EXPLAINERS

Kilala ang Pilipinas sa buong mundo dahil sa taglay na hospitality ng mga Pilipino. Ang magiliw na pagtanggap sa mga bisita ay isang cultural practice na namana natin mula sa mga naunang henerasyon.

Kapag may bisita, hindi ba sinisiguro nating mayroon silang the best at one-of-a-kind experience? Ang ganitong klase ng treatment ang tiyak na mararanasan ng mga pinuno ng ibang bansa na bibisita sa Pilipinas dahil sa Laperal Mansion.

Ang Laperal Mansion ang pinakabago sa restoration efforts ng pamahalaan sa heritage houses. Ipinapakita nito ang commitment ni Pangulong Ferdinand Marcos Jr. na palakasin at palawakin ang ugnayan ng Pilipinas sa mga kaalyado nito sa international community.

Isa sa official residences ng Pangulo ng Pilipinas ang Laperal Mansion na kilala noon bilang Arlegui Guest House. Itinuturing itong “crown jewel” ng naturang group of residences.

Matatagpuan sa Arlegui street, malapit sa Malacañang Palace, ang Laperal Mansion. Naging tirahan ito ng ilan sa mga nakaraang pangulo ng bansa. Ngayon, magsisilbi na itong official Presidential Guest House ng foreign heads na bibisita sa Pilipinas.

Mayroon itong 14 meticulously designed bedrooms at dalawang sun rooms na gawa ng pinakamagaling na artists at designers sa Pilipinas.

Makikita rin dito ang tatlong staterooms na tinawag na Magellan, MacArthur, at Rizal bilang pagkilala sa mahalaga nilang ambag sa kasaysayan ng Pilipinas.

Kabilang ang Laperal Mansion sa historic homes na binisita ng mga ambassador ng Pilipinas, bukod sa Goldenberg Mansion, Teus Mansion, at Bahay Ugnayan.

Sa restoration ng Laperal Mansion, naipakita ang talento ng Filipino artists at muling nabuhay ang heritage house na naglalaman ng mayamang kasaysayan ng bansa. At para kay Pangulong Marcos, nararapat lang itong alagaan at pahalagahan.

“The culture is the shared consciousness of the Filipino and it is the answer to the question what is it to be Filipino.”

Ito ang naging pahayag ni Pangulong Ferdinand Marcos Jr. sa idinaos na 16th Ani ng Dangal awarding ceremony noong February 20.

Dahil dito, patuloy na pinagsisikapan ni Pangulong Marcos ang pagpapahalaga at pangangalaga sa kultura at kasaysayan ng Pilipinas.

Sa katunayan, kamakailan lang inorganisa ng pamahalaan ang pagbisita ng mga ambassador na nakatalaga sa Pilipinas sa most historic homes ng bansa.

Sa paraang ito, naibida na ang kulturang Pinoy, lumakas pa ang diplomatic ties ng Pilipinas sa ibang bansa.

Malugod na tinanggap ang mga diplomat sa Goldenberg Mansion, isang dating Presidential guest house. Katabi ito ng Teus Mansion, isang 19th-century home na kasalukuyang kinalalagyan ng Presidential Museum at nagsisilbing treasure trove ng Philippine history.

Inilibot sa iba’t ibang exhibits ang mga ambassador, kabilang na ang evolution sa leadership ng bansa.

Itinuloy ang tour sa Bahay Ugnayan kung saan makikita ang “Road to Malacañang”, isang exhibit na nagtatampok sa buhay ni Pangulong Marcos mula pagkabata hanggang sa pagiging pinuno ng Pilipinas.

Bukas para sa publiko ang tatlong historic homes nang libre.

Mayroon ding surprise visit ang mga ambassador sa newly-restored Laperal Mansion. Magsisilbi ito bilang official presidential guest house para sa mga pinuno ng ibang bansa.

