NATIONAL NEWS

Aabot sa P675- M ang kakailanganin upang umusad ang restoration projects sa mga nasirang cultural properties ng magnitude 7 na lindol sa Luzon noong Hulyo ng taong ito.

Ayon kay National Commission for Culture and the Arts (NCCA) Chairperson Rene Escalante, 24 heritage structures sa Abra, Ilocos sur at ilocos norte ang kailangang sumailalim sa restoration procedures.

Hahatiin aniya sa loob ng dalawang taon ang pondo kung saan 405 million pesos ang gagamitin sa susunod na taon habang 270 million pesos para sa 2024.

Ilan naman sa mga posibleng pagkunan ng pondo para sa nasabing restoration projects ang Office of the President, PAGCOR, Tourism Infrastructure and Enterprise Zone (TIEZA) at National Disaster Risk Reduction and Management Council (NDRRMC)

Isang sunog ang sumiklab sa isang tindahan ng medical supplies sa Sta. Cruz, Maynila.

Nagsimula ang insidente alas-10 kagabi na umabot sa ikalawang alarma, at pasado alas -12 ng madaling araw nang ideklarang fire out ng Manila Bureau of Fire Protection ang sunog.

Ayon sa BFP, tinatayang aabot sa P 11 – M ang halaga ng pinsala ng sunog.

Inaalam pa ng mga otoridad ang sanhi ng sunog na sinasabing nag-umpisa sa ikalawang palapag ng naturang gusali.

Umabot na sa kabuuang P 29.6 M na halaga ng tulong ang naipamahagi ng Department of Social Welfare and Development sa mga biktima ng bagyong Karding.

Sinabi ni DSWD Spokesperson Rommel Lopez na karamihan sa mga naapektuhan ng bagyo ay mula sa Ilocos, Cagayan, Central Luzon, CALABARZON, Bicol, at Cordillera.

Nahirapan aniya ang mga dswd personnel na maabot ang Polillo Island at General Nakar sa Quezon ngunit nagawan naman aniya ito ng paraan.

Sinabi pa ni Lopez na nakikipagtulungan na ang kanilang ahensya sa iba pang government agencies gaya ng armed forces of the philippines upang makapaghatid ng relief goods sa mga biktima ng bagyong Karding.

100 % nang naibalik ng MERALCO Manila Electric Company ang supply ng kuryente sa mga lugar na sini serbisyuhan nito na naapektuhan ng bagyong Karding.

Ipinabatid ito ni MERALCO Spokesperon Claire Feliciano bilang pagtupad na rin sa pangako nilang kaagad ibabalik ang normal na supply ng kuryente sa kanilang franchise areas.

Gayunman, sinabi ni feliciano na may ilang metro ng kanilang linya ang nananatiling lubog sa baha kayat kailangan na itong palitan.

Mahigpit na rin ang ginagawang pagbusisi ng linemen ng MERALCO sa electrical wiring lalo na sa malalayong bahagi ng kanilang franchise areas.

Inilagay ng Department of Health sa Moderate Risk Classification ang Metro Manila matapos makapagtala ng pagtaas sa COVID-19 cases sa nakalipas na 2 linggo.

Ayon kay DOH Officer in charge Undersecretary Maria Rosario Vergeire, umabot sa 2,334 ang average na bilang ng infections kada araw mula September 22 hanggang 28 sa rehiyon, na mas mataas ng 2 % sa nakalipas na linggo at mas mataas naman ng 7 % sa nakaraang 2 linggo.

Sinabi pa ng opisyal na mas mababa sa 50 % ang hospitalization rates sa lahat ng lugar sa bansa, ngunit nakitaan ng pagtaas ang ilang lugar sa Metro Manila.

Sinabi pa ni Vergeire na kasalukuyang nasa ”minimum level” ang severe at critical admissions sa bansa.

