NATIONAL NEWS

Muling itinanggi ni Senador Joel Villanueva ang kanyang pagkakadawit sa mga maanomalyang flood control projects.

Ito’y matapos irekomenda ng Independent Commission for Infrastructure ang pagsasampa ng kasong administratibo at kriminal sa kanya, kina Senador Jinggoy Estrada at dating Ako Bicol Party-list Rep. Zaldy Co, at sa iba pang dawit sa nasabing kaso.

Naniniwala si Sen. Villanueva na mapapatunayan ng mga records ng Senado at mga witness testimony na siya ay inosente sa lahat ng mga ibinibintang sa kanya.

Dagdag pa ng senador, hinihintay pa rin niya ang kopya ng referral ng I.C.I. sa Office of the Ombudsman.

Maliban sa paghahanda para sa Undas, tinututukan din ng National Capital Region Police Office ang mga posibleng pagsasagawa ng kilos-protesta sa Nobyembre a-primero.

Ayon kay Philippine National Police N.C.R.P.O. Spokesperson Major Hazel Asilo, ilang grupo ang maaaring maglunsad ng mga demonstrasyon kasabay ng paggunita ng Undas.

Sa ngayon, inilalatag na ng pulisya ang mga paghahanda para sa mga ipatutupad na crowd management.

Aabot anya sa animnaraang P.N.P. personnel ang ide-deploy mula sa kanilang Reactionary Standby Support Force.

Kahit pa walang namo-monitor na anumang banta, magpapatuloy pa rin ang pakikipag-ugnayan ng P.N.P. sa iba’t ibang ahensya para matiyak ang kaayusan sakaling maglunsad ng kilos-protesta kontra katiwalian sa pamahalaan ang iba’t ibang grupo. —Sa panulat ni Anjo Riñon

Inilabas na ng Malacañang ang batas na nagbabawal at nagdedeklara sa Philippine Offshore Gaming Operations bilang ilegal, kasama ang iba pang mga katulad na aktibidad sa bansa.

Sa ilalim ng Republic Act No. 12312 o mas kilala bilang “Anti-Pogo Act of 2025,” na nilagdaan ni Pangulong Ferdinand Marcos Junior noong Oktubre bente-tres, mahigpit nang ipinagbabawal ang pagtatayo, operasyon, at pagsasagawa ng offshore gaming sa buong bansa.

Kasama rin sa ipinagbabawal ng nasabing batas ang pagtanggap ng anumang uri ng pusta o transaksyon na may kinalaman sa Pogo, maging ito man ay direkta o hindi direktang konektado sa naturang gawain.

Binigyang-diin sa batas na kinikilala ng estado ang kahalagahan ng pagpapanatili ng kapayapaan at kaayusan, proteksyon sa buhay, kalayaan, at ari-arian, gayundin ang pagtataguyod ng kapakanan ng mamamayan para sa makabuluhang pag-enjoy ng demokrasya.

Pinahahalagahan din ng estado ang dignidad ng bawat tao at ginagarantiyahan ang paggalang sa karapatang pantao—kaya’t idineklara nitong labag sa batas ang operasyon ng Pogo sa bansa.

Matatandaan na sa kanyang State of the Nation Address, inihayag ni Pangulong Marcos ang kanyang direktiba na ipatigil ang lahat ng Pogo operations sa Pilipinas, matapos matukoy na nagdudulot ito ng negatibong epekto sa moral at dignidad ng mga Pilipino, kabilang ang pagkakalulong sa sugal, pagkabaon sa utang, at pagtaas ng mga krimeng kaugnay nito sa lipunan. —Sa panulat ni Anjo Riñon

Sisimulan na ng Department of Agriculture ang pagpapangasiwa sa paggawa ng mga farm-to-market roads simula sa susunod na taon.