Sumasalamin ang Laperal Mansion sa hospitality ng mga Pilipino at sa pagnanais ni Pangulong Marcos na palakasin at palawakin ang ugnayan ng Pilipinas sa mga kasosyo nito sa international community.

May magandang planong nakalatag si Pangulong Ferdinand Marcos Jr. para sa mga magsasaka ngayong kasagsagan ng El Niño phenomenon.

Ayon sa administrator ng National Irrigation Administration (NIA) na si Eduardo Guillen, whole-of-government approach ang ipapatupad ni Pangulong Marcos sa bansa bilang pagtulong sa mga magsasakang unang naaapektuhan ng tagtuyot.

Halos 100% o doble ang idinagdag na pondo ni Pangulong Marcos para sa NIA. Ayon kay Engr. Guillen, dahil sa ginawang aksyon ng Pangulo, may pondo na sila para sa solar pump irrigation, fertigation, at drip irrigation.

Isang water pumping facility na gumagamit ng solar energy ang solar pump irrigation. Tumutukoy naman ang fertigation sa paghahalo ng fertilizer solutions o pataba sa tubig na mula sa irigasyon; samantalang ang drip irrigation system ay ang paglalagay ng emitters sa lupa na dahan-dahang naglalabas ng tubig.

Bukod sa mga ito, gagamitin ang karagdagang pondo sa pagtatatag ng mga dam sa iba’t ibang bahagi ng bansa.

Kaugnay nito, nagbigay ng direktiba si Pangulong Marcos na ipamahagi sa mga apektadong magsasaka ang high-yielding crop seeds. Ayon kay Engr. Guillen, nakikipag-ugnayan na sila sa local government units (LGUs) at Philippine Rice Research Institute (PhilRice) ng Department of Agriculture (DA) upang matiyak na makukuha ng mga magsasaka ang tulong sa lalong madaling panahon.

Maging ang ibang ahensya ng pamahalaan, handang magpaabot ng tulong sa mga magsasaka, kabilang na ang Department of Social Welfare and Development (DSWD) at Department of Labor and Employment (DOLE).

Sa kabila ng matinding tagtuyot na nararanasan ng bansa, kumpiyansa si Engr. Guillen na magkakaroon ng matatag na suplay ng bigas ang bansa. Aniya, simula Oktubre noong nakaraang taon, may koordinasyon na sa pagitan ng local at national agencies upang paghandaan ang El Niño.

Sabi nga ni Pangulong Marcos, seryosong problema ang nararanasang matinding tagtuyot ng bansa, kaya panawagan niya sa bawat Pilipino, magtulungan upang mapaghandaan ang epekto nito.

Matapos ang Araw ng mga Puso, utak naman ang bumida.

Ito ay dahil sa paglagda ni Pangulong Ferdinand Marcos Jr. noong February 15 sa apat na batas na inaasahang mas magpapalakas sa sistema ng edukasyon sa Pilipinas.

Isa sa apat na batas na pinirmahan ni Pangulong Marcos ang Republic Act No. 11977 na magtatatag sa Pampanga State Agricultural University (PSAU)–Floridablanca Campus. Mag-aalok ang PSAU–Floridablanca Campus ng short-term, technical-vocational, undergraduate, at graduate courses na nakatuon sa agrikultura.

Nilagdaan din ni Pangulong Marcos ang Republic Act No. 11978. Magbubukas ito sa Doctor of Medicine program, kabilang na ang Integrated Liberal Arts and Medicine program, sa Don Mariano Marcos Memorial State University–South La Union Campus.

Pagtugon ang batas na ito sa human resource development needs sa rehiyon ng Ilocos. Magkakaroon ng basic science at clinical courses ang programa na may layong lumikha ng mga propesyonal na doktor na magpapalakas sa healthcare system ng bansa.

