NATIONAL NEWS

Naniniwala ang ilang ekonomista na maaaring makabawas sa epekto ng mga kalamidad sa bansa ang maayos na pamamahala.

Sa isang commentary ng New York-based think tank na Global Source Partners, iginiit ng mga Pilipinong ekonomistang sina Diwa Guinigundo at Wilhelmina Mañalac na ang mahinang pagtugon ng bansa sa mga natural hazards ay dulot ng mahihinang institusyon at korapsyon sa mga public works.

Ayon sa kanila, malinaw na pinapatay ng korapsyon ang pag-unlad ng bansa, pinahihina ang katatagan ng mamamayan, at sinisira maging ang tiwala ng publiko.

Dagdag pa nila, para sa isang developing country tulad ng Pilipinas, hindi isang moral luxury ang good governance, kundi isang economic necessity.

Giit pa ng mga ekonomista, bagama’t imposibleng mabago ang katayuan ng Pilipinas bilang isa sa mga pinakabantaing bansa sa kalamidad, maaari pa ring mabago kung paano maghanda at mamuno ang pamahalaan sa harap ng mga sakuna.

Iimbestigahan ng Office of the Ombudsman ang sinasabing tatlong taong pagkaantala sa pagbabasura ng 2016 dismissal order laban kay Senator Joel Villanueva.

Kaugnay ito ng pagkakasangkot ng senador sa Priority Development Assistance Fund (PDAF) scam noong siya pa ang representative ng CIBAC Party-list.

Ayon kay Assistant Ombudsman Mico Clavano, sisiyasatin ng kanilang tanggapan ang naging proseso ng kaso, lalo’t 2016 pa nang magsumite ng motion for reconsideration si Villanueva, ngunit 2019 lamang ito tuluyang ibinasura ni dating Ombudsman Samuel Martires.

Matatandaang si dating Ombudsman Conchita Carpio-Morales ang naglabas ng orihinal na dismissal order laban sa senador matapos itong madawit sa nasabing isyu.

Nilinaw ni Assistant Ombudsman Mico Clavano na hindi paghihiganti ang panawagan ni Ombudsman Jesus Crispin Remulla na magbitiw sa serbisyo ang mga sinasabing “last-minute hires” ni dating Ombudsman Samuel Martires.

Ayon kay Atty. Clavano, hindi layunin ng naturang panawagan na gipitin o insultuhin ang mga na-promote, kundi nais lamang nilang masiguro na tapat ang mga ito sa mismong opisina ng Ombudsman, at hindi sa iisang tao o personalidad lamang.

Ibinunyag din ni Clavano na mayroon nang ilan na nagsumite ng kanilang courtesy resignation, ngunit nababalitaan din nila na may ilang kawani ang nangangalap ng suporta upang hindi na magsumite nito.

Giit pa ng abogado, wala dapat ipangamba ang mga tauhan ng Ombudsman lalo na kung wala silang itinatago sa naging proseso ng kanilang appointment o promotion sa kani-kanilang posisyon.

Hinamón ng Makabayan bloc ang pamahalaan na ibasura ang 12 percent value-added tax na ipinapataw sa mga pangunahing bilihin at serbisyo.

Ayon kay Gabriela Women’s Partylist Rep. Sarah Elago, matagal nang panawagan na magkaroon ng tax relief upang makatulong sa mga ordinaryong Pilipino, pero hanggang sa ngayon ay hindi pa rin ito inaaksyunan.

Aniya, patuloy na naaapektuhan ang mga Pilipino ng pagtaas ng presyo ng mga bilihin na lalo pang pinapalala ng VAT.

Ginawa ang pahayag matapos ang panukala ng Department of Finance o DOF na itaas ang tax exemption ceiling para sa mga manggagawa sa pampubliko at pribadong sektor.

Para naman kay ACT Teachers Partylist Rep. Antonio Tinio, mas magiging makabuluhan ang tulong sa mga manggagawa kung tatanggalin ang excise tax sa langis at VAT upang maibsan ang bigat ng gastusin ng mamamayan.