Ito ang ikinumpirma ni Agriculture Secretary Francisco Tiu Laurel Junior matapos malaman ng kanyang kagawaran na may mga anomalya silang napansin sa paggawa ng mga F.M.R. projects.

Ayon sa D.A., ang kanilang desisyon na direktang pangasiwaan ang pagpapatayo ng mga farm-to-market roads ay isang paraan upang tiyaking direktang masusuportahan ang mga magsasaka sa nasabing proseso.

Nakipagpulong din si Sec. Laurel kay Public Works Secretary Vince Dizon upang pag-usapan ang mga napansin nilang mga anomalya at kung paano isasalin ng D.P.W.H. sa D.A. ang pangangasiwa sa mga farm-to-market roads. —Sa panulat ni Anjo Riñon

Aprubado na ni Pangulong Ferdinand Marcos Jr. ang Tatak Pinoy Strategy, isang komprehensibong plano ng Pilipinas na layong palakasin ang mga lokal na industriya, itaas ang produksyon, at paunlarin ang kakayahan ng mga produktong Pilipino sa pandaigdigang merkado.

Batay sa Memorandum Circular Number 104, inaatasan ng Pangulo ang lahat ng ahensya ng pamahalaan, government-owned and -controlled corporations, at mga LGU na suportahan ang pagpapatupad ng nasabing estratehiya na binuo ng Tatak Pinoy Council sa pangunguna ng Department of Trade and Industry.

Ang T.P.S. ay alinsunod sa Republic Act Number 11981 o ang Tatak Pinoy (Proudly Filipino) Act, na naglalayong i-promote at suportahan ang paggawa at pag-aalok ng mga produktong Pilipino na de-kalidad at kayang makipagsabayan sa mundo.

Ayon sa D.T.I., binuo ang T.P.S. sa pamamagitan ng masusing konsultasyon sa mga ahensya ng pamahalaan, pribadong sektor, at mga research institutions.

Maliban dito, inaatasan din ang nasabing kagawaran, katuwang ang Presidential Communications Office, na ipakalat ang opisyal na kopya ng T.P.S. sa lahat ng kaukulang tanggapan at gawin itong bukas sa publiko sa kanilang opisyal na website upang itaguyod ang transparency at partisipasyon ng mga mamamayan.—ulat mula kay Gilbert Perdez (Patrol 13)

Nakiusap si Department of Labor and Employment Secretary Bienvenido Laguesma sa mga employers na pahintulutan ang mga manggagawa nila na maka-avail ng leave ngayong Undas.

Ayon kay Secretary Laguesma, ito’y hakbang para makauwi nang maaga ang mga trabahante sa kanilang mga probinsya o areas outside National Capital Region.

Nagpaalala rin ang kalihim sa mga kumpanya kaugnay sa tamang pasahod sa mga manggagawa na magtatrabaho ngayong Oktubre a-trenta, Nobyembre 1, at 2 na idineklarang special non-working holidays.

May dagdag aniya na 30-percent premium pay ang naturang mga araw kung magtatrabaho ang kanilang mga manggagawa. —Sa panulat ni Jordan Gutierrez

Kontrolado na ng Armed Forces of the Philippines ang sitwasyon matapos sumiklab ang kaguluhan sa Tipo Tipo, Basilan.

Nilinaw ng AFP na ang naganap na karahasan sa pagitan ng tropa ng militar at ng rouge elements ng Bangsa Islamic Armed Forces ng Moro Islamic Liberation Front kahapon ng umaga ay hindi isang coordinated attack laban sa pamahalaan.

Ayon kay AFP Spokesperson Col. Francel Padilla, batay sa mga paunang ulat na kanilang natanggap, nagsimula ang insidente bilang isang rido o local conflict na bunga ng awayan ng dalawang pamilya.

Batay sa ulat ng Basilan Public Information Office, apat na sibilyan ang nasugatan matapos tamaan ng mga ligaw na bala, habang mahigit pitong libong residente ang inilikas.