Sa bisa naman ng Republic Act No. 11979, magiging regular campus na ang Polytechnic University of the Philippines (PUP) sa Parañaque. Kikilalanin na ito bilang PUP–Parañaque City Campus na mag-aalok ng short-term, technical-vocational, undergraduate, at graduate courses alinsunod sa areas of competency at specialization nito. Inatasan din ang naturang campus na magsagawa ng research and extension services at production activities bilang pagsuporta sa socioeconomic development.

Samantala, sa ilalim ng Republic Act No. 11980, palalawakin ang curricular offerings sa Bulacan State University (BulSU) kung saan maaari na itong mag-alok ng advanced education, higher technological, professional courses, at training programs para sa mga kurso gaya ng engineering and technology, arts and sciences, education, agriculture and industrial fields, accountancy, business and public administration, at medicine and allied health.

Nakasaad rin sa batas na maaaring magbukas ang BulSU ng iba pang branch o extension campuses.

Para kay Senator Chiz Escudero, chairman ng Committee on Higher, Technical and Vocational Education, malaking bagay ang mga naipasang batas ni Pangulong Marcos sa patuloy na pagpapalakas ng administrasyon sa sistema ng edukasyon sa bansa.

Nagpasalamat din si Pampanga 2nd district rep. at dating Pangulong Gloria Macapagal-Arroyo kay Pangulong Marcos sa naging hakbang nito. Naipakita aniya ni Pangulong Marcos ang commitment nito sa pagbibigay ng quality higher education para sa mga Pilipinong mag-aaaral.

Naniniwala ang karamihan sa mga Pilipino na nasa tamang direksyon ang Pilipinas sa ilalim ng pamumuno ni Pangulong Ferdinand Marcos Jr.

Ito ay batay sa “Tugon ng Masa” survey na isinagawa ng OCTA Research mula December 10 to 14, 2023 at inilabas nitong February 14.

Sa naturang non-commissioned survey para sa fourth quarter ng 2023, 64% ng adult Filipinos ang kumpiyansa sa mga aksyon, polisiya, at programang ipinatupad ng administrasyon ni Pangulong Marcos para sa bansa.

Makikitang mas mataas ito ng 2% kumpara sa naitalang 62% noong October 2023 sa kaparehong survey.

Ayon sa ulat ng OCTA, matatagpuan sa Metro Manila ang pinakamaraming Pilipinong may positibong pananaw sa direksyon ng bansa sa 81%. Pinakamababa naman sa Luzon sa 57%.

Lumabas din sa survey na mas maraming Pilipino sa age groups na 75 years old pataas (77%) at 25 hanggang 34 years old (75%) ang naniniwalang papunta sa tamang landas ang Pilipinas. Negatibo naman ang pananaw ng mga mas nakababatang Pilipino, partikular na mula sa age group na 18 to 24 years old (32%).

Isinagawa ang Tugon ng Masa survey sa pamamagitan ng face-to-face interviews sa 1,200 adult Filipino respondents sa iba’t ibang bahagi ng bansa.

Ayon kay Pangulong Marcos, “encouraging” ang malamang maraming Pilipino ang naniniwalang nasa tamang direksyon ang Pilipinas sa ilalim ng kanyang administrasyon. Aniya, naipakita ng datos na ito na nararamdaman na ng mga tao ang presensya ng pamahalaan sa bawat antas ng lipunan. At para sa Pangulo, ito ang mahalaga.

Mas bumilis ng 1.2% ang paglago sa sektor ng agrikultura sa ilalim ng administrasyon ni Pangulong Ferdinand Marcos Jr. noong 2023.

Ito ay batay sa pinakahuling datos ng Philippine Statistics Authority (PSA).

Matatandaang bago maupo si Francisco Tiu Laurel Jr. bilang Department of Agriculture (DA) secretary, pansamantalang naging agriculture chief ang mismong pangulo.

Ayon kay Bureau of Plant Industry Director Gerald Glenn Panganiban, ginagawa ni Pangulong Marcos ang lahat upang mas umunlad ang sektor ng agrikultura ng bansa.

