NATIONAL NEWS

Sinimulan na ng National Printing Office (NPO) sa Quezon City ang pag-imprenta ng balota at iba pang forms, para sa 2022 Barangay at Sangguniang Kabataan Elections (BSKE).

Ito ay kahit naaprubahan na ang panukalang ipagpaliban ang bske at isinusulong na I-usog sa taong 2023.

Nanguna sa unang araw ng pag-imprenta ang mga opisyal ng NPO at Commission on Elections (COMELEC) sa pangunguna ng kanilang chairman na si George Garcia at Commissioner Rey Bulay.

Sa ngayon, inaasahang aabot sa 91 – M balota ang ipapalabas sa eleksyon kung saan bawat balota ay naglalaman ng pataas na serial number bilang dagdag sa security feature.

Nakalabas na ng bansa ang bagyong Luis na lalo pang lumakas at isa ng ganap na Severe Tropical Storm.

As of 11am kanina, huling namataan ang bagyo sa layong 1,130 kilometers Silangan Hilagang-Silangan ng Extreme Northern Luzon.

Taglay na nito ang lakas ng hanging aabot sa 100 kilometers per hour malapit sa gitna at pagbugsong aabot sa 125 km/h na kumikilos pahilaga sa bilis na 20 km/h.

Kaninang alas-9 ng umaga lumabas sa Philippine Area of Responsibility (PAR) ang bagyo na inaasahang tutungo sa karagatan sa silangan ng Ryukyu islands.

Sa ngayon, bagaman wala ng epekto sa ating bansa ang Bagyong Luis, low pressure area naman ang magdadala ng pag-ulan sa Eastern Visayas, Caraga, at Bohol.

Uulanin din ang metro manila at nalalabing bahagi ng bansa pero dahil ito sa localized thunderstorm.

Patay ang isang high school teacher sa Abra matapos pagbabarilin ng hindi nakikilalang lalaki.

Kinilala ng bangued municipal police station ang biktima na si Rudy Steward Dugmam Sayen o ‘Estee Saway’, 38 anyos at miyembro ng LGBTQ community.

Nagtuturo si Sayen sa suyo national high school sa Pidigan, Abra.

Sa imbestigasyon ng mga otoridad, sakay ng motor si Sayen mag-8 ng umaga patungong trabaho nang sundan ito ng isang rider.

Pinagbabaril ng lalaki ang biktima nang nasa tapat na sila ng isang carwash.

Nagtamo ng maraming tama sa bala sa katawan si sayen na agad isinugod sa abra provincial hospital pero idineklara nang dead-on-arrival.

Patuloy namang hinahanap ngayon ng pulisya ang salarin.

Target ng lokal na pamahalaan ng Zambales na bakunahan kontra COVID-19 ang 13 ,500 nilang residente sa loob ng 5 araw.

Ayon Dr. Noel Bueno, Provincial Health Director, mangunguna sa bakunahan ang kanilang Municipal Health Offices sa 13 bayan ng Zambales.

Magtuturok ang mga ito ng ikalawang dose ng bakuna at booster shot para sa mga kwalipikadong indibidwal. Sa huling datos ng Zambales, pumalo na sa 407,753 residente ang nabakunahan na 62.77 %ng kanilang populasyon.

Pumalo na sa P 1.2 -B ang pinsalang iniwan ng bagyong Karding sa sektor ng agrikultura at imprastruktura ng Bulacan.

Ayon kay Daniel Fernando, gobernador ng bulacan, ang distritong pinaka-naapektuhan ng bagyo ay ang Doña Remedios Trinidad, San Ildefonso, San Miguel, at San Rafael.

Kasama sa datos ang P 10-M na nawala sa livestock ng lalawigan, maging ang P 400 -M Nasirang pananim na nakaapekto sa 3,000 pamilya.

Samantala, inamin pa ni Fernardo na hindi pa sila nagdedeklara ng state of calamity dahil kailangan pang malaman ang kabuuang damage na idinulot ng bagyo sa Bulacan.

Sa ngayon, humihingi na ng suporta sa gobyerno ang Bulacan dahil kapos na ang kanilang budget para sa taong ito.

Pumalo na sa P 2.02 -B ang pinsalang idinulot ng bagyong Karding sa sektor ng agrikultura ng bansa.

