Nagsagawa ng Bakunahang Bayan Special COVID-19 Vaccination Days ang Department of Health (DOH) sa mga homeless people sa Quezon City.
Ayon kay DOH Officer-In-Charge (OIC) Maria Rosario Vergeire, bahagi ng kanilang programa ang homeless families na madali ding tinatamaan ng COVID-19.
Sinabi ni Vergeire na bukod sa bakunahan, inaalam na rin ng kanilang ahensya ang iba pang problemang pangkalusugan ng mga homeless people, gaya ng malnutrisyon, at routine immunization.
Nag-alok ng calamity loan at tatlong buwang advance pension ang Social Security System (SSS) para sa mga miyembro at pensyonadong naapektuhan ng Typhoon Karding.
Ayon kay SSS President, Chief Executive Officer Michael Regino, ang Calamity Loan Assistance Program (CLAP) ay binubuo ng three-month advance pension for social security at Employees’ Compensation (EC) Pensioners.
Sa ilalim ng naturang programa, papayagan ang mga miyembro ng SSS na mai-loan ang katumbas ng kanilang normal monthly salary credit sa nakalipas na 12 buwan habang ibibigay naman sa mga pensiyonado ang tatlong buwang advance pension na ibabatay naman sa kanilang buwanang pensyon.
Samantala, nanawagan naman ang SSS sa kanilang miyembro na magrehistro muna sa kanilang website na my.sss portal upang makapag-apply sa nasabing programa.
Nagsagawa ng aerial search operation ang pinagsanib puwersa ng mga tauhan ng Philippine Coast Guard (PCG), Philippine National Police (PNP), Philippine Air Force (PAF), Philippine Army, Maritime Group, Provincial Disaster Risk Reduction and Management Office (PDRRMO) at Municipal Disaster Risk Reduction and Management Office ng Mercedes para hanapin ang limang mangingisdang nawawala mula sa bayan ng Mercedes, Camarines Norte.
Ayon sa mga otoridad, limang araw nang nawawala ang mga mangingisda mula nang manalasa ang Bagyong Karding sa Luzon.
Kinilala ang mga nawawalang mangingisda na sina Roger Pun-An, 59-anyos; Gerome Pun-An, 19-anyos; Efren Lozada Jr., 42-anyos; Rodel Carillo, 35-anyos; at Ricky Nuñez na parehong mga pumalaot isang linggo bago tumama ang Typhoon Karding.
Sa ngayon, nagpapatuloy pa ang aerial inspection ng mga ahensya ng gobyerno sa nabanggit na lugar, hinggil sa pagkawala ng mga mangingisda.
Suportado ng mga telecommunications company ang mandatory registration ng mga sim card na isinusulong sa kongreso.
Tiniyak ng Globe Telecom, PLDT-Smart at DITO Telecommunity na handa silang makipag-tulungan sa mga otoridad matapos ipasa ng senado at kamara ang kani-kanilang bersyon ng Sim Registration Bill.
Ayon kay Froilan Castelo, General Counsel ng Globe, magiging pangunahing panlaban sa spam at scam SMS ang Sim Card Registration Bill dahil makikilala na ang mga gumagamit ng prepaid sim card.
Inihayag naman ni PLDT-Smart President at CEO Alfredo Panlilio na handa silang makibahagi sa babalangkasin ng Implementing Rules and Regulations.
Samantala, sinabi ni DITO Chief Technology Officer, retired Maj. Gen. Rodolfo Santiago na handa rin silang tumalima at ipatupad ang batas sa oras na maipasa ito.
Gugulong na sa Metro Manila ang mobile police outpost ng National Capital Region Police Office na bahagi ng S.A.F.E. NCRPO project ng distrito.
Ayon kay NCRPO Acting Regional Director PBGEN Jonnel Estomo, dinesenyo ang ‘movable outpost’ upang madali itong maililipat sa ibang lugar na nangangailangan ng presensiya ng pulis lalo na sa panahon ng mga espesyal na okasyon o aktibidad tulad ng Halloween Day at Undas.
Ipinasilip naman sa media nina NCRPO spokesperson PLTCOL Dexter Versola at PIO Chief PMAJ Anthony Alising ang isang prototype mobile outpost sa harap ng Parañaque Integrated Terminal Exchange (PITX) sa Brgy. Tambo, Parañaque City.
Sinabi ni Estomo na ang rolling station ay magsisilbing tambayan ng mga pulis upang agad silang malalapitan ng mga taong nangangailangan ng kanilang assistance.
Dagdag pa ng heneral, partikular na tututukan ng mobile outpost ang mga terminal, transportation hubs, at iba pang mga pampublikong lugar.
Mahigit P3-bilyong na ang halaga ng pinsala ng bagyong Karding sa sektor ng agrikultura sa Nueva Ecija.
Sa pagtaya ng Provincial Disaster Risk Reduction and Management Council (PDRRMC), pinakamatinding naapektuhan ang ekta-ektaryang palayan sa lalawigan.
Damay din ang mga maisan, high-value crops, kabilang ang mga gulayan.
Samantala, bagaman unti-unti namang bumabalik ang mga negosyo limang araw matapos manalasa ang bagyo, wala pa ring kuryente sa districts 3 at 4.
Alinsunod sa rekomendasyon ng PDRRMC kay Governor Aurelio “Oyie” Umali, wala pa ring klase ngayong araw sa lahat ng antas sa mga nasabing distrito dahil hindi pa naibabalik ang power supply.
Ang District 3 ay binubuo ng Cabanatuan City, mga bayan ng Bongabon, Gabaldon, General Mamerto Natividad, Laur, Palayan at Santa Rosa.