Kabilang sa mga naging kahanga-hangang hakbang ni Pangulong Marcos ang pagpaspas nito sa Senate Bill No. 2432 o Anti-Agricultural Economic Sabotage Act na magbibigay ng mas mahigpit na parusa laban sa hoarders at smugglers. Inutakan pa nga niya ang smugglers sa pamamagitan ng pamamahagi ng mga nakumpiskang bigas sa mga mahihirap na pamilya sa iba’t ibang bahagi ng bansa.

Nagbigay rin si Pangulong Marcos ng bagong buying price ng palay na nagpataas sa kita ng mga magsasaka. Malaki rin ang naitulong ng pamimigay ng pamahalaan ng libreng rice seeds, fertilizers, at technical support para sa mga Pilipinong magsasaka.

Dagdag pa rito, nakatanggap ng fish cage at motorized boats ang mga mangingisda; samantalang tractors, harvester, hauling trucks, at iba pang makinarya at kagamitan naman ang nakuha ng mga magsasaka.

Nakinabang din ang mga magsasaka at mangingisda sa pagbubukas ng Kadiwa stores at pagpapatayo ng cold storage facilities. Bukod sa direktang maibebenta ang mga produkto sa mga negosyante nang walang middlemen, hindi rin masasayang ang mga isda at gulay.

Ipinagmamalaki naman ni Pangulong Marcos ang nakumpletong 51% na farm-to-market roads. Mula sa target nitong 131,000 km, 67,000 km o katumbas ng 32 times na road trip mula Aparri hanggang Jolo na ang nagawa ng pamahalaan. Dahil sa farm-to-market roads, napadali ang paghahatid ng mga magsasaka at mangingisda sa kanilang mga produkto.

Isa rin sa mga hinangaang hakbang ni Pangulong Marcos ang kautusan niyang gamitin ang sobrang pondo mula sa Rice Competitiveness Enhancement Fund upang tulungan ang mga magsasaka. Sa ilalim ng Republic Act 11203 o Rice Tariffication Law, ilalaan sa Rice Competitiveness Enhancement Fund ang makokolektang taripa. Gagamitin ito para sa mga programang nakatuon sa pagpapataas ng ani.

Dahil sa mga naging inisyatiba ni Pangulong Marcos at ng DA, nakapagtala ng pinakamataas na ani ng palay ang bansa ng 20.06 million metric tons noong nakaraang taon. Nakapag-ambag din ang sektor ng agrikultura ng 9% sa gross domestic product (GDP) ng Pilipinas.

Ikinatuwa ni Sec. Laurel ang paglago sa sektor ng agrikultura at kumpiyansa siyang mahihigitan pa ito. Pangako niya, mas patataasin ng ahensya ang farm inputs at magpapatayo ito ng mas maraming irigasyon, post-harvest at storage facilities; alinsunod sa isinusulong ni Pangulong Marcos na modernisasyon upang matiyak ang food security sa bansa.

Tinatayang 83% ng mga Pilipino ang gumagamit ng internet, batay sa datos ng Department of Information and Communications Technology (DICT) noong June 2023. Pumapalo naman sa 10 hours per day ang average internet usage ng mga Pilipino.

Dahil halos lahat ay babad na sa internet, nararapat lang na pahusayin ang cybersecurity ng bansa.

Ayon sa 2023 Asia Scam Report, mula sa 11 Asian economies na sinuri, nangunguna ang Pilipinas bilang bansang may pinakamataas na shopping fraud rate.

Batay naman sa ulat ng Philippine National Police (PNP), tumaas ang cybercrime rate noong huling quarter ng 2023, partikular na sa swindling o mas kilala bilang estafa na may naitalang 15,000 cases.

Dahil dito, inatasan ni Pangulong Ferdinand Marcos Jr. ang PNP at Department of the Interior and Local Government (DILG) na palakasin ang cybersecurity system sa bansa.

