May kapamilya ka bang may edad 80 years old pataas? O ikaw mismo, malapit nang umabot sa edad na ito? Kung oo, may good news kami para sa inyo dahil pirmado na ni Pangulong Ferdinand Marcos Jr. ang panukalang batas na magpapalawak sa Centenarians Act of 2016.
Matatandaang noong June 23, 2016, nilagdaan ni dating Pangulong Benigno Aquino III ang Republic Act 10868 o Centenarians Act. Sa ilalim ng batas na ito, mabibigyan ng centenarian gift of P100,000 ang mga Pilipinong may edad na 100 years old pataas.
Makalipas ang halos walong taon, nagkaroon ng pag-amyenda sa Centenarians Act sa bisa ng Republic Act 11982, matapos itong pirmahan ni Pangulong Marcos noong February 26.
Sa bisa ng bagong batas, mabibigyan na rin ng cash gift na nagkakahalaga ng P10,000 ang senior citizens na aabot ng 80, 85, 90, at 95 years old, nasa Pilipinas man o abroad. Patuloy pa ring makakatanggap ng P100,000 ang mga lolo at lola nating aabot ng 100 years old.
Ayon kay Pangulong Marcos, sumasalamin sa pagiging compassionate nating mga Pilipino sa mga mas nakatatanda ang pagpapalawak sa coverage ng Centenarians Act.
Naniniwala rin ang Senado na malaki ang magiging epekto nito.
Ayon kay Senator Ramon ‘Bong’ Revilla Jr. na may akda ng naturang batas, malaking bagay ang Expanded Centenarians Act dahil maaari itong gamitin sa pagbili ng kanilang gamot, vitamins, supplement, at pagkain.
Para naman kay Senator Imee Marcos, nahihirapan ang senior citizens na makabili ng kanilang basic needs dahil sa tumataas na cost of living at healthcare expenses. Sa pagpapalawak ng Centenarians Act, inaasahang mas maraming senior citizens na ang makikinabang dito.
Bukod sa mas maraming nakatatanda ang matutulungan ng bagong batas, magiging inspirasyon din ito ng mga kababayan natin na pahabain at i-enjoy ang kanilang sariling buhay.