Binubuo naman ang district 4 ng Gapan City, mga bayan ng Cabiao, General Tinio, Jaen, Peñaranda, San Antonio, San Isidro at San Leonardo.
Posible muling tumaas ang singil ng Meralco sa residential customers sa susunod na buwan dahil sa pagmahal ng mga panggatong na coal at krudo.
Sa gitna ito ng inaasahang desisyon ng Energy Regulatory Commission (ERC) ngayong linggo o sa mismong Oktubre a – kwatro, sa hirit na rate hike ng San Miguel Corporation at Meralco.
Dagdag 30 centavos per kilowatt hour ang hirit ng mga power plant na pag-aari ng San Miguel sa loob ng kalahating taon upang mabawi ang lugi bunsod ng pagsipa ng presyo ng coal.
Tiniyak naman ni ERC Commissioner Floresinda Baldo- Digal na ilalabas nila anumang araw mula ngayon ang kanilang tugon sa hiling na power rate hike.
Una nang ibinabala ng SMC Global Power Holdings Corporation (SMCGP) na maaari nitong i-terminate ang dalawang Power Supply Agreements (PSA) sa Meralco sa Martes, Oktubre a – kwatro kung hindi magpapasya ang ERC.
Magugunitang naghain ang SMCGP at Meralco ng power rate hike matapos lumobo sa P15 billion ang kanilang lugi dahil sa mataas na presyo ng oil products at mahigpit na supply ng natural gas.
Samantala, inihayag ni Meralco Vice President at Utility Economics Head Lawrence Fernandez na ang pagpapanatili sa kanilang PSA sa SMC ang pinaka-mainam na opsyon para sa mga consumer.
Idinagdag pa ni Fernandez na apat hanggang limang generation para sa emergency purchase ng kuryente ang kanilang kinontrata, na may average na P7 hanggang P8 per kilowatt hour para sa isang taong supply simula Oktubre.
Tumaas na rin o halos na-doble na ang singil sa kuryente sa ilang probinsya.
Ngayong buwan lamang, halos P21 na ang dagdag-singil sa kada kilowatt hour ng mga electric cooperative na Mopreco sa Cordillera Administrative Region at Bileco sa Eastern Visayas.
Halos P20 naman sa Samelco 2; Soleco at Dorelco na nasa Eastern Visayas na pawang pinaka-mahal na sa mga kooperatiba.
Aminado naman ang samahan ng mga Electric Cooperative na Philippine Rural Electric Cooperatives Association Incorporated (Philreca) na hindi nila kontrolado ang mga nasabing rate.
Ayon kay Philreca Executive Director Janeene Colingan na ipinasa sa kanila ng mga power generation company ang mga nasabing rate.
Inamin din ni Emmanuel Jueza, administrator ng National Electrification Administration na walang magagawa sa ngayon kundi magtipid sa paggamit ng kuryente.
Samantala, naghahanda na si Energy Regulatory Commission Chairperson Monalisa Dimalanta ng action plan kasama ang Department of Energy at iba pang mga ahensya upang masolusyonan ang pagsirit ng singil sa kuryente.
Namemeligrong tumaas ang presyo ng imported na karneng baboy simula sa Enero ng susunod na taon.
Ito ang ibinabala ng grupo ng mga importer ng karne na Meat Importers And Traders Association (MITA) dahil mapapaso na sa disyembre ang Executive Order 134 ni dating Pangulong Rodrigo Duterte.
Ipinatupad ang naturang kautusan noong 2021 upang mapababa ang taripa sa imported na karne at dahil dito ay naging 5 hanggang 15% lang ang taripa mula sa 30 hanggang 40%.
Ayon kay MITA President Emeritus Jesus Cham, tataas nang 15% ang presyo ng imported na karne ng baboy o katumbas ng hanggang P30 na dagdag kung mapapaso ang E.O. 134.
Umaapela naman sina Cham kay Pangulong Bongbong Marcos, na kalihim ng Department of Agriculture, na palawigin ang paniningil ng mas mababang taripa bilang tugon sa patuloy na pagtaas ng presyo ng bilihin.
Tutol naman sa naturang hakbang ang Pork Producers Federation of the Philippines o pro-pork at nanawagan kay Pangulong Marcos na pakinggan sila sa pagkakataong ito.
Iginiit ni Pro-Pork Vice President Nicanor Briones na kung hindi mahabol ng local hog raisers ang mababang presyo ng imported na karne, mapipilitan ang ilan na tumigil sa pagbababoy at maaapektuhan ang supply sa bansa.
Ipinunto ni Briones na mas dapat tulungan ang mga local hog raiser sa halip na tangkilikin ang mga imported na karne.
Aabot sa $4 billion ang investment ang iniuwi ni Pangulong Bongbong Marcos sa anim na araw nitong pagbisita sa New York, U.S.A. para sa 77th United Nations General Assembly.
Ayon sa palasyo, karamihan sa mga pangakong investments ay mula sa information technology, business process management, data centers at manufacturing na maaaring makalikha ng isandaan labindalawang libong trabaho.
Nilinaw naman ng malakanyang na ang naturang halaga ay hindi otomatikong sasalamin ng future investment.
Bagaman maraming kompanya ang interesadong maglagak ng puhunan sa bansa, kailangan pa ring maselyuhan ang mga investment pledges.
Bukod sa U.N. general assembly, dumalo rin si Pangulong Marcos sa isang economic briefing at nanghikayat ng mga negosyanteng mamuhunan sa Pilipinas.