Batay sa pinakahuling datos ng Department of Agriculture (DA) hanggang kaninang alas-8 ng umaga, mas mataas ang tala sa P 1.97 -B na naitala noong miyerkules ng umaga.

Nadagdag sa datos ang karagdagang ulat na naapektuhang pananim ng palay, alagang hayop at mga isda sa Cordillera Administrative Region, Ilocos Region, Central Luzon, Bicol Region at Western Visayas.

Sinabi pa ng DA na umabot na ngayon sa 91, 944 magsasaka at mangingisda ang naapektuhan ng bagyo.

Samantala, sa hiwalay na datos ng Disaster Risk Reduction and Management Operations Center ng DA, pumalo sa 150, 693 ektarya ng pananim ang nasira sa CAR, Ilocos Region, Cagayan Valley, Central Luzon, CALABARZON, Bicol Region at Western Visayas na may kabuuang production loss na 117, 663 metriko tonelada.

Tinitingnan ng Department of Education (DepEd)ang pagpapatuloy ng mandatory Reserved Officers Training Corps (ROTC) sa tertiary level.

Ito ay habang ang pangunahing edukasyon ay itutuon sa pagpapaigting ng curriculum, lalo na sa mga lugar na magsusulong ng pagmamahal sa bansa at disiplina sa mga mag-aaral.

Ayon kay Vice President at Education Secretary Sara Duterte na nagkaroon sila ng inisyal na pagpupulong kasama ang Commission on Higher Education o CHED, ilang congressman at senator kaugnay sa mandatoryong implementasyon ng ROTC.

Naging malinaw aniya sa lahat na mas maganda kung ibabalik ang ROTC sa higher education dahil noon paman ito kabilang dito.

Samantala, kinumpirma ni CHED Chairperson Prospero De Vera III ang pag-uusap na ito sa pagitan ng DepEd at miyembro ng senado at house of representatives.

Halos isa punto walong bilyong pisong halaga ng marijuana ang nasabat ng mga awtoridad sa isang magsasaka sa lalawigan ng kalinga.

Kinilala ang suspek na si Rolando Yagao alyas Rain, 32-anyos at residente ng bayan ng tinglayan.

Ayon kay Regional Director Gil Cesar Castro ng Philippine Drug Enforcement Agency-Cordillera Administrative Region, nakumpiska kay Yagao ang 8 dried marijuana leaves brick na may bigat na 8 kilo, 8 piraso ng tubular marijuana leaves na may bigat na 7 kilo kabilang ang perang ginamit sa operasyon at isang cellphone.

Nahaharap naman ang suspek sa kasong paglabag sa Republic Act 9165 o Comprehensive Dangerous Drugs Act Of 2002.

Nagsagawa ng ilang aktibidad na may kaugnayan sa edukasyon si Vice President at Education Secretary Sara Duterte sa kaniyang pagbisita sa Japan noong September 26 hanggang 27 bilang special envoy ng Pilipinas sa state funeral ni Dating Prime Minister Shinzo Abe.

Ayon sa Office of the Vice President (OVP) nagpunta si Duterte sa isang elementary school sa Japan at nakipagkita sa mga opisyal ng ministry of education, culture, sports at science and technology.

Pinag-usapan ng mga ito ang blended learning, values and skill formation, stem education at COVID-response.
Kasama ng bise-presidente sa mga aktibidad nito sa Japan ang isang Grade 9 student na si Trix at ang nanay nitong si Jen na mula sa Dinalupihan, Bataan.

Inimbitahan si Jen sa two-day trip bilang bahagi ng “You can be VP” na proyekto ng OVP para makapagbigay inspirasyon sa mga mag-aaral na abutin ang mga pangarap nito.

Bukod dito, nakipagkita rin si Duterte sa ilang miyembro ng filipino community.
Samantala, nakabalik na ang bise-presidentte sa bansa kahapon.

Mahigpit na binabantayan ng Department of Health (DOH) ang ilang mga ospital sa Metro Manila.

Ayon kay Health Officer-in-Charge Maria Rosario Vergeire, ito ay dahil sa nakikitang pagtaas ng bilang ng mga pasyenteng na-oospital dahil sa COVID-19.

Bagaman mababa sa 50 % ang hospitalization rate sa bansa ay patuloy pa ring mino-monitor ng kagawaran ang mga naturang lugar.

Nabatid na nasa moderate risk classification ang COVID-19 sa Metro Manila dahil sa pagtaas ng naturang mga kaso.