barangay Poblacion at Southville 3 nitong September 25, nagpaabot ng kanilang saloobin ang mga kabataan kung natutukoy at inaaprubahan ang mga infrastructure priorities sa gitna ng mga ispekulasyon sa ilang proyekto.

Kabilang sa kanilang kinuwestyon ay sino ang nagpapasya kung anong flood control projects ang dapat ipatupad, ano ang mga batayan sa pagpili ng mga lugar, at sino ang nag-apruba sa 49 million peso project sa Barangay Poblacion at 94.5 million peso project sa Southville 3.

Tinanong din nila kung kabilang ba ang mga proyekto sa Muntinlupa sa iniimbestigahan ng D.P.W.H.

Pinasalamatan naman ng DPWH District Engineering Office ang SK sa kanilang pagiging mapagmatyag at nilinaw na ang project identification at implementation ay pinangangasiwaan mismo ng kagawaran sa tulong ng local government units at district representatives.

Gayunman, ang D.P.W.H. central office pa rin ang may final approval sa ilalim ng General Appropriations Act na ipinapasa ng Kongreso, habang ipinaliwanag ng kagawaran na tinutukoy ang flood control projects batay sa community vulnerability, technical studies, at proteksyon ng umiiral na imprastraktura.

Nangunguna si Vice President Sara Duterte bilang presidential contender sakaling magsagawa ng snap elections.

Ito’y matapos imungkahi ni Senador Alan Peter Cayetano na magsagawa ng snap elections upang maibalik ang tiwala ng publiko, kung saan hindi maaaring tumakbo sa pwesto ang mga kasalukuyang opisyal ng pamahalaan.

Batay sa pinakahuling survey ng Tangere, nakakakuha ng 43 percent ng voter’s preference si VP Sara, na sinundan ni dating Vice President Leni Robredo na nakakakuha ng 23%

Para naman sa pagka-bise presidente, nanguna si Sen. Bong Go na nakakakuha ng 30%, na sinundan naman ni Senador Bam Aquino, 20%.

Sakali namang sundin ang mungkahi ni Sen. Cayetano na walang incumbent high-ranking official ang maaaring tumakbo sa isasagawang snap elections.

Nangungunang kandidato sa pagka-senador sina Pasig City Mayor Vico Sotto, Manila City Mayor Isko Moreno, at dating Senador Grace Poe.

Gayundin sina Davao City Acting Mayor Baste Duterte, Rep. Paolo Duterte, at media personality na si Ben “Bitag” Tulfo.

Isinagawa ang survey sa pamamagitan ng mobile-based respondent platform, na nilahukan ng 1,500 participants sa buong bansa.

Nananatiling tapat ang Armed Forces of the Philippines sa sinumpaan nitong paglingkuran ang mga mamamayan, konstitusyon, at bayan.

Ito ang binigyang-diin ni AFP spokesperson, Col. Francel Margareth Padilla matapos mabigo ang tangkang kudeta ng ilang retiradong military official noong Setyembre a-bente-uno.

Ipinunto ni Col. Padilla na hindi solusyon ang “military intervention” sa bawat mabigat na problemang kinakaharap ng bansa, tulad ng ma-anomalyang flood control projects.

Itinanggi rin ng tagapagsalita ng Hukbong Sandatahan ang mga haka-haka na may mga aktibong sundalo na nais lumahok sa mga kilos-protesta kontra katiwalian at hindi dapat magpadala ang taumbayan sa mga salsol ng ilang pulitiko kaugnay sa tangkang pagkilos ng militar laban sa katiwalian.

Tiniyak din ni Col. Padilla na sa halip na daanin sa dahas ang kampanya kontra korapsyon, mas naisin nilang gumulong ang due process at iba pang solusyon upang matuldukan na ang mga problemang naka-ugat sa katiwalian.

Patuloy ang isinasagawang operasyon ng mga otoridad para ilikas sa evacuation sites ang mga residenteng nakatira sa malapit sa coastal area, partikular sa unang distrito ng Davao Oriental.

Kasunod ito ng magnitude 7.4 na lindol kung saan dalawa na ang naiulat na nasawi, kabilang ang isang senior citizen na namatay matapos ma-cardiac arrest dahil sa takot sa malakas na pagyanig, habang ang isa naman ay 54 taong gulang na nasawi matapos matabunan ng gumuhong pader.

Sa ambush interview, sinabi ni Davao Oriental 2nd District Rep. Cheeno Almario na nananatiling naka–high alert ang lalawigan dahil na rin sa posibilidad na magkaroon ng tsunami.

Patuloy din aniya ang monitoring at assessment sa mga pinsalang idinulot ng malakas na lindol.

Nanawagan din ng tulong ang kongresista sa mga ahensya ng gobyerno na tugunan ang pangangailangan ng mga apektado ng lindol.

Nanghihinayang ang kongresista sa mga nasayang na pondo na hindi nailaan sa mga proyektong at programang makakatulong sa bawat komunidad.

Kinumpirma ni Davao Oriental 2nd District Rep. Cheeno Almario na dalawa na ang naitalang nasawi matapos maitala ang magnitude 7.4 na lindol.

Sa ambush interview sa Kamara, sinabi ni Cong. Almario na isa sa nasawi ay natabunan ng gumuhong pader, habang ang isa naman ay nasawi matapos ma-cardiac arrest dahil sa takot o epekto ng malakas na lindol.

Patuloy pa aniya ang ginagawang operasyon sa kanilang lugar matapos ang lindol, kasabay ng panawagan sa mga ahensya ng gobyerno at mga lokal na pamahalaan na tulungan o tugunan ang pangangailangan ng mga apektado ng lindol.

Pinasalamatan naman ng kongresista ang agarang pagpaabot ng tulong ng Department of Social Welfare and Development (DSWD) sa mga biktima ng malakas na lindol sa kanilang nasasakupan.

Sa ngayon ay nailikas na aniya ang mga residenteng nakatira malapit sa coastal area, partikular ang mga nakatira sa unang distrito ng Davao Oriental na pinakatinamaan ng lindol dahil sa posibleng banta ng tsunami.

Pinakakansela na ni House Speaker Faustino Dy III sa Department of Justice (DOJ) ang passport ni dating Cong. Elizaldy Co.

Ayon kay Speaker Dy, mula nang matanggap ng Kamara ang irrevocable resignation ni Co, ay agad siyang nakipag-ugnayan kay dating Justice Secretary at ngayo’y Ombudsman Jesus Crispin Remulla upang hilingin ang agarang pagkansela sa pasaporte ng kongresista upang limitahan ang paggalaw nito sa gitna ng imbestigasyon sa umano’y iregularidad sa mga proyekto ng imprastraktura.

Ipinaliwanag ng lider ng Kamara na bagaman ang DOJ ang nangangasiwa sa Bureau of Immigration, ang Department of Foreign Affairs (DFA) pa rin ang may kapangyarihang kanselahin ang passport ni Co.

Ipinaliwanag ni Dy na dumulog sila sa DOJ para sa mabilisan at tamang koordinasyon, at upang magkaroon ng wastong hakbang o proseso para sa agarang pagkansela ng passport ni Co.

Bilang tugon, tiniyak naman ni Remulla na agad nilang ipatutupad ang hiling ng Kamara o gagawin ang pinakamabilis na paraan para sa pagkansela ng pasaporte ng kongresista.

Sakaling bumalik si Co sa Pilipinas, ipinaliwanag ni Speaker Dy na ang DOJ at ICI o Independent Commission for Infrastructure ang posibleng humawak sa kaso kaugnay ng iregularidad sa infrastructure at flood control projects.