Sinabi naman ni Philippine Army Spokesperson Colonel Louie Dema-ala na bantay sarado na nila ang lugar, kasama ang puwersa ng Philippine National Police at lokal na pamahalaan para maibalik sa normal ang sitwasyon sa lugar.

Una nang sinuspinde ang pasok sa klase at gobyerno gayundin ang operasyon ng ilang negosyo sa lugar dahil sa nasabing insidente. —Sa panulat ni Jordan Gutierrez

Ibinunyag ni Public Works and Highways Secretary Vince Dizon na walang Environmental Clearance Certificate (ECC) mula sa Department of Environment and Natural Resources ang mahigit walong libong flood control projects, na na-inspeksyon ng DPWH, kabilang dito ang natuklasang apat na raan at dalawampu’t isang ghost projects.

Sa bawat flood control projects gaya ng dike at revetment, dapat may ECC na ibig sabihin, pinag-aralan ang epekto sa kalikasan at komunidad at dapat alam ng lahat kung saan dadaloy ang naipong tubig.

Ayon naman kay Senador Legarda, may impormasyon na kinukuha lang ng Certificate of Non Coverage ang maliliit na flood control projects kahit na kritikal na proyekto ito at nasa kritikal na lugar.

Ang Certificate of Non Coverage ay isang dokumentong nagpapatunay na ang isang proyekto ay walang masamang maidudulot sa kapaligiran.

Ayon pa kay Sec. Dizon, wala kahit isa sa kanilang na-inspeksyon ang may ECC at CNC kabilang ang mga pinuntahan at pinaimbestigahan ni Pangulong Ferdinand Marcos Jr., na proyekto sa Naujan, Oriental Mindoro.

Kaugnay nito, lumitaw rin na karamihan sa mga flood control projects ay walang building permit.

Dapat nang paspasan ang imbestigasyon sa maanomalyang flood control projects at may maipakulong sa lalong madaling panahon.

Binigyang-diin ito ni Philippine Chamber of Commerce and Industry (PCCI) Chairman George Barcelon kasabay nang pag-aming galit na ang pribadong sektor, partikular ang mga negosyante, sa makupad na aksyon ng gobyerno upang mapanagot ang mga sangkot sa katiwalian.

Ayon kay Barcelon, mas lalong ikinagagalit ng mga lehitimong negosyante na mismong ang kanilang ibinabayad na buwis sa gobyerno, ang kinukupit ng ilang tiwaling opisyal.

Dahil din anya sa korapsyon ay diskumpiyado na ang ilang negosyante na palawakin pa ang kanilang negosyo sa bansa.

Samantala, tutol si Barcelon sa utos ni Pangulong Ferdinand Marcos Junior na ibaba sa 50 percent ang presyo ng construction materials sa mga infrastructure project ng DPWH para matiyak na nagagamit nang tama ang pondo ng pamahalaan.

Pinayuhan ng Land Transportation Franchising and Regulatory Board (LTFRB) ang mga pasahero na i-report ang sobrang singil sa pasahe sa mga taxi at ride-hailing services.

Ito’y sa harap ng pagdagsa ng mga pasahero na patungo sa mga istasyon ng bus at sa iba pang transport hubs para sa paggunita ng Undas.

Sinabi ni LTFRB Chairman Atty. Vigor Mendoza II na inaasahang tutugunan ng regional offices ng ahensya ang mga reklamo ng mga pasahero upang tiyakin ang ligtas at maginhawang paglalakbay ng mga Pilipino.

Makikipag-ugnayan aniya ang LTFRB sa iba pang mga ahensya ng pamahalaan para sa deployment ng bus stations at transport hubs, lalo na sa Metro Manila at iba pang urban areas.

Nangako rin si Chairman Mendoza na ipagpapatuloy ng ahensya ang operasyon laban sa mga abusadong taxi driver at iba pang public utility vehicle drivers sa Ninoy Aquino International Airport.