Iginiit ni Tinio na hindi lamang mataas na buwis ang nagpapahirap sa mga manggagawa, kundi pati na rin ang mga isyu ng katiwalian sa gobyerno, partikular ang palpak at maanomalyang flood control projects na nagpapabigat sa kalagayan ng mga ordinaryong Pilipino. —ulat mula kay Geli Mendez (Patrol 30)

Kinumpirma mismo ng Office of the Ombudsman na hindi na maaaring maging state witness ang mag-asawang kontraktor na sina Sara at Curlee Discaya matapos itong hindi makipagtulungan sa imbestigasyon kaugnay ng flood control scam.

Ayon kay Assistant Ombudsman Mico Clavano, itinuturing na “hostile witnesses” ang mag-asawang kontraktor at maaari silang masampahan ng kasong malversation of public funds, falsification of public documents, at iba pang kaukulang paglabag.

Sinabi pa ni Atty. Clavano na ang proteksiyong ibinigay sa kanila ay kaugnay lamang ng aplikasyon bilang state witness, ngunit dahil sa kanilang desisyon na hindi makipagtulungan ay otomatikong inalis ang naturang proteksiyon.

Dagdag pa ng Ombudsman, malinaw ang ebidensya sa ghost projects sa Bulacan, pero mas malalim na imbestigasyon pa ang isinasagawa ng tanggapan upang patunayan ang sinasabing korapsyon na nagsisimula umano sa loob ng Kongreso, partikular sa Appropriations Committee.

Tiniyak naman ng Ombudsman na handa ang kanilang tanggapan na ituloy ang kaso laban sa mga sangkot at papanagutin ang lahat ng responsable sa anomalya.

Iginiit ni dating Sandiganbayan Associate Justice Alex Quiroz na dapat maging maingat at mabusisi ang mga imbestigasyon hinggil sa isyu ng flood control projects.

Ayon kay Justice Quiroz, bagaman nauunawaan ang panawagan ng publiko na agarang mapanagot ang mga posibleng sangkot sa korapsyon, mahalagang masiguro muna na matibay, legally obtained, at airtight ang ebidensyang isasampa sa korte upang hindi masayang ang panahon at pondo ng gobyerno.

Binigyang-diin din ng dating mahistrado na ang hustisya ay hindi dapat naisasakripisyo sa ngalan ng mabilis na aksyon.

Kaugnay nito, nanawagan si Justice Quiroz sa publiko na manatiling kalmado at habaan ang pang-unawa habang hinihintay ang resulta ng mga nasabing imbestigasyon.

Ibinunyag ni Senate Committee on Agriculture, Food and Agrarian Reform Chairman Francis “Kiko” Pangilinan na patuloy pa rin ang talamak na smuggling at iba pang anomalya na nangyayari sa agriculture sector.

Ayon kay Senador Pangilinan, karamihan sa mga nasa likod ng mga nasabing anomalya ay mula sa China, na may kasabwat umano sa Bureau of Customs at iba pang kaukulang ahensya.

Kabilang anya sa mga ginagawang pandaraya ng mga ito ay ang paggamit ng mga dummy corporations at pagmamanipula sa mga phytosanitary clearance.

Kaugnay nito, umasa naman si Senador Pangilinan na sa pamumuno ng bagong Customs Commissioner at sa pagpapatibay ng Anti-Agricultural Economic Sabotage Council ay maaayos ang sistema at matutukoy ang mga sindikatong nasa likod ng mga anomalya.

Iginiit ni Kamanggagawa Party-list Representative Eli San Fernando na matagal nang napatunayang mali ang paniniwalang nagiging dahilan ng pagtaas ng presyo ng mga bilihin ang umento sa sahod.

Ayon kay Cong. San Fernando, hindi na dapat ituring na inflationary ang pagtaas ng sweldo sapagkat walang legislated wage increase mula pa noong 1989, ngunit patuloy pa rin namang tumataas ang mga presyo.

Aniya, maraming salik ang dapat isinaaalang-alang sa paggalaw ng presyo ng mga bilihin at hindi ito naka-depende lamang sa sahod ng manggagawa.

Bukod pa rito, nanawagan din ang kongresista sa pamahalaan na suportahan ang tuluyang pagwawakas ng kontraktwalisasyon sa bansa upang mapabuti ang pamumuhay ng mga pamilyang Pilipino.