NATIONAL NEWS

Karagdagang 2,536 covid-19 cases ang naitala kahapon kaya’t sumampa na sa 3,945,566 ang kabuuang kaso sa bansa.

Naitala ng DOH ang bagong daily tally, dalawang araw matapos sumadsad sa below 2,000 ang mga bagong kaso.

Bahagya ring umakyat sa 28,172 ang aktibong kaso kahapon kumpara sa 27,553 noong Miyerkules.

Tumaas din sa 3,854,478 ang recoveries habang sumampa na sa 62,916 ang death toll.

Nangunguna pa rin ang National Capital Region sa mga rehiyong may pinaka-maraming kaso sa nakalipas na dalawang linggo, 13,962; na sinundan ng Calabarzon, 5,307; Central Luzon, 2,794; Davao Region, 1,323 at Western Visayas, 808.

Muling pinaalalahanan ng Department of Health ang publiko na sumunod sa health protocols upang maiwasan ang pagkalat ng covid-19 lalo ngayong malapit na ang pasko kung saan maraming mga pagtitipon at selebrasyon.

Ayon kay Department of Health officer-in-charge Maria Rosario Vergeire, dapat ugaliing magsuot ang face mask sa mga crowded area at isipin na ang virus ay lagi nating kasamang namumuhay.

Umaasa naman si Vergeire na magpapatupad ang mga kumpanya ng mga polisiya, gaya ng pagpapahintulot sa mga bakunado lamang na dumalo sa pagdiriwang, lalo sa loob ng establisyimento.

Samantala, umapela rin ang DOH sa publiko na magdoble-ingat at tandaan ang safety protocols upang hindi na dumami pa ang magkakasakit sa holiday season.

Aabot sa 92% na mga senior citizen sa Camarines Sur, ang bakunado na laban sa covid-19.

Batay sa datos ng Department of Health (DOH-Bicol), 122,000 sa 137,000 na senior citizen ang nakatanggap ng covid-19 vaccine bago ang pagtatapos ng unang isandaang araw ng pinaslakas program ng pamahalaan.

Ayon sa kagawaran, magpapatuloy ang kanilang kampanya kahit maraming agam-agam ang publiko pagdating sa pagpapabakuna.

Layunin nitong wakasan na ang pagod ng mga healthcare workers bunsod ng covid-19 pandemic.

Nanawagan kay Pangulong Ferdinand “Bongbong” Marcos Jr. ang Meat Importers and Traders Association (MITA) na bawasan ang taripa sa pag-import ng karneng baboy sa susunod na limang taon.

Ayon sa MITA, magandang solusyon ito para makontrol ang patuloy na pagtaas ng inflation rate habang pinalalakas ang local agricultural products upang makamit ang food security ng bansa.

Umapela ang grupo sa pangulo na maglabas ng bagong executive order o eo at ibalik ang 5% na “import duty rates” sa mga baboy at 15% out quota sa loob ng limang taon.

Samantala, tiniyak naman sa publiko ng Department of Agriculture (DA) na sapat ang suplay ng baboy at karne ng manok sa bansa ngayong holiday season.

Ayon kay Agriculture Undersecretary Domingo Panganiban, inaasahan ng ahensya na tataas pa ang produksyon ng baboy bago matapos ang taon kahit pa may mga napaulat na african wine fever sa ibang mga lalawigan sa bansa.

Patuloy na nagsasagawa ng clearing operations ang Philippine National Police (PNP) sa mga lugar na pinadapa ng bagyong Karding.

Sa pahayag ni PNP Officer-In-Charge Pol. Lt. Gen. Jose Chiquito Malayo, nakatutok ang kanilang ahensya sa pagtulong sa mga lugar na sinalanta kung saan, inasistehan narin nila ang pamamahagi ng relief goods sa mga pamilyang apektado ng nagdaang bagyo.

Ayon kay Malayo, nakahanda ang kanilang assets na kinabibilangan ng transportation at communication equipment para sa nagpapatuloy na relief and clearing operations.

Matatandaang una nang nagdeploy ang PNP ng mahigit isang libo’t limandaang personnel para umagapay sa search, rescue and retrieval operations sa National Capital Region (NCR), Cagayan Valley, Central Luzon, Calabarzon at Bicol Regions na naapektuhan ng typhoon Karding.