Tiniyak rin ng opisyal na patuloy nilang binabantayan ang hospital admissions sa gitna ng muling pagsirit ng COVID-19 infections.

Sumampa na sa 11 ang bilang ng mga nasawi sa pananalasa ng bagyong Karding.

Sa datos mula sa National Disaster Risk Reduction and Management Council (NDRRMC), 8 pa lamang sa nasabing bilang ang nabeberipika sa ngayon.

Ayon sa NDRRMC, hindi pa nakukumpirma ang isang nasawi sa Zambales, 1 sa Antipolo, Rizal at 1 sa Tanay, Rizal.

5 namang mangingisda ang napaulat na nawawala sa Mercedes, Camarines Norte at 1 indibidwal mula sa Antipolo, Rizal.

Nasa 640,963 indibidwal o 176,337 pamilya ang naapektuhan ng bagyo sa 1,372 barangays sa Ilocos, Cagayan, Central Luzon, CALABARZON, MIMAROPA, Bicol, at Cordillera.

Tumaas ang presyo ng ilang gulay mula sa mga lugar na binayo ng bagyong Karding partikular sa Nueva Ecija gayundin sa Baguio City.

Ayon sa nagtitinda , bukod sa mahal na ang ibang gulay tulad ng sitaw na nasa P 150 na mula sa P 70 kada bungkos , ay maliliit at hindi pa maganda ang kalidad.

Nasa P 75 naman ang kada kilo ng talong , P 80 ang kilo ng ampalaya, P 60 ang kilo ng okra at P 140 ang kada kilo ng siling panigang.

Mahigit doble naman sa ngayon na nasa P 380 mula sa dating P 150 ang kilo ng siling labuyo, P 130 ang kamatis, P 100 ang kilo ng liya at P 50 ang kilo ng kalamansi.

Ilang vendors naman ang kumukuha ng gulay sa mga lugar na hindi masyadong binayo ng bagyong Karding tulad ng Batangas.

Ang carrots kada kilo ay P 130 at P 65 ang patatas at bumaba ang presyo ng bell pepper sa P 200 kada kilo mula sa P 240 at P10 naman ang nabawas sa presyo ng kada kilo ng repolyo na ngayo’y nasa P 65 na lamang.

Samantala ..Sampung piso naman ang itinaas sa presyo ng kada kilo ng karneng baboy kung saan ang pork chop at kasim ay nasa 260 kada kilo, liempo ay 290 pesos, butro buto ay 210 pesos at 200 pesos naman ang kada kilo ng para.

Sa karneng manok naman , bumaba sa P 160 ang kilo mula sa P 170.

Pinaaga ng korte suprema ang pagsasagawa ng oral argument hinggil sa NCAP o No Contact Apprehension Policy.

Sa halip na sa January 24, 2023. Muling itinakda ng high tribunal sa December 6 ang oral argument sa NCAP issue na isasalang naman sa preliminary conference sa November 4.

Inatasan din ng korte suprema ang mmda na magsumite ng kopya ng petitions at maghain ng kanilang komento sa loob ng sampung araw matapos nilang matanggap ang notice hinggil dito.

Muling makakapag biyahe pa Taiwan ng VISA free ang mga Pilipino simula ngayong araw na ito.

Ayon ito sa Bureau of Consular Affairs (BOCA) ng Taiwan kung saan sa ilalim ng naturang scheme na tatagal hanggang July 31, 2023, ay u ubrang manatili sa Taiwan ang mga Pilipino hanggang 14 na araw. Maliban sa mga may hawak ng diplomatic o official/service passports.

Ipinabatid pa ng BOCA na sakop ng visa free privilege ang mga aktibidad na walang permit tulad nang pagbisita sa mga kaanak, pagdalo sa social events, tourism, fact finding missions at international exchanges.

Una nang isinama ng taiwan sa VISA free policy nito ang mga Pilipino sa loob ng 9 na buwang trial period o mula November 2017 hanggang July 2018.