Sa ginanap na Palace briefing noong February 6, ibinahagi ni PNP chief Gen. Benjamin Acorda na nais ni Pangulong Marcos na magkaroon ng training ang PNP personnel at mag-invest para sa teknolohiya upang matugunan ang mga banta sa cybersecurity at cybercrime.

Kaugnay nito, may plano ang administrasyong magtatag ng National Cybercrime Training Institute ayon kay Interior Secretary Benjamin Abalos Jr. Pangangasiwaan ng DILG ang training institute sa ilalim ng Philippine Public Safety College. Dito, bibigyan ng formal training ang local police officers para sa detection at prevention ng cybercrimes.

Iprinisenta naman ng PNP kay Pangulong Marcos ang Capability Enhancement Program 2024-2025 na nakatuon sa pag-uupgrade ng mobility, communication equipment, firepower, at internal security operations (ISO) equipment.

Samantala, inaprubahan ni Pangulong Marcos ang National Cybersecurity Plan (NCSP) 2024-2028 na may layong magtatag ng isang “trusted, secure, at reliable” cyberspace para sa Filipino netizens.

Red carpet, hindi red tape.

Para kay Pangulong Ferdinand Marcos Jr., ganito ang dapat na pagtrato sa local at foreign investors na nais magpatayo ng kanilang negosyo sa bansa.

Alinsunod dito, inutusan ni Pangulong Marcos ang economic team ng pamahalaan na bawasan ang red tape at patuloy na itaguyod ang tinatawag na “Ease of Doing Business.”

Tumutukoy ang red tape sa sobrang higpit at daming requirements na kinakailangan upang makakuha ng mga serbisyo mula sa pamahalaan.

Nilagdaan ni dating Pangulong Gloria Macapagal-Arroyo ang Republic Act No. 9485 o Anti-Red Tape Act noong June 2, 2007. Kabilang sa batas na ito ang mga hakbang upang mabawasan ang red tape sa pakikipag-transaksyon sa pamahalaan.

May 28, 2018 naman nang pinirmahan ni dating Pangulong Rodrigo Duterte ang Republic Act No. 11032 o Ease of Doing Business Law. Pag-amyenda ito sa naunang Anti-Red Tape Act na may layunin ding mapabuti ang sistema at mapabilis ang proseso sa pakikipagtransaksyon sa pamahalaan.

Layon ng Ease of Doing Business Law na manghikayat ng mas maraming micro, small, and medium enterprises (MSMEs) at foreign investors sa Pilipinas sa pamamagitan ng mabilis at maayos na proseso sa pagnenegosyo, kabilang na ang business registration. Sa batas na ito, inaasahang mababawasan ang processing time, red tape, at korapsyon.

Kaugnay nito, matatandaang kamakailan lang, ipinag-utos ni Pangulong Marcos ang nationwide rollout ng assistance sa local government units (LGUs) para sa pagpapatupad ng e-business one-stop shop (eBOSS) program.

Sa eBOSS program, mas magiging madali at mabilis ang proseso sa pagkuha ng mga dokumento sa pagnenegosyo dahil sa digitalization. Ayon nga kay Anti-Red Tape Authority (ARTA) Director General Ernesto Perez, sa pagpapatupad ng eBOSS program, magiging posible ang pagkuha ng business permit sa loob lang ng 20 mins to 1 hour.

Para kay Pangulong Marcos, mahalaga ang pagbabawas sa red tape dahil humahadlang ito sa pag-unlad ng bansa. Dagdag pa niya, hindi na dapat pinapahirapan pa ang mga negosyante at pinapatawan ng malaking buwis. Sa halip, dapat aniyang palakasin ng kanyang economic team ang pagbibigay ng incentives para sa kanila.

Sa pagpapadali ng proseso sa pagnenegosyo, mas maraming investors at entrepreneurs ang mahihikayat na magpatayo ng kanilang negosyo. Inaasahang makalilikha ito ng mas maraming trabaho at makaaambag sa paglago ng ekonomiya ng Pilipinas.