NATIONAL NEWS

Umaasa si Senate President Tito Sotto na sesertipikahang urgent ni Pangulong Bongbong Marcos Jr. ang kanyang panukalang batas na naglalayong magtatag ng Independent People’s Commission (IPC) na mag-iimbestiga sa mga katiwalian sa mga government infrastructure projects.

Ayon kay SP Sotto, ngayong araw ay sisikapin niya na makausap ang pangulo para ipaabot ang kahilingan na sertipikahan bilang urgent ang kanyang panukala. Ito ay ang Senate Bill 1215 na nakatakdang sponsoran sa plenaryo ng Senado sa pagbabalik ng sesyon sa ikalawang linggo ng Nobyembre.

Una rito, nakiisa ang mga grupo ng labor at business groups sa mga nananawagan sa pangulo na sertipikahang urgent ang nabanggit na panukalang batas para mabigyan ng higit na ngipin ang Independent Commission for Infrastructure na nag-iimbestiga ngayon sa mga maanomalyang flood control projects.

Sa ganitong paraan ay maibabalik ang tiwala sa pamahalaan sa gitna ng nabulgar na talamak at malawakang katiwalian sa mga infrastructure projects ng pamahalaan.

Sa ginawang pagdinig sa Senate Bill 1215, napag-usapan na mahalagang masertipikahan itong urgent para agad itong maaprubahan bago magsimula ang plenary deliberation ng 2026 budget.

Iniimbestigahan na ng National Privacy Commission (NPC) ang umano’y data breach na kinasasangkutan ng GCash operator na G-Xchange, Inc., kasunod ito ng isang post sa dark web na ibinebenta umano ang mga data information ng users ng nasabing App.

Ayon sa NPC, na-leak ang mga impormasyon ng merchant at user, account number, naka-link na bank at virtual card account, at mga detalye ng KYC gaya ng mga pangalan, address, impormasyon sa trabaho, at valid ID.

Hinihimok naman ng NPC ang mga gumagamit ng GCash na magsagawa ng karagdagang pag-iingat.

Kabilang dito ang pagsubaybay sa aktibidad ng account, pag-update ng mga MPIN at password, pag-activate ng mga karagdagang feature ng seguridad, at pananatiling maingat sa mga mensahe ng phishing o mga kahina-hinalang link.

Ipinatutupad ng Civil Aviation Authority of the Philippines ang heightened alert status sa lahat ng paliparan sa bansa dahil sa inaasahang pagdagsa ng mga pasahero sa panahon ng Undas.

Bahagi ang nasabing inisyatiba ng direktiba ni Pangulong Ferdinand Marcos Jr. at Acting Transportation Secretary Giovanni Lopez na panatilihin ang kaligtasan ng mga pasahero at mabilis na operasyon sa mga airport, partikular na sa kasagsagan ng Oplan Biyaheng Ayos: Undas 2025 ng Department of Transportation.

Kaugnay nito, nagtayo na ang CAAP ng Malasakit Help Desks sa mga paliparan upang tulungan ang mga biyahero sa pangangailangan ng mga ito.

Naka-heightened alert din ang mga security personnel upang mapanatili ang kaayusan at kaligtasan ng mga pasahero, habang nakaabang din ang mga medical team upang magbigay ng mabilis na tulong sa oras ng emergency.

Nakikipag-ugnayan na rin ang CAAP sa iba pang mga ahensya, kabilang na ang PNP-Aviation Security Unit, Office of Transportation Security, Department of Tourism, at Civil Aeronautics Board.

Inaasahan ng CAAP na aabot sa 5.8 million ang mga pasaherong dadagsa sa mga paliparan ngayong taon, mas mataas ng 7 hanggang 10 percent kumpara sa 4.8 million passengers noong nakaraang taon.—sa panulat ni John Riz Calata

Opisyal nang miyembro ng Association of Southeast Asian Nations ang bansang Timor-Leste.

Ito’y matapos lagdaan ng mga lider ng mga bansang miyembro ng ASEAN ang Declaration on the Admission of Timor-Leste into ASEAN sa opening ceremony ng 47th ASEAN Summit and Related Summits sa Kuala Lumpur Convention Center.

Ayon kay Malaysian Prime Minister Anwar Ibrahim, kasalukuyang chairman ng ASEAN, ang pagiging miyembro ng Timor-Leste ang kumukumpleto sa “ASEAN family.”

Ang Timor-Leste ang ika-labing-isang bansang miyembro ng ASEAN, at kasama nito ang mga bansang Brunei, Cambodia, Indonesia, Laos, Malaysia, Myanmar, Pilipinas, Singapore, Thailand, at Vietnam.

Nakamít ng pinakabagong miyembro ng ASEAN ang kalayaan noong 2002 at inihain ang kanilang application para mapabilang sa grupo noong 2011.—sa panulat ni John Riz Calata

Nag-imbitá si Senate President Pro Tempore at mabalik na Senate Blue Ribbon Committee Chairman Panfilo Lacson ng isang “napakahalagang testigo” sa susunod na pagdinig ng komite hinggil sa maanomalyang flood control projects sa Nobyembre 14.

Naniniwala si Senador Lacson na ang pag-imbita sa hindi pinangalanang testigo ay makatutulong sa pagpapalibilis ng pagsasampa ng matibay na kaso laban sa ilang politiko, Department of Public Works and Highways officials, at contractors.

Bukod dito, iimbitahan din sa nasabing pagdinig si retired Technical Sergeant Orly Guteza upang mas bigyang-linaw pa ang sinumpaang salaysay nito na kanyang binasa noong siya ay huling dumalo sa pagdinig ng Senate Blue Ribbon Committee noong Setyembre a-bente singko.

Inaasahang isasagawa ang Blue Ribbon Committee chairman reelection ni Sen. Lacson sa Nobyembre 10.—sa panulat ni John Riz Calata

Malamig si dating Philippine National Police Chief Gen. Nicolas Torre III sa usapin kung papasukin ba niya ang buhay-politiko.

Sa panayam ng DWIZ, aminado si Gen. Torre na sa ngayon ay wala siyang pera para maging politiko.

Ayon sa dating hepe ng pambansang pulisya, hinihintay niya pa ang mandatong ibibigay sa kanya ni Pangulong Ferdinand Marcos Jr. at ng PNP.

Dagdag pa ni Gen. Torre, hindi pa niya iniisip kung ano-ano pa ang kanyang mga gagawin sa mga susunod na taon.—sa panulat ni John Riz Calata

Posible nang makulong sa Disyembre o bago mag-Pasko ang mga mapatutunayan sangkot sa maanomalyang flood control projects.

Ito, ayon sa Malacañang, ay matapos ihain ni Public Works Secretary Vince Dizon ang mga kasong paglabag sa Anti-Graft and Corrupt Practices Act, Government Procurement Reform Act at Malversation of Public Funds sa Office of the Ombudsman laban sa ilang opisyal ng pamahalaan at contractors na sangkot sa infrastructure projects issue.

Sinabi ni Presidential Communications Undersecretary Claire Castro na kung non-bailable ang malversation of public funds na ipapataw sa sangkot sa infrastructure project issues ay tiyak na makukulong ito.

Gayunman, naniniwala ang Palasyo na maaaring magdulot ng “dismissals” o pagkabasura sa kaso o “finger pointing” pambibintang, kung mamadaliin ang pagsasampa ng mga kaso.

Iginiit ni Usec. Castro na dapat kumpleto at “air-tight” ang mga ebidensyang ibabato laban sa mga idinadawit sa nasabing kontrobersya.—sa panulat ni John Riz Calata